graffiti

ബും ബും ഷക്കലക്ക.. ബും ബും...

2009-03-21T11:00:00.001-04:00

സൗകര്യങ്ങള്‍ക്ക് മേലെ ആഡംബരവും,സ്പീഡും, പവറും, ഷോഓഫും പ്രാധാന്യം നേടിയപ്പോള്‍ നാട്ടിലെ റോഡുകളില്‍ നിന്ന് അന്യം നിന്ന് തുടങ്ങിയിരിക്കുന്ന ഒരു വാഹനം ആണ്‌ നമ്മുടെ സൈക്കിള്‍. സ്കൂള്‍ കുട്ടികളുടെ ഇടയില്‍ കുറച്ചെങ്കിലും കാണാമെങ്കിലും അതിന്റെ ആയുസ്സും ചോദ്യം ചെയ്യപ്പെടാവുന്നതാണ്‌. ലൈസന്‍സ് ആവശ്യമില്ലാത്ത 30-35cc മോഫ പോലുള്ള ഒരു ഡീസന്റ് മോപ്പഡ് ഇറങ്ങാനുള്ള താമസമേയുള്ളൂ. ഈ അവസ്ഥ മുമ്പേ ഉണ്ടാവേണ്ടതായിരുന്നു. വളരേ ചെറിയൊരു ശതമാനം സാധാരണക്കാരും, അത്യാവശ്യം മത്സ്യ വില്പനക്കാരും മാത്രം ഉപയോഗിച്ചിരുന്ന ഒരു കാലഘട്ടത്തിലാണ്‌ തരംഗം സൃഷ്ടിച്ചു കൊണ്ട് BSA Steetcat (Hero Ranger-ഉം) വിപണിയില്‍ ഇറങ്ങിയത്. സ്റ്റ്റീറ്റ്കാറ്റിന്റെ ബും ബും ഷക്കലക്ക.. പരസ്യത്തിന്റെ അലകളാണ്‌ ഇപ്പോഴും കുറച്ച് പേരെയെങ്കിലും ഇതിലേക്ക് ആകര്‍ഷിക്കുന്നത്; അതോടൊപ്പം സൈക്കിളുകളുടെ രൂപത്തിലും നിറങ്ങളിലും വന്ന വ്യത്യസ്ഥതയും. അല്ലെങ്കില്‍ ഇതൊക്കെ ഡിനോസറുകളുടെ ഗണത്തില്‍ പെട്ട് പോയേനേ. ഇതോടൊപ്പം സൈക്കിള്‍ മോഷ്ടാക്കള്‍ എന്ന ഒരു വംശം തന്നെ ഇല്ലാതായി പോയിരിക്കുന്നു എന്ന് തോന്നുന്നു (മീശമാധവനില്‍ മോഷ്ടിച്ച സൈക്കിളാണെന്ന് സൂചന നല്‍കുന്ന ഒരു സീന്‍ മറക്കുന്നില്ല). സൈക്കിള്‍ മോഷ്ടിക്കപ്പെട്ടു എന്നൊരു വാര്‍ത്ത വായിച്ച കാലം തന്നെ മറന്നു. ഇനി ഇതൊന്നും വാര്‍ത്തയാവാത്തത് ഇത്തരം സാധനങ്ങള്‍ക്കൊന്നും വില ഇല്ലാതായി പോയത് കൊണ്ടാണോ? മാരുതി കാറ് മോഷണം പോയി എന്ന് പറയുന്നത് പോലും അഭിമാന പ്രശ്നമാണെന്ന് വിശ്വസിക്കുന്ന ആളുകളുള്ള നാടാണെന്ന് ഒരു സുഹൃത്ത് കളിയായി പറഞ്ഞത് ഓര്‍ക്കുന്നു. പിന്നെ വാര്‍ത്ത കൊടുക്കുന്ന പത്രങ്ങളും അവരുടെ സ്റ്റാന്റേര്‍ഡ് നോക്കണ്ടേ.

വിദേശത്ത പല വന്‍ നഗരങ്ങളിലും ഇതില്‍ നിന്നും വ്യത്യസ്ഥമായ ഒരു ചിത്രമാണ്‌ കാണാന്‍ പറ്റുന്നത്. കാറുകളും, വലിയ വാഹനങ്ങളും വിട്ട് ആളുകള്‍ സൈക്കിളുകള്‍ വാങ്ങി കൂട്ടാന്‍ തുടങ്ങയിരിക്കുന്നു. പഴയ യുറോപ്യന്‍ നഗരങ്ങളിലെ ഇടുങ്ങിയ വഴികളിലൂടെ സഞ്ചരിക്കാന്‍ ഏറ്റവും പറ്റിയ വാഹനമായി അവിടുത്തുകാര്‍ ഉപയോഗിച്ചു കൊണ്ടിരുന്ന സൈക്കിളിനെ ന്യൂയോര്‍ക്ക് നഗരത്തിലെ റെട്രോ-ഫാഷനിസ്റ്റാസ് നേരത്തെ തന്നെ ഏറ്റുവാങ്ങിയിരുന്നു. കുറച്ച് വൈകിയാണെങ്കിലും പാരീസിനെ മാതൃകയാക്കി സ്വീകരിച്ച് ന്യൂയോര്‍ക്ക് സിറ്റിയും ഇന്ന് സൈക്ലിങ്ങ് ഒരു commuting option ആയി promote ചെയ്യുകയാണ്‌. ഈ നഗരത്തില്‍ ഏറ്റവും വേഗത്തില്‍ ലക്ഷ്യത്തില്‍ എത്താനുള്ള സഞ്ചാര മാര്‍ഗ്ഗം എന്ന പേരും കഴിഞ്ഞ കുറേ വര്‍ഷങ്ങളായി സൈക്കിളിനാണ്‌. ഉപയോഗത്തിനായി പ്രത്യേകം ലെയിനുകളും, ഗ്രീന്‍‌വേകളും കൂടി ആയതോടെ, കഴിഞ്ഞ വര്‍ഷം 35% കൂടുതല്‍ ആളുകള്‍ ഇതിലേക്ക് ആകൃഷ്ടരായി. ഇവിടെ നിത്യേന 1.3 ലക്ഷം ആളുകള്‍ സൈക്കിള്‍ ഒരു യാത്രാ മാര്‍ഗ്ഗമായി ഇന്ന് ഉപയോഗിക്കുന്നു.

പക്ഷെ ഉപയോഗത്തിന്റെ വര്‍ദ്ധനവിന്‌ അനുസൃതമായി പാര്‍ക്ക് ചെയ്യാനുള്ള സൗകര്യങ്ങള്‍ വര്‍ദ്ധിച്ചിട്ടില്ല. അത് കൊണ്ട് തന്നെ ഒരു വഴിക്ക് പോയി തിരിച്ച് വരുമ്പോള്‍ സൈക്കിള്‍ കൂടെ ഉണ്ടാവണമെന്നില്ല. കഴിഞ്ഞ വര്‍ഷം 70,000-ന്‌ മേലെ മോഷണങ്ങള്‍ ആണ്‌ റിപ്പോര്‍ട്ട് ചെയ്യപ്പെട്ടിട്ടുള്ളത്. ടൂവീലറുകള്‍ ആധിപത്യം സ്ഥാപിച്ചതോടെയാണ്‌ നാട്ടില്‍ സൈക്കിളുകള്‍ അന്യം നിന്ന് പോയത്. ഒരു മോട്ടോര്‍ ബൈക്ക് നല്‍കുന്ന യാത്രാ സൗകര്യത്തേക്കാള്‍, ഇന്ന് സുന്ദരിമാരെ വശീകരിക്കാനും, macho man ഇമേജ് ഉണ്ടാക്കാനും ബൈക്കുകള്‍ ഉണ്ടായേ തീരൂ എന്ന് വിശ്വസിപ്പിക്കാന്‍ കമ്പനികള്‍ക്ക് കഴിഞ്ഞിരിക്കുന്നു. ഈ ഗ്ലാമര്‍ ഇമേജിന്റെ വലയില്‍ പലരും വീണ്‌ പോയതോടെയാണ്‌ സ്കൂട്ടറുകളുടെ പോലും തിരി കരിഞ്ഞ് പോയത്. ഇനി റ്റാറ്റാ നാനോയുടെ വരവോടെ ബൈക്കുകളുടെ ഗതി എന്താകും എന്നു കണ്ടറിയാം. എന്നാല്‍ സൈക്കിള്‍ നല്‍കുന്ന adventure-ഉം, thrill-ഉം പുതിയ തലമുറയെങ്കിലും ആസ്വദിച്ചിട്ടില്ലെന്ന് വിശ്വസിക്കാം. നിത്യാഭ്യാസവും മനക്കരുത്തും കൈമുതലായുള്ള ചില not-so-macho-men തന്നെ ഇവരുടെ മുന്നില്‍ അവതരിക്കേണ്ടി വരും. താഴെയുള്ള വീഡിയോ കാണുക; അല്ലെങ്കില്‍ ഇവിടെ.

അധികം താമസിയാതെ സൈക്കിളുകള്‍ വീണ്ടും കേരളത്തിലെ യുവാക്കളെ തേടിയെത്തും എന്ന് പ്രതീക്ഷിക്കാം. ലക്ഷത്തിന്‌ മുകളില്‍ വിലയുള്ള മോഡലുകളും, ബ്രാന്റ് അമ്പാസിഡറായി സ്പാന്‍ഡക്സും, ഹെല്‍മറ്റും ധരിച്ച ഒരു സൂപ്പര്‍ താരവും കൂടി ചെറുതായി ശ്രമിച്ചാല്‍ മതി. Fun, fitness, freedom എന്നീ factors ഒന്നിച്ച് നല്‍കുന്ന വേറെ എത്ര വിനോദങ്ങള്‍ ഉണ്ട് ഇന്ന് അറിവില്‍.

സല്യൂട്ട്, അബ്‌സല്യൂട്ട്

2009-03-13T22:00:00.000-04:00

മദ്യസേവ ഒരു socially accepted act ആയി കേരളത്തില്‍ അംഗീകരിക്കപ്പെടുന്നതിന്‌ മുമ്പുള്ള കാലഘട്ടത്തില്‍ ഞാന്‍ നാട്ടില്‍ നിന്ന് പോന്നിരുന്നു. അതു കൊണ്ട് മലയാളികളില്‍ വെള്ളമടി ശീലം എത്രത്തോളം വളര്‍ന്നിരിക്കുന്നു എന്ന് ശരിക്കും മനസ്സിലായത് Beverages Corporation-ന്റെ കണക്ക് പുസ്തകത്തിലെ താളുകള്‍ കഴിഞ്ഞ കുറച്ച് കാലങ്ങളില്‍ ശ്രദ്ധിച്ചപ്പോഴായിരുന്നു.

അമേരിക്കയിലൊക്കെ എല്ലാവരും മദ്യപിക്കും എന്നും, അച്‌ഛനും, അമ്മയും, മക്കളും ഒന്നിച്ചിരുന്ന് കുടിച്ച് അര്‍മ്മാദിക്കുന്നവരാണെന്നൊക്കെ വിശ്വസിക്കുന്ന കുറേ പേരൊക്കെ ഇന്നും കേരളത്തിലും ഉണ്ട്. അവര്‍ക്ക് ഒക്കെ ആകാമെങ്കില്‍ നമുക്ക് എന്തുകൊണ്ട് ആയിക്കൂടാ എന്ന് ചോദിക്കുന്ന വിവരദോഷികളും ഇല്ലാതില്ല. എന്നാല്‍ അമേരിക്കയില്‍ 37% ശതമാനം മദ്യം കഴിക്കാത്തവരാണെന്നാണ്‌ കണക്ക് (1939 മുതല്‍ ഈ കണക്കില്‍ മാറ്റം ഉണ്ടായിട്ടില്ല എന്ന് Gallup Consumption Survey). എന്നാല്‍ ബാക്കിയുള്ള 63%-ത്തില്‍ മദ്യപിച്ച് വഴക്കുന്നുണ്ടാക്കുന്നവരും, വഴിയില്‍ ഇഴയുന്നവരും, റോഡില്‍ വാളു വയ്ക്കുന്നവരും.... ഒക്കെ തീരെ ചെറിയൊരു ശതമാനം ആയിരിക്കും (മദ്യപിച്ച് വാഹനം ഓടിക്കുന്നവരുടെ കണക്കിലേക്ക് തത്കാലം കടക്കുന്നില്ല). ഇതിനുള്ള മുഖ്യ കാരണം, മദ്യപിക്കുന്നവരില്‍ മുക്കാല്‍ പങ്കും കഴിക്കാന്‍ താത്പര്യപ്പെടുന്നത് Wine (ഇത് ആരോഗ്യത്തിന്‌ നല്ലതാണെന്ന പ്രചാരം ഈ അടുത്ത കാലത്ത് കൂടുതലായി കേള്‍ക്കുന്നു) അല്ലെങ്കില്‍ Beer ആണ്‌ എന്നതാവാം, അതല്ലെങ്കില്‍ നിയമത്തിന്റെ വലയിലാവും എന്നതിന്റെ ഭയമാവാം.

മദ്യം, പുകവലി പോലെ ആരോഗ്യ പ്രശ്നങ്ങള്‍ ഉണ്ടാക്കുന്ന ശീലം അല്ലെന്ന് വിശ്വസിക്കാം. അതു കൊണ്ടായിരിക്കണമല്ലോ പരസ്യങ്ങളില്‍, injurious എന്ന വാക്ക് ഉപയോഗിക്കാന്‍ നിര്‍ബന്ധിക്കാത്തത്.. (Drink responsibly, Drink in moderation എന്ന ഉപദേശങ്ങള്‍ പൊതുവെ ഉപയോഗിച്ച് കാണുന്നു). ഒരു ദിവസം 4 എണ്ണം വരെ ആകാം. എന്ന് വച്ച് ഒരാഴ്ച്ചയില്‍ 28 എന്നല്ല; മറിച്ച് പുരുഷന്മാര്‍ക്ക് 14-ഉം സ്ത്രീകള്‍ക്ക് 7-ഉം എന്ന അളവ് "low risk" ആയി പരിഗണിക്കാം എന്നാണ്‌ NIAAA പറയുന്നത്.
ഇത് ആരോഗ്യവാനായ ഒരാള്‍ക്ക് കഴിക്കാവുന്നതിന്റെ ലിമിറ്റ് ആണ്‌ സൂചിപ്പിക്കുന്നത്. ബാക്കിയുള്ളവര്‍ നോക്കിയും കണ്ടും പ്രവര്‍ത്തിക്കുക.

ഈ വകയില്‍ നിന്നുള്ള വരുമാനം കേരളത്തിന്റെ സര്‍ക്കാര്‍ ഖജനാവിലേക്ക് വലിയൊരു സംഖ്യ തന്നെയാണ്‌ കൊണ്ടുവരുന്നത്. അത് കൊണ്ടാണല്ലോ സര്‍ക്കാര്‍ തന്നെ ഇതിനെ silently പ്രോത്സാഹിപ്പിക്കുന്നത്. പക്ഷെ ഇതിനെ after and related effects-നെ കുറിച്ച് ആര്‍ക്കും ഒരു ബോധവും ഇല്ല എന്നതാണ്‌ വലിയ തമാശ. ഇത്രയും വലിയൊരു business market-ഉം, അടിച്ച് അലമ്പുണ്ടാക്കാന്‍ തയാറാവുന്ന അണികളുമുള്ള കോര്‍പ്പറേറ്റ് പാര്‍ട്ടി എന്താണാവോ ഈ ബിസിനസ്സിലേക്ക് ഇനിയും ചുവട് വയ്ക്കാത്തത്. റഷ്യയില്‍ ആവാമെങ്കില്‍ കേരളത്തിലും ആവാം എന്നായിരുന്നല്ലോ? ഒരു അവിടത്തെ പോലെ ഇവിടേയും സിസ്റ്റം. അവിടത്തെ വീര്യം കൂടിയ മുന്‍ പ്രസിഡന്റിന്റെ സ്വന്തം പേരില്‍ അടിച്ചിറക്കുന്ന ബ്രാന്റ് അടിച്ച് മുന്‍ സഃഖാക്കള്‍ വീര്യം കൂട്ടുന്നത് പോലെ ഒന്ന് നോക്കിയാല്‍ എന്താ? പുതിയ പ്രസിഡന്റ് വന്ന്പ്പോള്‍ പുതിയ ബ്രാന്റും ഇറങ്ങി, പക്ഷെ ഭരണം പോലെ തന്നെ വില്പനയിലും ജനപ്രീതി പോരാ. കേരളം ഇനിയും ബംഗാള്‍ ആവാത്തത് കൊണ്ട്, ഇവിടെ ഓരോ പാര്‍ട്ടി സെക്രട്ടറി മാറുമ്പോള്‍ പുതിയവ ഇറക്കിയാല്‍ മതി. ഇനി ഓരോ ഗ്രൂപ്പിനും, പക്ഷത്തിനും, ഘടക കക്ഷികള്‍ക്കും സ്വന്തം ബ്രാന്റ് വേണെങ്കില്‍ അങ്ങനെ. പക്ഷെ ഒരു "മുഖ്യന്‍ മാര്‍ക്ക്" ഡ്രിങ്ക് ആയിരിക്കും തറവാട്ടിന്‌ നല്ലത്, പാക്കേജിലും, പരസ്യത്തിലും, ഡിസ്‌പ്ലെയിലും, പ്രസന്റേഷനിലും, ഭയങ്കര വീറും, പവറും തോന്നും, തോന്നണം; പക്ഷെ സീറോ ആക്ഷന്‍, വാചകം മാത്രം, കം‌പ്ലീറ്റ് ശൂന്യം, ഓള്‍ ബ്ലാങ്ക്.... ആര്‍ക്കും ഒരു ഉപദ്രവവും ഉണ്ടാവില്ല. So, Drink Responsibly!.

പ്ലാസ്റ്റിക്ക് ബാഗ് സര്‍ച്ചാര്‍ജ്ജ്

2008-11-12T19:30:00.001-05:00

ധവള വിപ്ലവവും ഹരിതവിപ്ലവവും കഴിഞ്ഞകാല സംഭവങ്ങളാണ്‌. എന്നാല്‍ ഇതില്‍ രണ്ടാമന്‍ പുതിയ രൂപത്തിലും ഭാവത്തിലും പുനരവതരിച്ചിട്ട് കുറച്ച് കാലമായി. പക്ഷെ ഇത് ഇപ്പോഴും വന്‍ നഗരങ്ങളിലെ Retro/Metro Fashionistas മാത്രം ഏറ്റെടുത്ത "Be Green" ആശയത്തില്‍ ഒതുങ്ങി ഇരിക്കുകയാണ്‌. കൃത്യമായ ഒരു അജണ്ടയില്‍ ഒതുങ്ങാത്ത ആശയമായതിനാല്‍ "Whole Foods" പോലുള്ള കമ്പനികള്‍ക്ക് ഇതൊരു publicity-യും, സാധനങ്ങള്‍ക്ക് കൂടുതല്‍ കാശ് ഈടാക്കാനുള്ള കാരണവും കൂടിയാണ്‌. ഇതില്‍ നിന്ന് വ്യത്യസ്ഥമായി പ്ലാസ്റ്റിക്ക് ബാഗ് ഒന്നിന്‌ 5c നിരക്കില്‍ ഈടാക്കും എന്നൊരു നീക്കം നടത്തി IKEA ആയിരുന്നു ചിലരുടെയെങ്കിലും ശീലങ്ങളെ മാറ്റി മറിച്ചത്. കഴിഞ്ഞ ഒരു വര്‍ഷം IKEA ഉപഭോക്താക്കള്‍ 64 million (92%) കുറവ് പ്ലാസ്റ്റിക്ക് കവറുകള്‍ ഉപയോഗിച്ചു എന്നാണ്‌ കണക്ക്. ഒരു വര്‍ഷം അമേരിക്കക്കാര്‍ വലിച്ചെറിയുന്ന 100 Billion പ്ലാസ്റ്റിക്ക് കവറുകളില്‍ ഇത്രയെങ്കിലും കുറഞ്ഞല്ലോ എന്ന് സമാധാനിക്കാം.

ഈ പാത പിന്‍‌തുടര്‍ന്നാല്‍ രണ്ട് കാര്യങ്ങള്‍ സാധിക്കാം, എന്നതാവണം NYC-യെ ഇങ്ങനെ ഒരു തീരുമാനത്തിന്‌ പ്രേരിപ്പിക്കുന്നത്. ഇന്ന് കടകള്‍ സൗജന്യമായി നല്‍കുന്ന പ്ലാസ്റ്റിക്ക് കവറുകള്‍ക്ക് 6c വച്ച് ഈടക്കണമെന്ന് അനുശാസിക്കുന്ന പുതിയൊരു നിയമം ന്യൂയോര്‍ക്ക് സിറ്റി മെയറിന്റെ ഓഫീസില്‍ ഒരുങ്ങുന്നു. പുതിയ നിയമം പ്രാബല്യത്തില്‍ വരുന്നത് പ്ലാസ്റ്റിക്ക് നിരോധനം എന്ന് ഒരു ലക്ഷ്യം മാത്രം ഉദ്ദേശിച്ചാണെന്ന് തോന്നുന്നില്ല. പകരം ഇത്തരം ഒരു നീക്കം കൊണ്ട് വര്‍ഷത്തില്‍ $16 million-ന്റെ അധിക വരുമാനം എന്ന നേട്ടം കൂടി കണ്ട് കൊണ്ടായിരിക്കണം. Reusable ബാഗുകള്‍ നിര്‍മ്മിക്കുന്ന ചൈനയിലെ കമ്പനികള്‍ ഇതിനകം തന്നെ multi-billion ഡോളറിന്റെ ഓര്‍ഡറിന്‌ കാത്തിരിക്കുന്നുണ്ടാവും എന്നത് മറ്റൊരു വിഷയം!

പ്ലാസ്റ്റിക്ക് നിരോധനം എന്ന പേരില്‍ മൈക്രോണിന്റെ കണക്ക് നോക്കി കൈക്കൂലി വിഴുങ്ങാന്‍ കടകള്‍ റെയ്‌ഡ് ചെയ്യുന്ന നാട്ടിലെ ഏമാന്മാരെ അഴിച്ച് വിടുന്നവര്‍ ഇനി ഈ വഴിക്ക് ആലോചിക്കട്ടേ.
.

ഗോസ്റ്റ് ലൈറ്റ്

2008-09-07T21:30:00.002-04:00

വീണ്ടും ഒരു സെപ്റ്റംബര്‍ 11. ആ ദിനം New York Skyline-ന്‌ ഉണ്ടാക്കിയ മാറ്റം ഇനി പുനഃസ്ഥാപിക്കാന്‍ പറ്റില്ല എന്ന് തോന്നുന്നില്ല. അമേരിക്കന്‍ സാമ്രാജ്യത്വത്തിന്റെ മുഖമുദ്രയും, ധാര്‍ഷ്ട്യവും, തലയെടുപ്പും ഒക്കെ ആയി പലരും ഈ സ്കൈലൈനിനേയും, World Trade Centre-നേയും വിശേഷിപ്പിച്ച് കണ്ടിട്ടുണ്ട്. What ever!

ആ ഓര്‍മ്മ പുതുക്കലിന്റെ ഭാഗമായി ഈ 11-നു കൂടി "Tribute In Light" തെളിയും. ഈ വര്‍ഷം മിക്കവാറും അവസാനത്തേതാവും എന്ന് പറയപ്പെടുന്നു. വ്യത്യസ്തമായ, ഒപ്പം സൗജന്യമായും കാണാവുന്ന ഒരു ആര്‍ട്ട് ഇന്‍സ്റ്റലേഷന്‍ ആണ്‌ ഇത്. ഈ വെള്ളിയാഴ്ച ഇതിന്റെ ടെസ്റ്റിങ്ങ് സമയത്ത് Brooklyn Heights Promenade ഭാഗത്ത് എത്തിയപ്പോള്‍ എടുത്തതാണ്‌ ചിത്രം.
[സിറ്റി സ്കൈലൈനിന്റെ മനോഹാരിത ആസ്വദിക്കാന്‍ ഏറ്റവും പറ്റിയ സ്ഥലങ്ങളില്‍ ഒന്നാണ്‌ ബ്രൂക്ലിന്‍ ഹൈറ്റ്സ്. അബ്രഹാം ലിങ്കണ്‍ വിശേഷിപ്പിച്ചത്, "there may be finer views than this in the world, but I don't believe it", എന്നായിരുന്നു പോലും.]

അവിടെ നില്‍ക്കുമ്പോള്‍ അപ്രതീക്ഷിതമായി ഈ നീല വെളിച്ചം പ്രത്യക്ഷപ്പെട്ടപ്പോള്‍ Cars എന്ന പിക്സാര്‍ ചിത്രത്തിലെ Mater-ന്റെ "its the ghostlight" എന്ന് പറയുന്ന വിറയാര്‍ന്ന മുഖം ആണ്‌ ഓര്‍മ്മ വന്നത്. കുട്ടികള്‍ക്കുള്ള ചിത്രം എന്ന് കരുതി Cars-നെ തഴഞ്ഞവര്‍ അഭിപ്രായം മാറ്റി വച്ച് ചിത്രം കാണാന്‍ ശ്രമിക്കുക. ഈ ചിത്രത്തോട് അനുബന്ധിച്ച് നിര്‍മ്മിച്ച "Mater And The Ghostlight", എന്ന ഹ്രസ്വചിത്രത്തില്‍ ഗോസ്റ്റ് ലൈറ്റിനുള്ള വിശദീകരണം ഇങ്ങനെ: "...ghostlight is a glowing orb of blue translucent light that haunts these very parts [places]...".

പലരുടെയും ഓര്‍മ്മകളെ haunt ചെയ്യുന്ന ഈ ദിനത്തെ കുറിച്ച് ആവുമ്പോള്‍ ghostlight എന്ന പേര്‌ കുറച്ച് കൂടി അര്‍ത്ഥവത്താകുന്നു.
.

കാ.... കാ.....

2008-09-04T19:30:00.002-04:00

കാക്കയെ കുറിച്ച് ഒരു introduction-ന്റെ ആവശ്യം ഇല്ല, എന്നാലും, "യൂ മീന്‍, ക്‌രോ" എന്ന് ചോദിക്കുന്ന ആരെങ്കിലും ഉണ്ടാകാതിരിക്കില്ല. നാട്ടില്‍ ഏറ്റവും സുലഭമായി കാണപ്പെടുന്നതും, ലോകത്തിന്റെ ഏത് കോണില്‍ ചെന്നാലും ഒരെണ്ണത്തെയെങ്കിലും കാണാന്‍ പറ്റുമോ എന്നും നമ്മള്‍ ആദ്യം അന്വേഷിക്കുന്നതും, കാക്കയെ ആണ്‌. കാണാന്‍ ഒരു ലുക്ക് ഇല്ലാത്തത് ആണോ, അതോ സ്വഭാവ ദൂഷ്യം കൊണ്ടാണോ എന്നറിയില്ല നമ്മള്‍ ഈ പക്ഷിക്ക് വലിയ ബഹുമാനം കൊടുത്ത് കാണാറില്ല. അത് കൊണ്ട് കൂടിയായിരിക്കണം എന്നും വീടിന്‌ ചുറ്റും ഒരേ കാക്കയേ തന്നെയാണോ കാണുന്നത് എന്ന് പോലും ശ്രദ്ധിക്കാന്‍ സമയം കൊടുത്തിരുന്നില്ല. പക്ഷെ അവ നമ്മളെയും ചുറ്റുമുള്ളവരെയും സൂക്ഷ്മമായി വീക്ഷിക്കുന്നുണ്ടായിരുന്നു എന്ന് തോന്നിപ്പിക്കുന്ന ഒരു സംഭവം പണ്ട് വീട്ടില്‍ ഉണ്ടായി. സ്ഥിരമായി തേങ്ങ ഇടാന്‍ വരുന്നയാള്‍ക്ക് പകരം ഒരാള്‍ തെങ്ങില്‍ കയറിയപ്പോള്‍ കുറേ കാക്കകള്‍ സംഘം ചേര്‍ന്ന് അദ്ദേഹത്തെ തുരത്താന്‍ ശ്രമിച്ചു. ഈ അനുഭവം അയാള്‍ക്ക് ഒന്നില്‍ കൂടുതല്‍ തവണ അനുഭവിക്കേണ്ടി വന്നു. ഏല്പിച്ച പ്രോജക്റ്റ് കമ്പ്ലീറ്റ് ചെയ്യാന്‍ അന്ന് പുള്ളി കുറച്ച് പണിപ്പെട്ടു. അത് പോലെ ഉച്ച ഭക്ഷണ സമയത്ത് കൃത്യമായി വന്നെത്തുന്ന കാക്കകളെ ശ്രദ്ധിച്ചിട്ടുണ്ടോ?

എന്നാലും, സാധാരണയില്‍ കവിഞ്ഞ ബുദ്ധിയുള്ള പക്ഷിയായി നമ്മള്‍ കാണുന്നില്ലെങ്കിലും അങ്ങനെയാണെന്നാണ്‌ സത്യം. ആഴമുള്ള പാത്രത്തില്‍ കല്ലുകള്‍ പെറുക്കിയിട്ട് വെള്ളം കുടിച്ച കാക്കയെ പറ്റിയുള്ള കഥ ഒരു പക്ഷെ നടന്ന സംഭവം ആയിരുന്നോ എന്ന് സംശയിക്കാവുന്ന തരത്തിലുള്ള ചില വിക്രിയകള്‍ ആണ്‌ Joshua Klien പകര്‍ത്തിയത്. ഇന്ന് കേരളത്തിന്റെ സ്വന്തം Sanitation സര്‍‌വീസ് ആയ കാക്കയില്‍ നിന്ന് പലതും പഠിക്കാനുണ്ടെന്ന് തീര്‍ച്ച. ഒപ്പം ശ്രമിച്ചാല്‍ നമുക്ക് ഉപകരിക്കുന്നവ പഠിപ്പിക്കാനും .....

ഗാര്‍‌ബേജ് എക്സ്പോര്‍ട്ടിങ്ങ്

2007-07-28T23:11:00.000-04:00

നാട്ടിലെ മാലിന്യ പ്രശ്നം ഇന്നൊരു വാര്‍ത്ത അല്ലാതായിരിക്കുകയാണല്ലോ? കുറച്ച് മുമ്പൊക്കെ കേള്‍ക്കാറുണ്ടായിരുന്നു, മാലിന്യം നിക്ഷേപിക്കാന്‍ വന്ന വണ്ടി തടഞ്ഞു, തിരിച്ചയച്ചു, സംഘര്‍ഷം എന്നൊക്കെ. ഇതൊക്കെ മുമ്പ് അയല്‍ക്കാര്‍ തമ്മിലുള്ള അല്ലറ ചില്ലറ അടിപിടി കേസുകളില്‍ ഒതുങ്ങിയിരുന്നു. പിന്നെ കുറേയൊക്കെ ലോക്കല്‍ സംഭവങ്ങളും. ഇന്ന് ഇത് ഹൈക്കോടതി ലെവലില്‍ ആണ്‌ ചര്‍ച്ച ചെയ്യപ്പെടുന്നത്.‍

ഫ്ലാഷ്‌ബാക്ക് : കണ്ണൂര്‍ക്കാര്‍ ഇതൊക്കെ കേള്‍ക്കാന്‍ തുടങ്ങിയിട്ട് കാലം കുറേയായി. കണ്ണൂരിലെ കൊയിലി ഹോസ്പിറ്റലും, എ.കെ.ജി ആശുപത്രിയും മത്സരിച്ചായിരുന്നു അന്ന് മാലിന്യം പുറത്ത് ഒഴുക്കി വിട്ടിരുന്നത്. എ.കെ.ജി ഒരു ഘട്ടത്തില്‍ ലീഡ് ചെയ്തപ്പോള്‍ നാട്ടുകാര്‍ ഇടപെട്ടു, പിന്നെ അവിടെ വഴി തടയലും, സംഘര്‍ഷവും... ഒന്നും പറയണ്ട. ഇടത് ഭരിക്കുന്ന ആശുപത്രിക്കെതിരെ വലത് ഭരിക്കുന്ന മുന്‍‌സിപ്പാലിറ്റിയുടെ കുത്തിത്തിരിപ്പ് മാത്രമായിരുന്നു അത്. അല്ലാതെ നാട്ടുകാര്‍ക്ക് പൊതു സ്ഥലങ്ങളില്‍ നിക്ഷേപിക്കുന്ന കാര്യത്തെ പറ്റി ഇടപെടേണ്ട കാര്യം ഇല്ലല്ലോ? പിന്നീട് എ.കെ.ജി ഭരണം എം.വി.രാഘവന്‍ പിടിച്ചടക്കിയതും, 48 മണിക്കൂര്‍ ജില്ലാ ബന്ദും, സ്നേക്ക് പാര്‍ക്കിന്‌ നേരെയുള്ള ആക്രമണവും, രാഘവന്‌ നേരെയുള്ള സമരങ്ങളും, കൂത്തുപറമ്പ് വെടിവെപ്പും ഒക്കെ കേരള രാഷ്ടീയത്തിന്റെ ഭാഗം. ആശുപത്രിക്കാരെയും കുറ്റം പറഞ്ഞിട്ട് കാര്യമില്ല, sewer system, waste management തുടങ്ങിയ സംഭവങ്ങള്‍ ഒന്നും നാട്ടില്‍ ഇല്ലല്ലോ. പിന്നെയുള്ളത് പുഴയില്‍ തള്ളുകയാണ്‌, പക്ഷെ നഗര മദ്ധ്യത്തിലുള്ള ആശുപത്രി എന്ത് ചെയ്യും? അതു കൊണ്ടൊന്നുമല്ലായിരിക്കും, ജനങ്ങളുടെ പാര്‍ട്ടി ജനങ്ങള്‍ക്ക് വേണ്ടി തലശ്ശേരിയില്‍ ആശുപത്രി കെട്ടി പൊക്കിയപ്പോള്‍ അത് കൊടുവള്ളി പുഴക്ക് അരികില്‍ തന്നെയാക്കിയത്. പണ്ട് വെറുതെ കണ്ടല്‍ക്കാട് പിടിച്ച് വേസ്റ്റ് ആയി കിടന്ന സ്ഥലത്ത് ഒന്നുമില്ലെങ്കില്‍ ഇന്ന് ഒരു ആശുപത്രിയുണ്ടല്ലോ!

വിദേശ ലോക്കേഷന്‍ : ഒന്ന് ന്യൂയോര്‍ക്ക് സിറ്റിയെ നോക്കാം. കണ്ണൂര്‍ ജില്ലയുടെ പകുതിയോളം വരുന്ന ഒരു സ്ഥലത്ത്, കേരളത്തിന്റെ 30% ശതമാനത്തോളം വരുന്ന ജനസംഖ്യ ഒരു ദിവസം ഗാര്‍ബേജ് ആയി തള്ളുന്നത് ഏകദേശം 11,600 ടണ്ണാണ്‌. ഇതൊന്നും കുഴിച്ചിടാനോ, കത്തിച്ച് തീര്‍ക്കാനോ പറ്റുന്ന അളവല്ല. അതിന്‌ അവര്‍ കണ്ട വഴിയാണ്‌, garbage exporting. കാശ് അങ്ങോട്ട് കൊടുത്തിട്ടാണ്‌ export നടത്തുന്നത് എന്നൊരു വ്യത്യാസം മാത്രം. ഇവിടെ അടുത്തും അകലെയും ഉള്ള സ്റ്റേറ്റുകളിലെ കൗണ്ടികള്‍ ടണ്ണ് കണക്കിനാണ്‌ വാങ്ങുന്നത്. വെര്‍ജീനിയക്കാരെ... തല്ലല്ലെ, ഇത് കൊണ്ട് അവിടെയുള്ളവര്‍ക്ക് ഗുണങ്ങള്‍ മാത്രമേ ഉണ്ടായിട്ടുള്ളൂ എന്നാണ്‌ കണക്ക്. ഹാര്‍ബര്‍/ഷിപ്പിങ്ങ് സൗകര്യം ഉള്ളതിനാല്‍ ബാര്‍ജ്ജുകളില്‍ കയറ്റി അയക്കുന്നത് ഇവിടെ ഒരു പ്രശ്നം ആകുന്നില്ല, ചിലവും കുറവാണ്‌.

കേരള സര്‍ക്കാര്‍ ഇതേ കുറിച്ച് ശക്..ത..മായി ഒന്ന് ആലോചിക്കട്ടെ, അപ്പോള്‍ വെ..ക്ക്‌..ത..മായ ഒരു ഉത്തരം കിട്ടും. പക്ഷെ നമ്മള്‍ എങ്ങോട്ട് കയറ്റി അയക്കും? ടെണ്ടര്‍ വിളിക്കാതെ, ഉള്ള experience വച്ച് നോക്കാം! നാട്ടിലെ പഴയ സാധനങ്ങളൊക്കെ പെറുക്കി കൊണ്ടുപോയിരുന്നത് തമിഴ്നാട്ടുകാരായിരുന്നു. അതുകൊണ്ട് തത്കാലം ഇതൊക്കെ തമിഴ്‌നാടിനെ ഏല്പ്പിക്കാം, അവരാണല്ലോ മുല്ലപ്പെരിയാറില്‍ നിന്ന് ദിവസേന വെള്ളം ഫ്രീയായിട്ട് കൊണ്ടുപോകുന്നത്, ഒരു ടി.എം.സി വെള്ളത്തിന്‌, അമ്പത് ബാര്‍ജ്ജ് എന്ന കണക്കിനോ മറ്റോ ഇതും കൊടുത്തേക്കാം. പിന്നെ, കൊണ്ടു പോയ ശേഷം അവര്‍ എന്ത് ചെയ്യുന്നു എന്ന കാര്യത്തില്‍ പക്ഷെ നമ്മള്‍ ഇടപെടരുത്. കാവേരി വെള്ളത്തിന്‌ പകരമായി അവര്‍ അത് വേണമെങ്കില്‍ കര്‍‌ണ്ണാടകത്തിന്‌ കൊടുത്തോട്ടെ... നോ പ്രോബ്ലം, അവര്‍ ആയി അവരുടെ പാടായി. ഇതൊരു താത്കാലിക എടപാട് മാത്രം, നമ്മുടെ തുറമുഖങ്ങള്‍ ഒക്കെ ഒന്ന് well established ആയിക്കഴിഞ്ഞാല്‍ പിന്നെ ബംഗ്ലാദേശ്, ഭൂട്ടാന്‍ തുടങ്ങി മലയാളം ബ്ലോഗേര്‍സ് ഇല്ലാത്ത ഏത് വിദേശ രാജ്യങ്ങളിലേക്കും കയറ്റി അയക്കുന്നതിനെ പറ്റി ആലോചിക്കാവുന്നതാണ്‌.

ഇത്രയും വളിപ്പ് അടിച്ചത് എന്തിനാണെന്ന് വച്ചാല്‍, കേരളത്തിനും അത്യാവശ്യമായി ഒരു garbage disposal/recycling system വേണം എന്ന് ഓര്‍മ്മിപ്പിക്കാനാണ്‌. അത് എങ്ങനെയാണെന്നുള്ളതിനെ കുറിച്ച് എല്ലാവരും ആലോചിക്കേണ്ടതാണ്. കാരണം, waste ഉണ്ടാകുന്നത്, നമ്മള്‍ ഓരോരുത്തരുടെയും വീടുകളില്‍ നിന്നാണ്‌. അത് കൊണ്ട് തന്നെ, ഉത്തരവാദിത്വത്തില്‍ നിന്ന് നമ്മള്‍ക്ക് ഒഴിഞ്ഞ് നില്‍ക്കാനാവില്ല. ആളൊഴിഞ്ഞ സ്ഥലം നോക്കി വലിച്ചെറിയുന്ന ഇപ്പോഴത്തെ രീതി മാറണം.

Waste Management -നെ പറ്റി കേരളം സീരിയസ്സായി ആലോചിക്കേണ്ട സമയം ആയിരിക്കുന്നു. രോഗ വിമുക്തമായ ഒരു കേരളം ഉണ്ടാവണമെങ്കില്‍ ഇതൊക്കെ ഇപ്പോഴെങ്കിലും ചെയ്തേ പറ്റൂ. രോഗ നിവാരണത്തിന്‌ ഒരു വര്‍ഷം ചിലവാക്കുന്ന കാശ്‌ പോലും ആകില്ല ഈ പരിപാടി ശരിയായി ചെയ്യുകയാണെങ്കില്‍.

[സ്വാര്‍ത്ഥം: ചീഞ്ഞു നാറുന്ന കൊച്ചി എന്ന ബ്ലോഗുമായി ചേര്‍ത്ത് വായിക്കുക.]

അശ്രദ്ധ ക്ഷണിക്കല്‍

2007-07-26T08:10:00.000-04:00

ഒരു സിനിമ എന്നെ സ്വാധീനിക്കുന്നത് പലപ്പോഴും അത് കാണുന്ന അവസരത്തിലുള്ള മാനസിക അവസ്ഥയെ അനുസരിച്ചാണെന്ന് തോന്നിയിട്ടുണ്ട്. അങ്ങനെ ഒരു അവസരത്തില്‍ കണ്ടത് കൊണ്ടായിരിക്കണം "Its a wonderful life" എന്ന ചിത്രത്തിലെ പല സീനുകളും മനസ്സില്‍ പതിഞ്ഞ് പോയത്. അതിലെ ഒരു രംഗത്തില്‍ നിന്ന്; "every time a bell rings, an angel gets his wings". എവിടെ നിന്നെങ്കിലും ബെല്ല് അടിക്കുന്നതോ, കൊലുസുകള്‍ കിലുങ്ങുന്നതോ, ചില്ലറകള്‍ വീഴുന്നതോ ആയ ശബ്ദം കേള്‍ക്കുമ്പോള്‍ ഞാന്‍ ശ്രദ്ധിക്കാന്‍ തുടങ്ങിയതും ഈ രംഗം മനസ്സില്‍ ഉള്ളത് കൊണ്ടാണ്‌.

ന്യൂയോര്‍ക്ക് സിറ്റിയില്‍‍, പ്രത്യേകിച്ചും ടൂറിസ്റ്റുകള്‍ വന്നിറങ്ങുന്ന സ്ഥലങ്ങളില്‍ കേള്‍ക്കുന്ന ഇത്തരം കിലുക്കങ്ങള്‍ പക്ഷെ പിടിച്ച് പറിക്കാരുടെ ഒരു നമ്പര്‍ ആണെന്ന് ഞാന്‍ പിന്നീടാണ്‌ മനസ്സിലാക്കിയത്. നഗര കാഴ്ചകളില്‍ അമ്പരന്നിരിക്കുന്ന ടുറിസ്റ്റുകള്‍ക്ക് ഒരു നിമിഷത്തെ അശ്രദ്ധ കൊണ്ട് ഉണ്ടാവുന്ന നഷ്ടം വളരെ വലുതാണ്‌. ആദ്യ തവണ ഇത് ശ്രദ്ധിച്ചത്, ഒരു സുഹൃത്തിന്റെ കൂടെ നഗര മദ്ധ്യത്തിലുള്ള ഒരു ഹോട്ടലിന്റെ ലോബിയില്‍ ചെക്കിന്‍ ചെയ്യാന്‍ ലൈനില്‍ നില്‍ക്കുമ്പോള്‍ ആയിരുന്നു. അന്ന് ലൈനില്‍ ഏറ്റവും പുറകിലായി നിന്നിരുന്ന ആളുടെ കൈയ്യില്‍ നിന്നായിരുന്നു ചില്ലറ തുട്ടുകള്‍ താഴെ വീണത്, പക്ഷെ ശരിക്കും കാശ് പോയത് കൗണ്ടറിനോട് ചേര്‍ന്ന് നമ്മുടെ മുന്നിലായി നിന്നിരുന്ന ആളുടെതായിരുന്നു. ഇതൊരു Distraction Burglar-ന്റെ കര വിരുതാണെന്ന് അന്ന് തോന്നിയിരുന്നില്ല. അന്ന് ന്യൂയോര്‍ക്ക് ഇത്രയും പരിചയം ഉള്ള സ്ഥലവും ആയിരുന്നില്ലാതിരുന്നതിന്റെ ഭീതി കൂടിയുണ്ടായിരുന്നു. ഇത് പോലെ പിന്നെയും രണ്ട് സംഭവങ്ങള്‍ ഉണ്ടായപ്പോഴാണ്‌ ഇത് ശ്രമിച്ചാല്‍ ഒഴിവാക്കാന്‍ പറ്റുന്നതാണെന്ന് മനസ്സിലായത്. പക്ഷെ നഗരത്തിന്റെ നിഗൂഢത അറിയാത്ത സന്ദര്‍ശകര്‍ പറ്റിക്കപ്പെടുന്നു.

കൈയ്യൂക്കിന്റെ ബലത്തില്‍ (അംഗ ബലം കൊണ്ടും, ആയുധ ബലം കൊണ്ടും എന്നും പറയാം) പിടിച്ച് പറിക്കുന്നവരെ ഒന്നും ചെയ്യാനാവില്ല. തടി കേടാകും, കാശും പോകും. അതുപോലെ തന്നെ ചില specific items പിടിച്ചു പറിക്കാന്‍ വരുന്നവരെയും. കഴിഞ്ഞ് കുറച്ച് വര്‍ഷങ്ങളായി iPod ആണ്‌ ആ ലിസ്റ്റ് ഭരിക്കുന്നത്, പണ്ട് അത് sneaker shoes ആയിരുന്നു എന്ന് പറഞ്ഞാല്‍ തമാശയായി തോന്നിയേക്കാം.

ഇന്ന് ഞാന്‍ ഒരു സാധാരണ ന്യൂയോര്‍ക്കര്‍ ആണ്‌, മറ്റുള്ളവരുടെ കാര്യങ്ങള്‍ ഞാന്‍ അറിയുകയോ, അറിഞ്ഞതായി ഭാവിക്കുകയോ ചെയ്യാറില്ല. പക്ഷെ ഒരു കാര്യം അറിയാം, "every time a bell rings, somebody is about to lose his wallet".

റേസര്‍-ബ്ലേഡ് മോഡല്‍

2007-07-23T11:11:00.000-04:00

പ്രീമിയം വില കൊടുത്ത് വാങ്ങി പലരും നിത്യേന ഉപയോഗിക്കുന്ന ഒരു സാധനം ആണ്‌ Gillette Mach3 ബ്ലേഡുകള്‍. പ്രീമിയം എന്നത് ആപേക്ഷികം ആയിരിക്കാം, പക്ഷെ എങ്ങനെ നോക്കിയാലും 4 എണ്ണത്തിന്റെ പായ്ക്കറ്റിന്‌ $12-$15 എന്ന വില എനിക്ക് പ്രീമിയം ആയാണ്‌ തോന്നുന്നത്. ജില്ലെറ്റ് കമ്പനിക്ക് കാശ് മുഴുവന്‍ ഉണ്ടാക്കി കൊടുക്കുന്നത് ഈ "ബ്ലേ...യ്‌ഡ്" വില്പ്പന തന്നെയാണ്‌. എത്ര പേരേയാണ്‌ ഓരോ ദിവസവും അറക്കുന്നത്! ആളുകളെ ഇതിലേക്ക് വശീകരിക്കുന്നതിനായാണ്‌ അവര്‍ റേസര്‍† $5.00 താഴെ വിലയ്ക്ക് വില്‍ക്കുന്നത്. ആദ്യ തവണ ഉപയോഗിക്കാനുള്ള ബ്ലേഡും കൂടെ തരുന്നു. ഈ വിപണന തന്ത്രത്തെ "razor and blade business model" എന്ന് വിശേഷിപ്പിക്കപ്പെടുന്നു. ഇതിലും വില കുറഞ്ഞ ബ്രാന്റുകള്‍ ഇല്ലേ, അത് വാങ്ങിയാല്‍ പോരേ എന്ന ചോദ്യങ്ങള്‍ ഉയര്‍ന്നേക്കാം, പക്ഷെ ഒരിക്കല്‍ ഉപയോഗിച്ചവര്‍ക്ക് അതിന്റെ കാര്യം അറിയാം. മറ്റുള്ളവര്‍ കുറഞ്ഞ വിലയ്ക്ക് പാര്‍ട്ടുകള്‍ ഉണ്ടാക്കി വില്‍ക്കാതിരിക്കാന്‍ പേറ്റന്റിന്റെ ബലവും ഉണ്ട്. Mach3 ബ്രാന്റിന്‌ മാത്രമായി ജില്ലെറ്റിന്‌ 50 പേറ്റന്റുകള്‍ ആണുള്ളത്.

മൂന്ന്-നാല്‌ വര്‍ഷം മുമ്പ് ഒരു ഹോളിഡേ സീസണില്‍ എന്റെ സഹമുറിയന്‍ ഒരു ഉഗ്രന്‍ പ്രിന്റര്‍ വാങ്ങിക്കൊണ്ടു വന്നു. തുച്ചമായ വില, only $49.99. തുറന്ന് നോക്കിയപ്പോള്‍ മനസ്സിലായി, പ്രിന്ററിന്റെ മഷി (cartridge) കൂടെയില്ല, അത് വേറെ വാങ്ങണം. മഷി വാങ്ങാന്‍ പോയി വില കേട്ടപ്പോള്‍ ആണ്‌ കണ്ണ് തള്ളിപ്പോയത്, only $99.99. മാര്‍ക്കറ്റില്‍ നോക്കിയാല്‍ ഇത് പോലെ അനേകം സാധനങ്ങള്‍ കാണാം; സെല്‍‌ഫോണ്‍, പ്രിന്ററുകള്‍, ബ്ലഡ് ഷുഗര്‍ ടെസ്റ്റ് മഷീനുകള്‍, വാക്യും ക്ലീനറുകള്‍...

ചെറിയ വിലയ്ക്ക് വില്‍ക്കപ്പെടുന്ന സാധനങ്ങള്‍ മാത്രമല്ല ഇങ്ങനെ ചെയ്യുന്നത്. ഒരു high-end multimedia computer എന്ന് വിശേഷിപ്പിക്കാവുന്ന XBox 360 gaming console മാര്‍ക്കറ്റില്‍ ഇറങ്ങിയപ്പോള്‍ പറഞ്ഞ് കേട്ടിരുന്നു, Microsoft ഒരു കണ്‍സോളിന്മേല്‍ 100 ഡോളറില്‍ കൂടുതല്‍ നഷ്ടം സഹിക്കുന്നുണ്ടെന്ന്. ഇതിനുള്ള games/accessories വില്പനയിലൂടെയാണ്‌ അവര്‍ ഈ നഷ്ടം നികത്തുന്നത്. XBox വാങ്ങുന്നവര്‍ അതിനുള്ള games വാങ്ങാതിരിക്കുമോ? ഇറങ്ങുന്ന സമയത്ത് game ഒരെണ്ണത്തിന്‌ $50 ആയിരുന്നു വില എന്ന് ഓര്‍ക്കുക.

ഇതൊന്നും ഇന്നോ ഇന്നലയോ തുടങ്ങിയ സംഭവം അല്ലെന്നതാണ്‌ വസ്തുത, അതു കൊണ്ട് തന്നെ ഇത് തുടര്‍ന്ന് കൊണ്ടേയിരിക്കും. 1870-ല്‍ John D. Rockefeller ചൈനക്കാര്‍ക്കും മറ്റും സൗജന്യമായി മണ്ണെണ്ണ വിളക്കുകള്‍ നല്‍കിയിരുന്നു പോലും. അദ്ദേഹത്തെ കുറിച്ചുള്ള പുസ്തകത്തില്‍ നിന്നും; "In the 1870s, Standard Oil was providing free kerosene lamps to remote parts of the world, and teaching foreigners to use them, in order to build a global consumer base..."

† Razor in this context is, a variety of miscellaneous parts which help hold the blade in place.

ഓപ്പ്ണ്‍ ഓഫീസ്

2007-07-21T01:31:00.000-04:00

പൊതുജന തത്പരനായ, രാഷ്ട്രീയക്കാരനല്ലാത്ത, കര്‍ക്കശ സ്വഭാവക്കാരനായ ഭരണാധികാരി എന്നതിനേക്കാള്‍ എനിക്ക് ന്യൂയോര്‍ക്ക് സിറ്റി മെയര്‍‌ Michael Bloomberg-നോട് ബഹുമാനം തോന്നിയിരുന്നത് ഒരു career achiever എന്ന നിലയില്‍ ആണ്. അദ്ദേഹത്തെ multi-millionnaire ആക്കാന്‍ സഹായിച്ച Bloomberg എന്ന ഫൈനാന്‍ഷ്യല്‍ ആപ്ലിക്കേഷന്റെ ഉപയോഗത്തെ കുറിച്ച് ഞാന്‍ ഈ അടുത്താണ് ശരിക്കും അറിഞ്ഞ് തുടങ്ങിയത്. മാന്‍‌ഹാട്ടണിലുള്ള അവരുടെ headquarters സന്ദര്‍ശിക്കാന്‍ കുറച്ച് കാലമായി അവസരം കിട്ടിയിട്ടും പോകാതിരുന്നത് സമയക്കുറവ് കൊണ്ടായിരുന്നു. അവസാനം ഇന്ന് ഞാന്‍ ആ കര്‍മ്മം നിര്‍‌വ്വഹിച്ചു. ആയിരത്തില്‍ കൂടുതല്‍ പേര്‍ ജോലി ചെയ്യുന്ന ഈ സ്ഥലത്തെ കാമ്പസ് എന്നാണ്‌ പറയേണ്ടതെങ്കിലും ഒരു ബില്‍ഡിങ്ങില്‍ മാത്രം ഒതുങ്ങി നില്‍ക്കുന്ന ഒരു സ്ഥാപനത്തെ കാമ്പസ് എന്ന് വിശേഷിക്കാമോ എന്നൊരു സംശയം.

സാധാരണയായി വലിയ ഓഫീസുകളില്‍ പോയാല്‍ എന്നെ ആകര്‍ഷിക്കാറുള്ളത് അവിടത്തെ cafeteria ആണ്‌. ഇവിടെ അങ്ങനെ ഒരു സംഭവം ഇല്ലാത്തത് ഒരു ന്യൂനതയാണ്‌. Hightech-ഉം Green Buildings-ഉം ഇവിടെ ഒരു പുതുമ അല്ലാത്തത് കൊണ്ട് അതൊന്നും കണ്ണില്‍ ഉടക്കിയില്ല. ഇതേ കെട്ടിടത്തില്‍ തന്നെയായിരുന്നു bloomberg റേഡിയോയും, ടി.വി. സ്റ്റുഡിയോയും പ്രവര്‍ത്തിക്കുന്നത്.

ഇതിനേക്കാള്‍ ഒക്കെ എനിക്ക് വ്യത്യസ്ഥമായി തോന്നിയത് അവിടത്തെ ഓഫീസ് സെറ്റപ്പ് ആയിരുന്നു. ഇവിടെ മുറികള്‍ എന്ന് പറയാന്‍ ഉള്ളത് ഗ്ലാസ് കൊണ്ടുള്ള conference rooms മാത്രം, അതിനും കര്‍ട്ടനുകളോ, ബ്ലൈന്‍ഡുകളോ ഇല്ല. ആര്‍ക്കും ഓഫീസ് മുറികള്‍ ഇല്ല, വേര്‍ത്തിരിക്കപ്പെട്ട ക്യൂബിക്കളുകളും ഇല്ല. എല്ലാവരും നിരത്തിയിട്ടിരിക്കുന്ന നീളന്‍ മേശകളില്‍ ഘടിപ്പിച്ച workstation-കളില്‍ അവരവരുടെ ജോലി ചെയ്യുന്നു. ഇവിടെ ടീം ലീഡ് ആരെന്നോ, മാനേജര്‍ ആരെന്നോ വിളിച്ചറിയിക്കുന്ന ഒന്നും ഇല്ല... CEO വരേ ഇത് പോലെ മറ്റ് ആളുകളുടെ കൂടെ ഇടപഴകി ജോലി ചെയ്യുന്നു. അവരുടെ ഭാഷയില്‍ പറഞ്ഞാല്‍ "our proud unique and open culture".

ഇന്നലെ പെയ്ത മഴയില്‍ കിളുര്‍ത്ത startup കമ്പനികള്‍ അടിസ്ഥാന യോഗ്യത പോലും ഇല്ലാത്ത executives-നെ തലയില്‍ എടുത്ത് വയ്ക്കുന്ന നാട്ടില്‍ ആണ്‌ ഇത്, അതും ഒരു ഫൈനാഷ്യല്‍ സോഫ്റ്റ്വേര്‍ കമ്പനി.

തേര്‍ഡ് ലോ ഓഫ് പൊളിറ്റിക്സ്

2007-07-19T11:01:00.000-04:00

* For every വിജിലന്‍സ് അന്വേഷണം, there is an equal and opposite വിജിലന്‍സ് അന്വേഷണം.

* For every മാതൃഭൂമി ലേഖനം, there is an equal and opposite ദേശാഭിമാനി ലേഖനം.

* For every ആര്‍.എസ്.എസ് കാരന്‌ വെട്ടേറ്റു, there is an equal and opposite സി.പി.എം കാരന്‌ വെട്ടേറ്റു.

* For every അഴിമതി ആരോപണം, there is an equal and opposite അഴിമതി ആരോപണം.

* For every മാര്‍ക്സിസ്റ്റുകാരന്റെ വീടാക്രമിച്ചു, there is an equal and opposite കോണ്‍ഗ്രസ്സുകാരന്റെ വീടാക്രമിച്ചു.

* For every ദുരിതാശ്വാസ നിധി, there is an equal and opposite ദുരിതാശ്വാസ നിധി.

* For every നടാലില്‍ ബോംബേറ്, there is an equal and opposite എടക്കാട്ട് ബോംബേറ്.

:::::::::::::::::::::::::::::::::::::::::::::::::::::::::::::::::::::::
::::::::::::::::::::::::::::::::::::::::::::::::::::::::::::::::::::::: and more.

കരുക്കള്‍

2007-05-10T11:28:00.000-04:00

വെറുതെ ആലോചിച്ചാല്‍ മനസ്സിലാവും, കേരളത്തിലെ പല പ്രശ്നങ്ങള്‍ക്കും കാരണം നല്ല നടപ്പിന്‌ വിധേയരാവേണ്ട കുറേ മാതാപിതാക്കളും നേതാക്കന്മാരും ആണെന്ന്. മക്കളേയും അണികളേയും തോന്നിയ പോലെ അഴിച്ച് വിട്ട് നാടിന്‌ ഉപദ്രവം ആയി മാറിയ കുറേ ജീവികള്‍. എന്ത് പ്രശ്നം ഉണ്ടാക്കിയാലും രാഷ്ട്രീയ പിന്തുണ ഉണ്ടെങ്കില്‍ ഊരിപ്പോരാം എന്ന തോന്നല്‍ നിയമത്തോടുള്ള വെല്ലുവിളിയാണ്‌. വലിയൊരു പരിതി വരെ അത് തോന്നല്‍ അല്ലാത്തതും പ്രശ്നം ഇരട്ടിപ്പിക്കുന്നു.

ഇടയക്ക് ഒരു അമേരിക്കന്‍ മോഡല്‍ ഷോക്ക് ട്രീറ്റ്മെന്റ് കൊടുത്താല്‍ കുറേയൊക്കെ അസുഖം മാറ്റിയെടുക്കാം. വന്‍ സ്രാവുകളെയും ചെറു മത്സ്യങ്ങളെയും ഒരു പോലെ പേടിപ്പിക്കുന്ന സംഭവങ്ങള്‍ ഇവിടെ ഉണ്ടാവാറുണ്ട്. ഇതിലെ ഏറ്റവും പുതിയ ഇരയാണ്‌ Paris Hilton. സസ്പന്റ് ചെയ്യപ്പെട്ട ലൈസന്‍സ് ഉപയോഗിച്ച് വണ്ടി ഓടിച്ചു എന്നതാണ്‌ കുറ്റം. നിസ്സാര കാര്യം ആയി വായിച്ച് തള്ളേണ്ട ഒരു വാര്‍ത്ത മാത്രം. പക്ഷെ 45 ദിവസം ജയില്‍ ശിക്ഷ ആയതോടെ നാട് അറിഞ്ഞു. ഇവിടെ പാരീസ് ഒരു കരു ആവുക മാത്രമായിരുന്നു. മദ്യപിച്ച് വണ്ടി ഓടിക്കുന്നവര്‍ക്കും, നിയമം ലംഘിക്കുന്നവര്ക്കും ഉള്ള മുന്നറിയിപ്പ്.

രണ്ട് വര്‍ഷം മുമ്പ് ജയിലിലായത് Martha Stewart ആയിരുന്നു. കോടികളുടെ ആസ്തിയുള്ള Martha, നിയമവിരുദ്ധമായ insider trading വഴി $50,000-ന്റെ സ്റ്റോക്ക് വില്പന നടത്തി എന്നതായിരുന്നു കുറ്റം. ഇവര്‍ മാത്രമാണോ ഇത് ചെയ്തത്, അല്ലെങ്കില്‍ ചെയ്യുന്നത് എന്ന് ചോദിച്ചാല്‍....? പക്ഷെ ഇത് കൊമ്പന്മാര്‍ക്കുള്ള ഭീഷണി ആയിരുന്നു. ഇതേ പോലുള്ള ഒരു വാര്‍ത്ത ഇന്നലെ വീണ്ടും വന്നിട്ടുണ്ട്. Dow Jones-നെ പറ്റിയുള്ളത് ആരുടേയോ അതിബുദ്ധി പ്രയോഗമാണ്‌. അമേരിക്കയ്ക്ക് വെളിയില്‍ കളിച്ചാലും കുടുങ്ങും എന്ന് ഇപ്പോള്‍ പലര്‍ക്കും മനസ്സിലായി. അന്വേഷണം നടക്കട്ടേ, ആരാണ്‌ എന്ന് അറിയാം. രണ്ട് വര്‍ഷം മുമ്പ് Michael Jackson തടി രക്ഷിക്കാന്‍ സ്വത്ത് മുഴുവന്‍ കളഞ്ഞ് കുളിച്ചു എന്നാണ്‌ പറയപ്പെടുന്നത്. ഇങ്ങനെ അനുഭവിച്ചവര്‍ വേറേയും, Naomi Campbell, Boy George ...

എല്ലാം നോക്കിക്കൊണ്ടിരിക്കുന്നത് ഇവിടത്തെ Fed മാത്രമല്ല, നമ്മുടെ പോലീസും കൂടിയാണ്‌. പക്ഷെ പ്രവര്‍ത്തിക്കുന്നില്ലെന്ന് മാത്രം.

ക്യൂന്‍ vs. ക്വീന്‍

2007-03-07T22:20:00.000-05:00

മലയാളി ഇംഗ്ലീഷ്‌ പറയുന്നത്‌ പോലെ എന്നൊക്കെ പലര്‍ക്കും തമാശയാക്കാന്‍ മാത്രമായി നമ്മളില്‍ പലരും ആവശ്യത്തില്‍ കൂടുതല്‍ അവസരം കൊടുക്കാറുണ്ട്‌. പലപ്പോഴും അശ്രദ്ധ കൊണ്ടും ചിലപ്പോള്‍ മറ്റുള്ളവര്‍ തിരുത്തി തരുന്നത്‌ അംഗീകരിക്കാത്തത്‌ കൊണ്ടും ആണ്‌. പ്ലീസ്‌, ഇംഗ്ലീഷ്‌ മീഡിയത്തില്‍ പഠിക്കാഞ്ഞത്‌ കൊണ്ടാണെന്ന് മാത്രം പറയരുത്‌.

പക്ഷെ പത്രങ്ങള്‍ എങ്കിലും ഇംഗ്ലീഷ്‌ വാക്കുകള്‍ മലയാളീകരിക്കുമ്പോള്‍ കുറച്ച്‌ കൂടി ശ്രദ്ധിച്ചുകൂടെ എന്ന് പലപ്പോഴും തോന്നാറുണ്ട്‌. Queen എന്ന വാക്ക്‌ ഇന്നത്തെ പത്രത്തില്‍ മാതൃഭൂമിയും, ദീപികയും മലയാളീകരിച്ച്‌ (പലരും ഉപയോഗിക്കുന്നത്‌ പോലെ) ക്യൂന്‍ [qyuun/kyuun] ആക്കി. ഈ കാര്യത്തില്‍ പക്ഷേ മനോരമ എങ്കിലും ശ്രദ്ധിച്ച്‌ എഴുതി, ഭാഗ്യം.

ക്യൂന്‍ എന്ന് പറഞ്ഞാലെ ആളുകള്‍ക്ക്‌ മനസ്സിലാവൂ എന്നോ മറ്റോ ഇവര്‍ വിചാരിച്ച്‌ കാണുമോ? ഇനി അതല്ല, ക്വീന്‍ എന്ന് ഇംഗ്ലീഷിലും, ക്യൂന്‍ എന്ന് മലയാളത്തിലും പറയും എന്നാണെങ്കില്‍, അങ്ങനെ.

In Protest, we unite

2007-03-05T17:24:00.000-05:00

It was more than a month back Yahoo was accused of plagiarism. Along with uniting the bloggers against this, mails were sent to the corporate headquarters to bring to their attention. Though attention was got, there was no action ever since the mails streamed down to Yahoo India. It is really surprising to see how ignorant they have been in this issue. Over the last month lot of drama have been played and unfolded in front of boologam. There have been real attempts to wash their hands off and blaming the vendors. They may be true in that, but why should the end user be worried about it. Yahoo, you are an advantage only till you are clean. Once you are caught red handed you are at the mercy of the victim.

Yahoo!, its time for you to rise and 'shine' (if they can). We dont want you to be the role model for the world ahead. Its time..... not for you in this case of copyrights infringement, but for any corporate or individual, big and small to keep their emotions and ego aside and acknowledge their opposition. Your mistake should not be evaluated by the size of your opposition; and a weak opposition will not nullify your mistake. I can hear the twister just waiting for a touchdown.

ക്ലോസപ്പ് ശ്രമിക്കുന്നത്?

2007-02-27T13:04:00.000-05:00

പ്രസാദിന്റെ ബൈക്ക് ഓടുന്ന പോലുള്ള ചിരി** കേട്ട ശേഷം ആരെങ്കിലും വായ തുറക്കാതെ ചിരിക്കാന്‍ തുടങ്ങിയോ? കുറച്ച് പേരൊക്കെ ഉണ്ടാവാം. കാരണം എല്ലാവരും ക്ലോസപ്പ് കൊണ്ടല്ലല്ലോ പല്ല്‌ തേയ്ക്കുന്നത്. ഇനി ഇതൊന്നും അലോചിക്കാതെ വായ തുറക്കുന്നവരെ... സൂക്ഷിക്കുക! ഇത്ര അസഹനീയമായ പരസ്യം വച്ച് അവര്‍ എന്തായിരിക്കും ഉദ്ദേശിക്കുന്നത്? ഒന്ന് ഊഹിച്ച് നോക്കാം.

ഒരു സാധാരണ ഇന്ത്യന്‍ വീട്ടില്‍ ഒരു ടൂത്ത്പേസ്റ്റ് വാങ്ങുമ്പോള്‍ അത് കുട്ടികള്‍ക്ക് വേറെ മുതിര്‍ന്നവര്‍ക്ക് വേറെ എന്ന ചേരിത്തിരിവൊന്നും ഇല്ലാതെയാണ്‌ (ആയിരുന്നു). ഈ കാരണം കൊണ്ട് വാങ്ങുന്നയാള്‍ക്കും പല്ല്‌ തേക്കുന്ന കുട്ടികള്‍ക്കും ഇതുവരേ നഷ്ടമൊന്നും സംഭവിച്ചിട്ടില്ല. നഷ്ടം HLL പോലുള്ള കമ്പനികള്‍ക്കാണ്‌. ഒരു വീട്ടില്‍ ഒരു പേസ്റ്റ് എന്ന് പറയുന്നത് ഒരു രാജ്യത്തിന്‌ ഒരു മോഡല്‍ കാര്‍ എന്ന് പറയുന്നത് പോലെയാണ്‌. ഇത്തരം കമ്പനികളുടെ മുമ്പില്‍, ഒരു വീട്ടില്‍ ഒന്നില്‍ കൂടുതല്‍ പേസ്റ്റ് വേണോ എന്ന കാര്യത്തിന്‌ പ്രസക്തിയില്ല. സാധനം വാങ്ങിപ്പിക്കുക എന്ന് മാത്രമേ അവര്‍ ഉദ്ദേശിക്കുന്നുള്ളു. വാങ്ങി പെട്ടിയില്‍ വച്ചോ, ടേസ്റ്റ് നോക്കിയ ശേഷം കളഞ്ഞോ, വായ് നാറ്റം അകറ്റിയോ, ദന്തക്ഷയം ചെറുത്തോ എന്നതൊക്കെ വാങ്ങുന്നയാളുടെ കാര്യം...

പക്ഷെ ഇവിടെ ചെറിയ ഒരു വ്യത്യാസം ഉണ്ട്. HLL ഒരു പ്രത്യേക ഗ്രൂപ്പ് ആളുകളെയാണ്‌ ഇവിടെ target ചെയ്യുന്നത്. എളുപ്പം വശീകരിക്കപ്പെടാവുന്ന, കോളേജില്‍ പഠിക്കുന്ന, ബൈക്കും, പഞ്ചാരയും, അടിച്ചുപൊളിക്കലും, ചെത്തി നടക്കലും, കളറും വീക്ക്നെസ്സ് ആയുള്ള ഒരു പ്രായത്തില്‍ ഉള്ളവരേ. ഇന്ത്യന്‍ പട്ടണങ്ങളിലെ, മിഡില്‍ ക്ലാസ്സും, അതിന്‌ തൊട്ട് മുകളില്‍ നില്ക്കുന്നവരുമായ വലിയ ഒരു മാര്‍ക്കറ്റ്. ക്ലോസപ്പ് കൊണ്ട് പല്ല്‌ തേയ്ക്കേണ്ടവര്‍ ഇവര്‍ മാത്രമല്ലല്ലോ? അപ്പോള്‍ പിന്നെ എന്തിന്‌ ഇവര്‍.

ഇതൊരു പരീക്ഷണം മാത്രം ആയിരിക്കാം. കമ്പനി ഒരു പ്രത്യേക ഗ്രൂപ്പ് ആളുകളെ തിരഞ്ഞെടുക്കാന്‍ ശ്രമിക്കുകയാണ്‌ ഇവിടെ. ഇങ്ങനെ ഒരു ഗ്രൂപ്പ് ഇവിടെ ഉണ്ടോ, ഇവരെ കൊണ്ട് വല്ലതും നടക്കുമോ എന്ന്‌ അറിയാന്‍ ഒരു പരീക്ഷണം. ഈ ഗ്രൂപ്പില്‍ ഉള്ളവരെ കൊണ്ട് ഒരു സാധാരണ ഉത്പന്നം പ്രത്യേകമായി വാങ്ങിപ്പിക്കാന്‍ ആണ്‌ കമ്പനി ശ്രമിക്കുന്നത്, അത് വിജയിക്കുമ്പോള്‍ market segmentation നടക്കുന്നു. ഈ segment-ല്‍ ഉള്ളവരേ ഉദ്ദേശിച്ച് പലതും കമ്പനി തീരുമാനിക്കുന്നുണ്ടാവാം. പക്ഷെ, അതിന്‌ മുമ്പ് ഈ ഒരു മാര്‍ക്കറ്റ് ഉണ്ടോ എന്ന് കണ്ട് പിടിക്കണം, അല്ലെങ്കില്‍ കെട്ടി വച്ച കാശ് പോകും.

ചിലപ്പോള്‍ ഇതൊന്നും ആയിരിക്കില്ല, ഈ കാലത്ത് പരസ്യങ്ങള്‍ ശ്രദ്ധിക്കപ്പെടണമെങ്കില്‍ ഇന്നതൊക്കെ വേണം എന്ന് ഉണ്ടാവാം. പക്ഷെ പരസ്യം കാണുന്നവന്റെ ക്ഷമ കൂടി അവര്‍ പരിഗണിക്കണ്ടേ? എന്തായാലും, ഇങ്ങനെ പലതും സാധാരണയായി ലോകത്ത് നടക്കുന്നു. ഇതൊന്നും അറിയാതെ നമ്മള്‍ പേസ്റ്റ് വാങ്ങുന്നു, തേയ്ക്കുന്നു...

** മലയാളം ചാനലുകളില്‍ പ്രത്യക്ഷപ്പെടുന്ന Closeup പരസ്യത്തില്‍ നിന്ന്.

ഒരു അമേരിക്കന്‍ വീരഗാഥ

2007-02-22T14:00:00.000-05:00

അമേരിക്കയിലുള്ളവര്‍ക്ക് Donald Trump-നെ നന്നായി അറിയാം. എന്നും വാര്‍ത്തകളില്‍ നിറഞ്ഞ് നില്ക്കാന്‍ ഇഷ്ടപ്പെടുന്ന ഒരു വ്യക്തിയാണ്‌ ട്രംപ് എന്ന കാര്യത്തില്‍ അഭിപ്രായ വ്യത്യാസം ഉണ്ടാവില്ല. ഇദ്ദേഹം WWE owner, Vince McMahon-മായി WrestleMania 23-ല്‍ ഏറ്റുമുട്ടുന്നു എന്നതാണ്‌ ഏറ്റവും പുതിയ വാര്‍ത്ത. പരാജയപ്പെട്ടാല്‍ തല മൊട്ടയടിക്കും എന്നും കൂട്ടി കേട്ടാല്‍ പത്രങ്ങള്‍ വെറുതെ ഇരിക്കുമോ? പക്ഷെ ഗോദയില്‍ ഇറങ്ങി ഗുസ്തി പിടിക്കാന്‍ ഒന്നും തന്നെ കൊണ്ട് പറ്റില്ലെന്ന് അറിയാവുന്നത് കൊണ്ട് ആളെ ഇറക്കി ഇടിക്കാന്‍ ആണ്‌ ട്രംപിന്റെ പരിപാടി. രണ്ടു പേരും തിരഞ്ഞെടുക്കുന്ന WWE Wrestler-മാര്‍ തമ്മില്‍ ഇടി കൂടി തീരുമാനിക്കും ആരാണ്‌ മുമ്പന്‍ എന്ന്.

ഇത് തന്നെയല്ലേ പണ്ട് വടക്കന്‍ പാട്ടിലെ ചേകവന്മാരും ചെയ്തിരുന്നത്. ജീവിക്കാനുള്ള കാശിന്‌ വേണ്ടി, ഏതോ നാട്ടുരാജാവിന്റെ വീറും വാശിയും തീര്‍ക്കാന്‍‍ പുറപ്പെട്ട് തമ്മില്‍ വെട്ടി മരിച്ചവര്‍. പുത്തൂരം കളരിയിലെ മുറിച്ചുരിക ഇപ്പോഴും വിറയ്ക്കുന്നുണ്ടോ ആവോ?

താങ്ക്യൂ ഫോര്‍ സ്മോക്കിങ്ങ്

2007-02-21T14:45:00.000-05:00

Saif Khan ഒരു ദിവസം പെട്ടെന്നാണ്‌ ആണ്‌ Unsafe Khan ആയത്. അമിത പുകവലിയാണ്‌ കാരണമെന്ന് പറയപ്പെടുന്നു. ഭരത് അവാര്‍ഡ് സംഘടിപ്പിച്ചു കൊടുത്ത അമ്മ ഷര്‍മ്മിള തന്നെ ഇത് പറഞ്ഞത് കൊണ്ട് വിശ്വസിക്കാം. ആരോഗ്യവാനായി തിരിച്ചെത്തുമ്പോള്‍ ഒരു പുകവലി വിരുദ്ധ തരംഗം സൃഷ്ടിക്കാന്‍ മാത്രം കപ്പാസിറ്റി സെയ്ഫിനുണ്ടോ? ഉണ്ടെങ്കില്‍ തന്നെ അതു കൊണ്ട് നേട്ടം ഉണ്ടോ. ഇല്ലെന്നാണ്‌ എന്റെ തോന്നല്‍.

സിഗരറ്റ് കമ്പനികള്‍ ഉന്നം വയ്ക്കുന്നത് മുതിര്‍ന്നവരെയല്ല, കുട്ടികളെയാണ്‌. ഫിലിപ്പ് മോറിസ് കാലങ്ങളായി ചെയ്യുന്നത് അതാണ്‌. അവരുടെ പഴയ ഒരു റിപ്പോര്‍ട്ടില്‍ നിന്ന് എനിക്ക് ഇഷ്ടപ്പെട്ട ചില വരികള്‍ :
"Today’s teenager is tomorrow’s potential regular customer, and the overwhelming majority of smokers first begin to smoke while still in their teens...
...The smoking patterns of teenagers are particularly important to PhilipMorris...”

മുഴുവന്‍ റിപ്പോര്‍ട്ട് ഇവിടെ...
കൂടുതല്‍ വായനയ്ക്ക്...

വെള്ളം... വെള്ളം

2007-02-02T14:18:00.000-05:00

... Ice Mountain, Deer Park, Poland Spring, Arrowhead, Ozarka, Zephyrhills, Calistoga, Montclair, Baraka, Ghadeer, Sohat, Al Manhal, Springs, Schoonspruit, Buxton, Ashbourne, Powwow, Aqua Claudia, Nestlé Aquarel, San Bernardo, Acqua Panna, Nestlé Vera, S. Pellegrino, Lora Recoaro, Tione, Levissima, Pejo, Valvert, Charmoise, Sainte-Alix, Carola, Perrier, Plancöet, Vittel, Hepar, Saint-Lambert, Quezac, Contrex, Abatilles, Rietenauer, Nestlé Wellness, Fürst Bismarck Quelle, Neuselters, Harzer Grauhof Brunnen, Klosterquelle, Korpi, Aqua Spring , Theodora, Pure Life...

ഹൊ! ഇനി കുറച്ച് വെള്ളം കിട്ടുമോ?

Nestle പല രാജ്യങ്ങളില്‍ ഇറക്കുന്ന വെള്ളത്തിന്റെ ബ്രാന്‍ഡുകളില്‍ ചിലത്.

ക്ലോണിങ്ങിന്‌ ഗുഡ്‌ സര്‍ട്ടിഫിക്കറ്റ്‌

2006-12-28T18:13:00.000-05:00

ക്ലോണിങ്ങിലൂടെ ജനിക്കുന്ന ആടുമാടുകളുടെ മാംസവും പാലും ഉപയോഗിക്കുന്നതില്‍ തെറ്റില്ലെന്ന് FDA വിധി എഴുതി. ഇനി പൊതുജന അഭിപ്രായം അറിയേണ്ട കാര്യം കൂടി ഉണ്ട്‌. സാങ്കേതികങ്ങളായ പ്രശ്നങ്ങളെ പറ്റിയുള്ള നിലവിളികള്‍ അപ്പോള്‍ അറിയാം. ബിസിനസ്സിന്റെ ഭാഗത്ത്‌ നിന്ന് നോക്കിയാല്‍ ഇതൊരു വലിയ നേട്ടം ആണ്‌. അത്‌ കൊണ്ട്‌ തന്നെ, ഇങ്ങനെ ഒരു തീരുമാനം ഉണ്ടായതിന്റെ പിന്നില്‍ എത്ര മാത്രം ചരടുവലികള്‍ (ലോബിയിംഗ്‌) നടന്നിട്ടുണ്ടാവാം എന്ന് ഊഹിക്കാവുന്നതേ ഉള്ളൂ.

ഏറ്റവും കൂടുതല്‍ ബീഫ്‌ ഉപയോഗിക്കുന്ന McDonald's പോലുള്ള ബിസിനസ്സുകളെ ഇന്ന് അലട്ടുന്ന പ്രശ്നം അവര്‍ ആവശ്യപ്പെടുന്ന തരം മാംസം പലപ്പോഴും ലഭിക്കുന്നില്ല എന്നതാണ്‌. ക്ലോണിങ്ങിലൂടെ, തങ്ങള്‍ക്ക്‌ താല്‍പര്യമുള്ള ചില പ്രത്യേക ഇനം മാടുകളെ മാത്രം വളര്‍ത്തിയെടുക്കാന്‍ സൌകര്യം ഉണ്ടാവുന്നു. സാധാരണക്കാരേക്കാള്‍ വന്‍കിട വ്യവസായങ്ങള്‍ക്ക്‌ ഗുണകരമായ ഒരു വിധിയാണ്‌ ഇത്‌ എന്നത്‌ ശ്രദ്ധിക്കേണ്ടതാണ്‌. ഭാവിയില്‍ സംഭവിച്ചേക്കാവുന്ന ആരോഗ്യ പ്രശ്നങ്ങള്‍ പൊതുജനങ്ങളില്‍ നിന്ന് ഒളിച്ച്‌ വയ്ക്കപ്പെടുകയില്ലെന്ന് പ്രതീക്ഷിക്കാം. കുത്തുകകളുടെ ലാഭ കഥകള്‍ കേള്‍ക്കാന്‍ അല്ലല്ലോ നമ്മള്‍ക്ക്‌ താല്‍പര്യം?

ഓര്‍ഗാനിക്ക്‌, നാച്ചുറല്‍ തുടങ്ങിയവയിലേക്ക്‌ മടങ്ങി പോകാന്‍ ശ്രമിക്കുന്ന ഇന്നത്തെ ഉപഭോകൃത സമൂഹം ഈ വാര്‍ത്ത എങ്ങനെ സ്വീകരിക്കും എന്നും കണ്ടറിയാം.

കോളിണിങ്ങിലൂടെ ജനിച്ച ഡോളി-യുടെ ജനനത്തെ പറ്റി ഇവിടെ.
കൂടുതല്‍ വായനയ്ക്ക്‌ ചില ലിങ്കുകള്‍ ഇവിടെ, ഇവിടെ.

ക്രിസ്ത്‌മസ് എന്ന ഷോപ്പിങ്ങ് ഫെസ്റ്റിവല്‍

2006-12-26T11:12:00.000-05:00

ഡിസംബര്‍ 25 കഴിഞ്ഞതോടെ അമേരിക്കയിലും ഈ വര്‍ഷത്തെ ക്രിസ്ത്‌മസ് കഴിഞ്ഞു. പക്ഷെ ആഘോഷങ്ങള്‍ കഴിഞ്ഞിട്ടില്ല. ഇത് ഫെസ്റ്റിവല്‍ എന്നതിനേക്കാള്‍ ഉപരി ഒരു ഷോപ്പിങ്ങ് സീസണ്‍ അല്ലേ. ഇത്രയും നാള്‍ സാധനങ്ങള്‍ വാങ്ങാനുള്ള തിരക്കായിരുന്നു. ഇനി തിരിച്ച് കൊടുക്കുവാനും മാറ്റി വാങ്ങുവാനും ഇവരൊക്കെ ഓടി നടക്കും. കഴിഞ്ഞ കുറേ നാളായി വലിയ ഭാണ്ഡങ്ങള്‍ പേറി നടക്കുന്നവരെ കൊണ്ട് വഴിയിലും ട്രെയിനിലും യാത്ര ദുഷ്കരമായിരിക്കുകയാണ്‌.

9:00 മുതല്‍ 9:00 വരെ തുറന്നിരുന്ന കടകള്‍ 5:00 മുതല്‍ 12:00 വരെയും അതിലും വൈകിയും തുറന്ന് പ്രവര്‍ത്തിക്കുന്നു. നവമ്പര്‍ അവസാനം തുടങ്ങിയ ഈ മഹോത്സവം ഈ ആഴ്ചയോടെ കെട്ടടങ്ങും എന്ന് പ്രതീക്ഷിക്കാം. വ്യാപാരികള്‍ അവരുടെ വില്പനയുടെ കണക്കെടുത്തു കഴിഞ്ഞു. ലാഭവും, ലാഭത്തിലുണ്ടായ നഷ്ടവും പ്രഖ്യാപിച്ചു തുടങ്ങി. സാധനങ്ങള്‍ വാങ്ങി കൂട്ടിയവര്‍ അടുത്ത മാസത്തെ ക്രെഡിറ്റ് കാര്‍ഡ് ബില്ല്‌ വരുമ്പോള്‍ വിവരം അറിഞ്ഞു തുടങ്ങും. ഇവിടെ ക്രിസ്ത്‌മസ് ഇങ്ങനെ ഒരു ഷോപ്പിങ്ങ് ചടങ്ങ് ആയി ചുരുങ്ങിപ്പോയത് എങ്ങനെ ആയിരിക്കും?

ക്യാമറ കേരളത്തിലേക്ക് പാന്‍ ചെയ്യാം.
2006-ലെ ഓണക്കാലം. മുമ്പ് ഓണം എന്ന ഉത്സവത്തില്‍ നിന്ന് അകന്ന് ആകെ ഉണ്ടായിരുന്നത്, ഓണം ബമ്പര്‍ എന്ന കേരള സര്‍ക്കാര്‍ ലോട്ടറി മാത്രമായിരുന്നു. കാലം മാറി, ഇന്ന് ഷോപ്പിങ്ങ് ഫെസ്റ്റിവലുകളുടെയും, എക്സ്‌ചേഞ്ച് പോളിസികളുടേയും, മഹാമേളകളുടേയും, 50% ഓഫുകളുടേയും കാലം. വ്യാപരവത്കരിക്കപ്പെടുന്ന ഉത്സവങ്ങളിലെ ഏറ്റവും ഒടുവിലത്തെ ഉദാഹരണം ആയിരിക്കാം ഇത്. ഏത് സംഭവത്തെയും ചടങ്ങ് ആക്കി മാറ്റുന്നതും, ചടങ്ങിനെ സംഭവം ആക്കുന്നതും നമ്മള്‍ ഒക്കെ തന്നെ.

ഹീറോ & zero

2006-09-22T11:42:00.001-04:00

ഇരിക്കുന്ന സ്ഥാനത്തിന്‌ നിരക്കാത്തതായാലും വായില്‍ തോന്നിയത് വിളിച്ചു പറഞ്ഞ് കൈയ്യടിയും സ്വീകരണവും ഏറ്റുവാങ്ങി നടന്ന് പോവുകയാണ്‌ ഹ്യൂഗോ ഷാവേസ്.
മറ്റൊരു ഭാഗത്ത് മുഷാറഫ് കരഞ്ഞിരിക്കുകയാണ്‌. തന്റെ തറവാട് കുഴിച്ച് കുളം തോണ്ടിക്കളയും എന്ന് ഭീഷണിപ്പെടുത്തിയത് കൊണ്ടാണ്‌ താന്‍ അമേരിക്കയുടെ കൂടെ നിന്നതെന്നാണ്‌ ഈ നേതാവിന്റെ വാദം. അഹോ കഷ്ടം.

ഇപ്പോള്‍ കിട്ടിയത്‌:
ഇങ്ങനെ ഒരു സംഭവം ഉണ്ടായിട്ടില്ലെന്നും, എല്ലാം തെറ്റിധാരണയാണെന്നും ഉള്ള വിധം അമേരിക്കന്‍ പ്രസിഡന്റിന്റെ 'റ്റേക്കണ്‍ അബാക്ക്‌' പ്രസ്താവന.

Finally:
* അമേരിക്ക മറ്റ് പല രാജ്യങ്ങളേയും പോലെ പാകിസ്താനേയും ഭീഷണിപ്പെടുത്തിയാണ്‌ കൂടെ നിര്‍ത്തിയത്.
* ഭീഷണിപ്പെടുത്താന്‍ മാത്രം ഉള്ള തെറ്റ് പാകിസ്താന്‍ ചെയ്യുന്നുണ്ടെന്ന് അമേരിക്കയ്ക്ക് അറിയാം.
* തങ്ങളുടെ കൂടെ നില്ക്കുന്നവര്‍ക്ക് എന്ത് തോന്ന്യാസവും ആകാം.
* ഇന്ത്യ കാലങ്ങളായി പാകിസ്താനിനെ പറ്റി അമേരിക്കയെ പഠിപ്പിക്കാന്‍ ശ്രമിക്കുന്നത് ഇനി നിര്‍ത്താം.

ഇന്ത്യയുടെ വാദങ്ങളില്‍ കഴമ്പുണ്ടെന്ന് മറ്റ് രാജ്യങ്ങളെങ്കിലും ഇനി മനസ്സിലാക്കട്ടെ.

കോപ്പിറൈറ്റ്

2006-09-20T15:00:00.000-04:00

പുതിയതായി ഓഫീസില്‍ ജോലി ചെയ്യാന്‍ തുടങ്ങിയ പയ്യന്‍ പരിചയപ്പെടാന്‍ വന്നു. ഹായ് ഹൂയ്, ഏത് ടീമില്‍ ആണ്‌, എപ്പോള്‍ ചേര്‍ന്നു എന്നൊക്കെ കഴിഞ്ഞ ശേഷം അവന്‍ എന്റെ മേശപ്പുറത്തുള്ള ഒരു ആര്‍ട്ടിക്കിള്‍ കാണുകയും ഒരു കോപ്പി തരാമോ എന്നു ചോദിക്കുകയും ചെയ്തു.

ഇറ്റ് ഇസ് എ കോപ്പിറൈറ്റഡ് മെറ്റീരിയല്‍. ഐ ആം നോട്ട് സപ്പോസ്‌ഡ് റ്റു മേക്ക് കോപ്പീസ് ഓഫ് ഇറ്റ് .
എന്നു പറഞ്ഞപ്പോള്‍, പുള്ളി ഓക്കെ പറഞ്ഞ് പിരിഞ്ഞു.

ഞാന്‍ വീണ്ടും ജോലിയില്‍ മുഴുകി. പിന്നെ ഈ ആര്‍ട്ടിക്കിള്‍ കണ്ടപ്പോള്‍ ആണ്‌ ഓര്‍ത്തത്. ഞാന്‍ ആലോചിച്ച് കൊടുത്ത ഒരു മറുപടി ആയിരുന്നില്ല അത്. കോപ്പിറൈറ്റും, individual property rights-ഉം ഒക്കെ ഒരു പരിധി വരെ ഒക്കെ മാത്രം പാലിക്കുന്ന ഒരാളുടെ മനസ്സില്‍ അറിഞ്ഞോ അറിയാതെയോ ഇത്തരം ചിന്ത ഉണ്ടാകുന്നത് നല്ല കാര്യം എന്നു വിചാരിച്ച് ഇരിക്കുന്നു. ഒരു സുഹൃത്താണ്‌ ചോദിച്ചിരുന്നതെങ്കില്‍ ഇങ്ങനെ ഒരു ചിന്ത ഉണ്ടാകുമായിരുന്നോ എന്ന് ഉറപ്പില്ല. പക്ഷെ ഒരുപാട് അടുത്ത സുഹൃത്താണെങ്കില്‍ 'നീ അത് കാശ് കൊടുത്ത് വാങ്ങടേ' എന്ന് പറയാനുള്ള സമയം ആയെന്ന് തോന്നുന്നു. ആക്സസിബിലിറ്റി പ്രശ്നം കൊണ്ടാണ്‌ നമ്മള്‍ പലപ്പോഴും കടുംകൈകള്‍ ചെയ്യുന്നത്. അതല്ലെങ്കില്‍ കൊടുക്കുന്ന വിലയ്ക്ക് ഈ സാധനം ഇല്ലെന്ന തോന്നല്‍ ഉണ്ടാവുമ്പോള്‍. ഒരു പ്രോഡക്റ്റിന്‌ നിര്‍മ്മാതാവിനുള്ള ചെലവിനൊപ്പം അത് കൊണ്ട് കസ്റ്റമറിനുള്ള value addition കൂടി കണക്കിലെടുത്ത് വില ഈടാക്കിയാല്‍ എല്ലാവരും കോപ്പിറൈറ്റുകള്‍ പാലിക്കും എന്ന് തോന്നുന്നു. ആ വകുപ്പില്‍ പെടുന്ന ഒരു സാധനം ആയത് കൊണ്ട് കൂടി ആയിരിക്കാം അങ്ങനെ ഒരു തോന്നല്‍ ഉണ്ടായത്.

സ്‌കൈലാബ്‌ ഓര്‍മ്മകള്‍

2006-08-26T03:08:00.000-04:00

എന്റെ ബാല്യകാലത്ത്‌, ഉണങ്ങിയ ഓലമടലും, കൂമന്‍ കൊത്തിയ തേങ്ങയേയും പോലെ ഏത്‌ നിമിഷവും തലയില്‍ വീണേക്കാം എന്ന് ആലോചിച്ച്‌ പേടിച്ചിരുന്ന് ഒരു സാധനം ആയിരുന്നു സ്‌കൈലാബ്‌. ഇത്‌ എന്താണ്‌ സാധനം എന്ന് അറിയില്ലെങ്കിലും അതെന്തോ ഭീകര സംഭവം ആണെന്ന് ഊഹിക്കാനുള്ള പ്രായം ആയിരുന്നു (ഊഹിക്കാന്‍ വിവരവും, വിദ്യാഭ്യാസവും വേണ്ടല്ലോ). ഇതില്‍ കൂടുതല്‍ എന്ത്‌ വേണം. പിന്നീട്‌ ഇതേ പറ്റി പഠിക്കാന്‍ സ്കൂള്‍ സിലബസ്സില്‍ ഒന്നും ഉണ്ടായിരുന്നില്ല, യുറീക്കയോ മറ്റ്‌ ശാസ്ത്ര പുസ്തകങ്ങള്‍ ഒന്നും വായിക്കാന്‍ കാരണം ഇല്ലാതിരുന്നത്‌ കൊണ്ട്‌, ഇതേ പറ്റി കൂടുതല്‍ ഒന്നും അറിഞ്ഞില്ല. ഇതിനിടയില്‍ എപ്പോഴോ, നമ്മുടെ നാട്ടുകാരെ ഒഴിവാക്കി സ്‌കൈലാബ്‌ എന്ന ആ ഭീകരന്‍ കടലില്‍ വീണു എന്ന സത്യം ഞാന്‍ മനസ്സിലാക്കിയിരുന്നു. പാവം ക്രൂരന്‍, വെറുതെ തെറ്റിദ്ധരിച്ചു. കാലം കടന്നു പോയി, എല്‍.പി സ്കൂളില്‍ വച്ചും, യു.പി സ്കൂളില്‍ വച്ചും ഇതിനെ പറ്റി ചിന്തകള്‍ വീണ്ടും അലട്ടിക്കൊണ്ടിരുന്നു; ആരാണിവന്‍, എങ്ങിനെ ഇരിക്കും തുടങ്ങിയ കാര്യങ്ങള്‍ അപ്പോഴും അന്യമായിരുന്നു, ശ്രമിച്ചില്ല എന്ന് പറയുന്നതായിരിക്കും കൂടുതല്‍ ശരി. മാഷിനോട്‌ ചോദിച്ചാല്‍, ഇനി അത്‌ മണ്ടത്തരമായാല്‍, അതു മതി മാനം പോകാനും, സ്കൂളില്‍ ഇരട്ടപ്പേര്‌ വീഴാനും. പിന്നെ അതിന്റെ ഭാരവും പേറി എത്രയോ വര്‍ഷങ്ങള്‍ ബെഞ്ച്‌ ചൂടാക്കണം എന്നാലോചിച്ചപ്പോള്‍ വേണ്ടെന്ന് വച്ചു.

കാലം കടന്ന് പോയി. വായിക്കാനും പഠിക്കാനും തുടങ്ങിയപ്പോഴേക്കും മിര്‍ സ്റ്റേഷന്‍ പ്രചാരം നേടുകയും, സകല മഹാന്മാരും അങ്ങോട്ടേക്ക്‌ പോകാനും വരാനും തുടങ്ങി. ഇങ്ങനെ ഇരിക്കെയാണ്‌ കുറച്ച്‌ വര്‍ഷങ്ങള്‍ക്ക്‌ മുമ്പ്‌ വാഷിങ്ങ്‌ടണ്‍ ഡി.സി.യിലെ നാഷണല്‍ എയര്‍ ആന്റ്‌ സ്പേസ്‌ മ്യൂസിയമില്‍ കറങ്ങി നടക്കുമ്പോള്‍ നമ്മുടെ ആ പഴയ താരത്തെ കാണുന്നത്‌. നല്ല കുത്തനെ വടി പോലെ നില്‍ക്കുന്നു മുന്നില്‍ ഒരു സ്‌കൈലാബ്‌. ചോദ്യങ്ങളുടെ ഒരു സൂപ്പര്‍ മാര്‍ക്കറ്റില്‍ എത്തിപ്പെട്ടത്‌ പോലെയാണ്‌ അപ്പോള്‍ തോന്നിയത്‌. അന്ന് കടലില്‍ പോയവന്‍ ആരായിരുന്നു? അപ്പോള്‍ ഇവന്‍ ആര്‌? അമേരിക്കയുടെ ഒരു സാധനം എങ്ങനെ ഇന്ത്യന്‍ തീരത്തെത്തി. നമ്മുടെ തലയില്‍ വീണില്ലെങ്കില്‍ ആരുടെ തലയില്‍ വീണു? ഇതാ ഒരു രത്ന ചുരുക്കം.

1. മിര്‍-ന്റെ പൂര്‍വ്വികന്‍ ആയി, ആദ്യത്തെ സ്പേസ്‌ സ്റ്റേഷന്‍ ആയിരുന്നു സ്‌കൈലാബ്‌. ഭൂമിക്ക്‌ മീതെ ശൂന്യാകാശത്തില്‍ ഒരു ഭാരമായി (ഏകദേശം 75 ടണ്‍) 1973 മുതല്‍ 1979 വരെ വസിച്ചു. മുമ്പ്‌ കണക്കാക്കിയിരുന്ന ആയുസ്സായ 8 വയസ്സ്‌ തികയുന്നതിന്‌ മുമ്പേ 1979-ല്‍ അകാല മൃത്യു അടഞ്ഞു.

2. 1973ലും, 74ലും ആയി മൂന്ന് തവണ നടന്ന സന്ദര്‍ശനങ്ങളിലായി 2476 തവണ ഭൂമിക്ക്‌ വലം വച്ചു. 74ല്‍ നടന്ന അവസാന സന്ദര്‍ശനത്തിന്‌ ശേഷം പാര്‍ക്കിംഗ്‌ ഓര്‍ബിറ്റില്‍ അനാധമായി കിടന്നു. ഈ സമയത്ത്‌, മുന്‍പ്‌ ശ്രാസ്ത്രജ്ഞര്‍ ശ്രദ്ധിക്കാതിരുന്ന അന്തരീക്ഷത്തിലെ ചില മാറ്റങ്ങള്‍ ഇതിനെ ബാധിച്ചു. സംരക്ഷണത്തിന്റെ അവസാന ശ്രമം എന്ന നിലയില്‍ ആലോചന നടന്നത്‌ 1979ല്‍ ആയിരുന്നു. അപ്പോള്‍ നിര്‍ത്തിയിരുന്ന ഓര്‍ബിറ്റില്‍ നിന്നും ഉയര്‍ത്തി മാറ്റി സ്ഥാപിക്കാനുള്ള ശ്രമം പിന്നീട്‌ ഉപേക്ഷിക്കുകയായിരുന്നു.

3. സുരക്ഷിതമായി നശിപ്പിക്കാനുള്ള ശ്രമത്തിന്റെ ഭാഗമായി നടത്തിയ കാര്യങ്ങള്‍ വാര്‍ത്ത പ്രാധാന്യം നേടുകയും, പലരും വായിച്ച്‌ പേടിക്കുകയും ചെയ്തു :).

4. ഒടുവില്‍ 1979 ജൂലൈ 11-ാ‍ം തീയ്യതി തലശ്ശേരി തീരത്തെ ഒഴിവാക്കി കൊണ്ട്‌ അങ്ങകലേ പടിഞ്ഞാറേ ആസ്ത്രേയിലയിലെ റോലീന എന്ന ജനസാന്ദ്രത കുറഞ്ഞ ഗ്രാമത്തില്‍ തകര്‍ന്ന് വീണു. അപകടത്തില്‍ 3 പശുക്കള്‍ കൊല്ലപ്പെട്ടു. പരിസര മലിനീകരണത്തിന്‌ അവിടത്തെ അധികാരികള്‍ അമേരിക്കന്‍ ഗവണ്മെന്റിനെതിരെ $400 പിഴ ചുമത്തുകയും ചെയ്തു.

5. ഞാന്‍ കണ്ട സ്‌കൈലാബ്‌? എന്തായാലും ഉണ്ടാക്കുകയല്ലേ, രണ്ടെണ്ണം എക്സ്റ്റ്രാ ഇരിക്കട്ടെ എന്നു കരുതി നിര്‍മ്മിച്ചതില്‍ ഒരെണ്ണം ഡി.സി.യിലും ഒരെണ്ണം ഹൂസ്റ്റണിലും ഉണ്ട്‌.

കൂടുതല്‍ കാര്യങ്ങള്‍ ഇവിടെ, ഇവിടെ, ഇവിടെ.

ബ്ലൂമിങ്ങ്ഡേല്‍സിന്റെ ഫോട്ടോ ഷൂട്ട്‌

2006-08-16T15:23:00.000-04:00

പ്രീമിയം ഔട്ട്‌ലറ്റുകളിലൂടെ വിലകൂടിയ ഹൈ-ഫാഷന്‌ തുണിത്തരങ്ങള്‍ വില്‍പ്പന നടത്തുന്ന ബ്ലൂമിങ്ങ്ഡേല്‍സിന്റെ ഫാഷന്‍ ഫോട്ടോ ഷൂട്ടിന്റെ ഒരു ലൊക്കേഷന്‍ ന്യൂയോര്‍ക്കിലെ ഗണേശ ടെമ്പിള്‍ കൂടിയായിരുന്നു. അലങ്കാര ദീപങ്ങള്‍ക്ക്‌ നടുവില്‍ കയ്യില്‍ കത്തുന്ന മെഴുകുതിരിയും മുഖത്ത്‌ നിറ ചിരിയുമായി പോസ്‌ ചെയ്യുന്ന മോഡലിന്റെ സൗന്ദര്യത്തെ ഒപ്പിയെടുക്കാന്‍ ഇന്നലെ വൈകുന്നേരം ക്യാമറ കണ്ണുകള്‍ ഏറേ തവണ തുറന്നടഞ്ഞു. ദീപാലങ്കാരങ്ങള്‍ക്കൊപ്പം ആര്‍ക്ക്‌ ലൈറ്റില്‍ തിളങ്ങി നിന്ന മോഡലും, ചുവരിലെ നടരാജ വിഗ്രഹവും, ബാക്ക്ഗ്രൗണ്ടില്‍ ഒരുക്കിയ സ്റ്റഫ്ഫ്‌ ചെയ്ത്‌ മയിലും ഫാഷന്‍ മാസികളിലെ താളുകള്‍ ശ്രദ്ധേയമാക്കും.

ജപ്തി ഭീഷണി

2006-08-14T15:27:00.000-04:00

കാലം ശരിയല്ലെന്ന് തോന്നുന്നു. ജപ്തി ഭീഷണി, കിടപ്പാടം നഷ്ടപ്പെടല്‍ തുടങ്ങിയവയൊക്കെ നേരിടുന്നത്‌ പാവപ്പെട്ടവരും കര്‍ഷകരും മാത്രമല്ലെന്ന് തോന്നുന്നു. സൗരയൂഥത്തിലെ ഒന്‍പതംഗ ലിസ്റ്റില്‍ നിന്ന് പുറത്താക്കല്‍ ഭീഷണി നേരിട്ട്‌ ഇരിക്കുകയാണ്‌ പ്ലൂട്ടോ. സൂര്യനെ ചുറ്റിപറ്റി ജീവിക്കുന്ന ഗ്രഹങ്ങളുടെ പേരുകള്‍ ചൊല്ലി പഠിച്ചവരും പാടി പറഞ്ഞവരും ഇനി ഒന്നു വിഷമിക്കും.

അന്തിമ തീരുമാനം അറിയാന്‍ കുറച്ച്‌ ദിവസം പിടിക്കും. ഇന്ന് ആരംഭിച്ച്‌ ആഗസ്റ്റ്‌ 25 വരെ നീളുന്ന International Astronomical Union-ന്റെ സമ്മേളനത്തിലെ മുഖ്യ വിഷയം ഇതായിരിക്കും. 75 ഓളം രാജ്യങ്ങളില്‍ നിന്നുള്ള ശാസ്ത്രജ്ഞര്‍ സമ്മേളനം തുടങ്ങുന്നതിന്‌ മുമ്പ്‌ തന്നെ പ്ലൂട്ടോയെ സൗരയൂഥത്തില്‍ നിന്ന്‌ പുറത്താക്കുന്നതിനെ അനുകൂലിച്ചും പ്രതികൂലിച്ചും ചേരികളില്‍ ആണ്‌. പുതിയ കണ്ടുപിടുത്തങ്ങള്‍ ഉണ്ടാവുന്ന ഈ അവസരത്തില്‍ ഒരു ഗ്രഹത്തെ എങ്ങനെ നിര്‍വചിക്കാം എന്ന ചര്‍ച്ചായിരിക്കും ഏറ്റവും സംസാര വിഷയമാവുക. അടുത്ത കുറച്ച്‌ ദിവസങ്ങളില്‍ ഇതേ കുറിച്ച്‌ വരുന്ന വാര്‍ത്തകള്‍ക്കായി കാത്തിരിക്കാം.

വിഭാഗം:ശാസ്ത്രം

ജനാധിപത്യത്തിന്‌ പുതിയ മാര്‍ക്കറ്റ്‌

2006-08-03T14:20:00.000-04:00

കാള പെറ്റെന്ന് കേള്‍ക്കുമ്പോള്‍ കയര്‍ എടുക്കുന്ന ടീംസിന്‌ ഇനി നിദ്രാ വിഹീനങ്ങളായ രാത്രികള്‍ ആയിരിക്കും. പത്ത്‌ നാല്‍പ്പത്‌ കൊല്ലം കുത്തിത്തിരിപ്പ്‌ നടത്തിയിട്ടും ഒതുങ്ങാത്ത ഫിദേല്‍ രോഗക്കിടക്കയില്‍ ലോക പോലീസിന്റെ മുമ്പില്‍ മുട്ട്‌ മടക്കുമായിരിക്കും. ധവള മാളികയിലെ ബുദ്ധി രാക്ഷസന്മാര്‍ രാഷ്ട്രീയ കുബുദ്ധി ഉപയോഗിക്കുന്നുണ്ടാവും, എങ്ങിനെ ക്യൂബയില്‍ ജനാധിപത്യം ഉറപ്പിക്കാം എന്ന്. പക്ഷെ അടുത്ത കാലത്തായി അടിച്ചേല്‍പ്പിക്കാന്‍ ശ്രമിച്ചടുത്ത്‌ നിന്നെല്ലാം പരാജയത്തിന്റെ മാംസ ഗന്ധം ഉയരുന്നത്‌ പോലെ ഇവിടെ ഉണ്ടാവാതിരിക്കട്ടെ. ഈ പ്രാവശ്യമെങ്കിലും പാവങ്ങളും നിരപരാധികളും ബലിയാടുകള്‍ ആവാതിരിക്കട്ടെ.

ഇനി അങ്ങിനെ ഒന്നും സംഭവിക്കില്ലെന്നും, ഇതെല്ലാം എന്റെ hallucinations മാത്രമാണെന്നും കാലം തെളിയിക്കട്ടെ.

13/15 Mal സബ്‌ടൈറ്റില്‍

2006-07-25T21:50:00.000-04:00

നിലവാരം കുറഞ്ഞ ചിത്രങ്ങള്‍ കണ്ട്‌ മനം മടുത്തത്‌ കൊണ്ടും, Time is Money പോളിസി ഇമ്പ്ലിമന്റ്‌ ചെയ്തതു കൊണ്ടും കുറച്ച്‌ കാലമായി ഹിന്ദി സിനിമകള്‍ കാണാറില്ല. ഒരു പാട്‌ പേര്‍ ചേര്‍ന്ന് ഊതി വീര്‍പ്പിച്ച Rang De Basanti കാണാന്‍ പോയിരുന്നു ഇതിന്റെ ഇടയില്‍. പക്ഷെ അത്‌ കാറ്റഴിച്ച്‌ വിട്ട ബലൂണ്‍ പോലെ ആയി പോയി.

ഒരു ഹിറ്റ്‌ ഗാനം കേട്ട്‌ ഇഷ്ടപ്പെട്ടത്‌ കൊണ്ടാണ്‌ ഓസിന്‌ ഡി.വി.ഡി കിട്ടിയപ്പോള്‍ Bluffmaster കുറച്ച്‌ നേരം കാണാം എന്ന് വിചാരിച്ചത്‌. സബ്‌ടൈറ്റില്‍ ബട്ടണ്‍ അടിച്ചപ്പോള്‍ ആണ്‌ ഞെട്ടിയത്‌, പതിനഞ്ച്‌ ഭാഷകള്‍, അതില്‍ 13/15 Mal നമ്മുടെ സ്വന്തം മലയാളം. തര്‍ജ്ജമയുടെ നിലവാരം അറിയാന്‍ ഇനി ഒന്ന് കാണണം. എന്റെ ഇതിന്‌ മുമ്പത്തെ സബ്‌ടൈറ്റില്‍ പരീക്ഷണം വന്‍ ഹിറ്റ്‌ ആയിരുന്നു. അത്‌ സൂപ്പര്‍ ഹിറ്റ്‌ തമിഴ്‌ ചിത്രം, ശങ്കറിന്റെ 'അന്യന്‍'. മഹാ കത്തി, നിര്‍ത്തിയേക്കാം എന്ന് വിചാരിച്ച സിനിമ ആദ്യം മുതല്‍ ഇട്ട്‌ കാണാന്‍ തീരുമാനിച്ചതിനുള്ള ഫുള്‍ ക്രെഡിറ്റ്‌ സബ്‌ടൈറ്റിലിന്‌ മാത്രം. അതു വരേ ഹൈടെക്ക്‌ ആക്ഷന്‍ ചിത്രം എന്ന് തോന്നിയ സിനിമ പെട്ടെന്ന് കോമഡി ചിത്രം ആയി.
ഒരു ഉദാഹരണം ഇതാ:
... കപ്പുച്ചിനോ കോഫിയാ.. സോഫീയാ... എന്ന് പാടിയത്‌ ഇംഗ്ലീഷില്‍ ആയപ്പോള്‍
... are you a cup of chinese coffee... എന്ന് ആയി. കപ്പുച്ചീനോ എന്ന വാക്ക്‌ തമിഴന്‍ അറുത്ത്‌ മുറിച്ച്‌, കപ്പും, ചൈനയും, കോഫിയും വെവ്വേറെ ആക്കി ഇംഗ്ലീഷില്‍ കെറ്റിലില്‍ ഇട്ട്‌ ചൂടാക്കി കപ്പില്‍ ഒഴിച്ച്‌ തന്നു. ഞങ്ങള്‍ കുറച്ച്‌ പേര്‍ ഊതി കുടിച്ചു, ചിരിച്ച്‌ രസിച്ചു. അവനെ കൊണ്ട്‌ ആവുന്നത്‌ അവന്‍ ചെയ്തു. ഇതു പോലെ കുറെ അമിട്ടുകള്‍ മലയാളത്തിലും എഴുതി പിടിപ്പിച്ചിട്ടുണ്ടാവുമെന്നാണ്‌ എന്റെ പ്രതീക്ഷ. ഒരു സ്നാപ്‌ ഷോട്ട്‌ ഇടുന്നു, അതില്‍ നിന്നെ തന്നെ കൈവച്ച ആളുടെ നിലവാരം അറിയാം. പാവം മലയാള ഭാഷ, ഇനിയും എന്തെല്ലാം കാണാന്‍ ഇരിക്കുന്നു.

കണ്ണടച്ച്‌ ഇരുട്ടാക്കല്‍

2006-07-10T15:43:00.000-04:00

ഇന്നലെ ജൂലൈ 09 ഞായറാഴ്ച, മാതൃഭൂമിയില്‍ വന്ന ഒരു ആത്മഹത്യാ വാര്‍ത്തയാണ്‌ ഈ കുറിപ്പിനാധാരം.

ഈ മരണത്തിന്‌ ആരാണ്‌ ഉത്തരവാദി? ഒരുപാടൊന്നും ആലോചിക്കേണ്ടി വന്നില്ലല്ലോ, അല്ലേ? സമൂഹം, ഞാനും നിങ്ങളും അടങ്ങുന്ന വിദ്യാസമ്പന്നരായ സാംസ്കാരിക കേരളം എന്നവകാശപ്പെടുന്ന ക്രൂരരായ സാഡിസ്റ്റുകളുടെ ലോകം. കുറച്ച്‌ ദിവസം മുമ്പ്‌ കര്‍ഷകരുടെ ആത്മഹത്യയെ പറ്റി നടന്ന ചര്‍ച്ചയില്‍ ഞാന്‍ രേഖപ്പെടുത്തിയ കമന്റിന്റെ പ്രസക്ത ഭാഗം ചുവടെ.

2003-ലെ കണക്ക്‌ പ്രകാരം ഒരു ദിവസം 32 പേര്‍ കേരളത്തില്‍ ആത്മഹത്യ ചെയ്യുന്നു.

നമ്മള്‍ ജീവിക്കുന്ന സമൂഹത്തിനാണ്‌ ചികിത്സ വേണ്ടത്‌. സാഡിസ്റ്റുകളായ നാട്ടുകാരും സമൂഹവുമാണ്‌ നടുക്കടലില്‍ ഒറ്റപ്പെട്ട്‌ പോയ ഒരു കര്‍ഷകനെയും മറ്റ്‌ പലരേയും ആത്മഹത്യയിലേക്ക്‌ നയിക്കുന്നത്‌. കര്‍ഷകരല്ലാത്ത എത്രയോ പേര്‍ കേരളത്തില്‍ ഇങ്ങനേ മരണപ്പെടുന്നു. അവയുടെയൊക്കെ പിന്നില്‍ ഇതു പോലെ പീഡനങ്ങള്‍ ഏല്‍പ്പിച്ച മുറിവുകള്‍ കണ്ടേക്കാം. സ്വന്തം വീട്ടിലേ കാര്യത്തേക്കാള്‍ മറ്റുള്ളവരുടെ കാര്യങ്ങള്‍ അറിയാനുള്ള അതീവ താല്‍പര്യത്തില്‍ തുടങ്ങുന്നു ഈ പ്രശ്നങ്ങള്‍. കാര്‍ഷിക കടങ്ങള്‍ ആയിരിക്കാം ഒരു കര്‍ഷകനേ ഇങ്ങനേ ഒരു സാഹചര്യത്തില്‍ എത്തിച്ചതെങ്കിലും ബാക്കി പല instances-ലും മറ്റ്‌ വിധത്തിലുള്ള മാനസിക പീഡനങ്ങളും ആവും ഒരാളേ ഇതിലേക്ക്‌ നയിക്കുന്നത്‌. സാമ്പത്തിക പരാദീനതകളില്‍ നട്ടം തിരിയുന്ന ഒരാള്‍ക്ക്‌ ആ സന്ദര്‍ഭത്തില്‍ വേണ്ട confidence ഇല്ലാതാക്കുന്ന പ്രവര്‍ത്തികള്‍ ചുറ്റുമുള്ള രക്തദാഹികളായ സാഡിസ്റ്റുകള്‍ ചെയ്യുന്നു. തന്റെ കഴിവിലുള്ള വിശ്വാസക്കുറവും കൂടി ആവുമ്പോള്‍ ഇതു തന്നെ ഏറ്റവും നല്ല രക്ഷാ മാര്‍ഗ്ഗം എന്ന് തീരുമാനിക്കുന്നു. നമ്മളെല്ലാവരും ഭീരുക്കള്‍ ആണ്‌, സുഹൃത്തുക്കള്‍/അയല്‍ക്കാര്‍/ഭാര്യ-ഭര്‍ത്തൃവീട്ടുകാര്‍/നാട്ടുകാര്‍ തുടങ്ങി എന്തിനെയും ഏതിനേയും ഭയന്ന് ജീവിക്കുന്ന ദുരഭിമാനികളായ ദുര്‍ബല ഹൃദയരായ കേരളീയ ജനതയ്ക്ക്‌ വേണ്ടത്‌ awareness ആണ്‌. ഇത്‌ എവിടേ തുടങ്ങണം എന്ന് എനിക്കറിയില്ല. ചിലപ്പോള്‍ എന്റെ മനസ്സില്‍ തന്നെ ആയിരിക്കണം, കാരണം ഞാനും ആ നശിച്ച ചിന്താഗതിയുള്ള സമൂഹത്തിന്റെ ഭാഗമാണ്‌, റേഷന്‍ കാര്‍ഡിലെങ്കിലും.

ഇവിടെ കുറ്റക്കാര്‍ ആരാവും? മനസ്സുറപ്പില്ലാത്ത ആ പെണ്‍കുട്ടിയോ, അവളെ സഹായിച്ച ആ വിദേശിയോ, ചോദ്യം ചെയ്യല്‍ എന്ന പേരില്‍ പോലീസുകാര്‍ കാട്ടിക്കൂട്ടിയതോ, അപവാദ പ്രചാരത്തിലൂടെ മാനസിക സുഖം നേടിയ നാട്ടുകാരോ?

ഇത്തരം സംഭവങ്ങള്‍ ഒന്നും നാടിനെ നടുക്കുന്ന കഥകള്‍ അല്ലാത്തതിനാല്‍ വാര്‍ത്താ പ്രാധാന്യം നേടാതെ വിസ്മൃതിയിലേക്ക്‌ മറയുന്നു. മരണം പോലും ആഘോഷം ആയി കൊണ്ടാടുന്നവര്‍ എന്തറിയുന്നു? രോഗ ലക്ഷണത്തെ മാത്രം ചികിത്സിച്ച്‌ ശീലിച്ച നമ്മള്‍ക്ക്‌ എങ്ങനെ രോഗത്തെ ഇല്ലാതാക്കാന്‍ പറ്റും. മോശം കാര്യങ്ങളെ തിരിച്ചറിയുകയും തെറ്റുകള്‍ക്കെതിരെ പ്രതികരിക്കുകയും ചെയ്തിരുന്ന കുറെ സാമൂഹ്യ സാംസ്കാരിക നേതാക്കള്‍ കേരളത്തില്‍ ഉണ്ടായിരുന്നു. ഈ കാലഘട്ടത്തിലുള്ളവര്‍ രാഷ്ട്രീയക്കാരുടെ അടിയാളുകളും ചട്ടുകങ്ങളും ആയപ്പോള്‍ സാധാരണക്കാര്‍ക്ക്‌ നഷ്ടപ്പെട്ടത്‌ അവര്‍ക്ക്‌ വഴികാട്ടി ആകേണ്ട നായകരെയാണ്‌.

ഓരോരുത്തരും കണ്ണടച്ചിരിക്കും, തന്നെ ബാധിക്കും വരേ. എന്ത്‌ ചെയ്യാം, അങ്ങനെ ശീലിച്ചു പോയി.

വിഭാഗം:സാമൂഹ്യം

ആര്‍സെലറിലേക്കുള്ള മിത്തലിന്റെ യാത്ര

2006-06-29T21:50:00.000-04:00

ആറ്‌ മാസത്തെ നാടകീയ രംഗങ്ങള്‍ക്ക്‌ ശേഷം നെതര്‍ലാന്‍ഡ്‌ ആസ്ഥാനമായ മിത്തല്‍ സ്റ്റീല്‍ കമ്പനിയും, ലക്സംബര്‍ഗ്ഗ്‌ ആസ്ഥാനമായ ആര്‍സെലറും ലയിക്കാന്‍ തീരുമാനിച്ചു. അടുത്ത്‌ തന്നെ ചേരുന്ന ഓഹരി ഉടമകളുടെ യോഗം വോട്ടിങ്ങിലൂടെ തീരുമാനം അംഗീകരിക്കുന്നതോടെ ഇത്‌ പ്രാബല്യത്തില്‍ വരും.

അവസാനം നിമിഷം വരെ മത്സരത്തില്‍ ഉണ്ടായിരുന്നു സെവറെസ്റ്റലിന്റെ മോര്‍ഡഷോവ്‌ ഇനിയും പ്രതീക്ഷ കൈവിട്ടിട്ടില്ല. ഈ ലയനത്തോടെ ലോകത്തിലെ ഉത്പാതിക്കപ്പെടുന്ന സ്റ്റീലില്‍ പത്ത്‌ ശതമാനം ലക്ഷ്മി മിത്തല്‍ നേതൃത്വം നല്‍കുന്ന മിത്തല്‍ സ്റ്റീല്‍ കമ്പനി നിര്‍മ്മിക്കും. തൊട്ടടുത്ത എതിരാളിയായ നിപ്പോണ്‍ സ്റ്റീല്‍ കേവലം മൂന്ന് ശതമാനം ആണ്‌ ഉണ്ടാക്കുന്നത്‌. ആര്‍സെലര്‍-മിത്തല്‍ എന്ന പേരില്‍ അറിയപ്പെടുന്ന പുതിയ കമ്പനി 27 രാജ്യങ്ങളില്‍ പടര്‍ന്ന് കിടക്കുന്ന തങ്ങളുടെ 60 പ്ലാന്റുകളില്‍ നിന്നായി പ്രതിവര്‍ഷം 100 മില്ല്യണ്‍ ടണ്‍ സ്റ്റീല്‍ ഉത്പാതിപ്പിക്കും എന്ന് അവകാശപ്പെടുന്നു. യു.എസ്‌.എ-യും കാനഡയും ചേര്‍ന്ന് ഒരു വര്‍ഷം ഇത്രയും സ്റ്റീല്‍ ഉത്പ്പാതിപ്പിക്കുന്നില്ല എന്ന് കൂടി ഈ അവസരത്തില്‍ ഓര്‍മ്മിക്കുക.

മിത്തലിന്റെ വളര്‍ച്ച പല ചെറിയ കമ്പനികളുടെയും ലയനത്തിലേക്ക്‌ നയിക്കും എന്ന് വിശ്വസിക്കപ്പെടുന്നു. നുകോര്‍ സ്റ്റീലും, യു.എസ്‌.സ്റ്റീലും തമ്മിലുള്ള ലയന ചര്‍ച്ച തുടങ്ങിയത്‌ ഇതിന്റെ സൂചനയാണെന്ന് കരുതുന്നു. യൂറോപ്പിലും ഇതുപോലെ രഹസ്യ ചര്‍ച്ചകള്‍ അരങ്ങേറുന്നു. ബിസിനസ്സ്‌ ലോകം ഉറ്റ്‌ നോക്കിയിരുന്ന ഒരു ലയനം ആയിരുന്നു മിത്തല്‍ സ്റ്റീലും ആര്‍സെലറും തമ്മിലുണ്ടായത്‌. ഈ അടുത്ത കാലത്ത്ത്‌ ഉണ്ടായത്തില്‍ ഏറ്റവും കൂടുതല്‍ ചര്‍ച്ച ചെയ്യപ്പെട്ട ലയനം ആണെന്ന് പറഞ്ഞാല്‍ അതിശയോക്തി ആവില്ല.

ലക്സംബര്‍ഗ്ഗ്‌ ആസ്ഥാനമായ ആര്‍സെലര്‍ കനേഡിയന്‍ കമ്പനിയായ ഡൊഫാസ്കോയെ വാങ്ങിച്ച്‌ ദിവസങ്ങള്‍ക്കുള്ളില്‍ 2006 ജനുവരി 27-ന്‌ ആയിരുന്നു മിത്തല്‍, തങ്ങളുടെ താല്‍പര്യം ആര്‍സെലര്‍ ചീഫ്‌ എക്സിക്ക്യൂട്ടിവായ ഗൈ ഡോള്ളെയെ അറിയിക്കുന്നത്‌. വിറ്റുവരവില്‍ ഏറ്റവും വലിയ കമ്പനിയായ ആര്‍സെലറിനെ വാങ്ങാന്‍ മാത്രം ഏറ്റവും കൂടുതല്‍ സ്റ്റീല്‍ ഉത്പാതിപ്പിക്കുന്ന കമ്പനി ആയിട്ടില്ല എന്നായിരുന്നു ആര്‍സെലറിന്റെ നിലപാട്‌ (യൂറോയില്‍ വില്‍ക്കുന്നതിന്റെ വ്യത്യാസം). വിട്ടുകൊടുക്കാന്‍ മിത്തലും തയാറായിരുന്നില്ല. പിന്തുണ അഭ്യര്‍ഥനയുമായി മിത്തല്‍ ഫ്രഞ്ച്‌ ധനകാര്യ മന്ത്രാലയം, ലക്സംബര്‍ഗ്ഗ്‌ പ്രധാനമന്ത്രി, സ്പാനിഷ്‌ ഉദ്യോഗസ്ഥര്‍, യൂറോപ്യന്‍ യൂണിയന്‍ ആന്റി-ട്രസ്റ്റ്‌ കമ്മീഷണര്‍ തുടങ്ങിയവരേ സമീപിച്ചെങ്കിലും നിരാശ ആയിരുന്നു ഫലം. മിത്തല്‍ സ്റ്റീലിന്റെ $23 ബില്ല്യണ്‍ന്റെ ഓഫര്‍ മറികടന്ന് ആര്‍സെലര്‍, 'OAO Severstal' എന്ന റഷ്യന്‍ കമ്പനിക്ക്‌ കരാര്‍ ഉറപ്പിക്കാന്‍ നടത്തിയ ശ്രമം വിജയിക്കാന്‍ പൊകുന്ന എന്ന അവസ്ഥയില്‍ ആയിരുന്നു ലക്സംബര്‍ഗ്ഗ്‌ ഫിനാന്‍ഷ്യല്‍ മാര്‍ക്കറ്റ്‌ റെഗുലേറ്റര്‍ ഇടപെട്ടത്‌. നിയമലങ്കനം നടക്കുന്നില്ല എന്ന് ഉറപ്പുണ്ടെങ്കില്‍ മാത്രമേ ഇങ്ങനെ ഒരു സംരംഭവുമായി മുന്നോട്ടു പോകാവൂ എന്ന ഇവരുടെ ഉത്തരവാണ്‌ ആര്‍സെലറിനെ തിരിച്ച്‌ മിത്തലിലേക്ക്‌ എത്തിച്ചത്‌. മിത്തല്‍ ഇതിനിടയില്‍ തങ്ങളുടെ ഓഫര്‍ ഉയര്‍ത്താന്‍ തയാര്‍ ആണെന്നും ഓഹര്‍ ഉടമകളുമായി ചര്‍ച്ച ചെയ്യാന്‍ സൌകര്യം ഒരുക്കി തരണം എന്നും ആര്‍സെലറിനോട്‌ ആവശ്യപ്പെട്ടിരുന്നു. ഒടുവില്‍ ജൂണ്‍ 25-നെ ആര്‍സെലറിന്റെ ഓഹരി ഉടമകള്‍ മിത്തലുമായുള്ള ലയനത്തിന്‌ സമ്മതം മൂളി, $33.65 ബില്ല്യണ്‍ എന്ന സംഖ്യക്ക്‌. പക്ഷേ ഇത്‌ കരാറായി വരാന്‍ ഇനിയും ദിവസങ്ങള്‍ ബാക്കി ഉണ്ട്‌.

കൈപ്പിടിയില്‍ ഒതുങ്ങി എന്ന് കരുതിയ ഓഫര്‍ നഷ്ടപ്പെട്ടതില്‍ വിലപിക്കുകയാണ്‌ സെവറെസ്റ്റലിന്റെ ചീഫ്‌ എക്സിക്യൂട്ടിവ്‌ മോര്‍ഡഷോവ്‌. യൂറോപ്യന്‍ യൂണിയന്റെ ഗൂഡാലോചയും റഷ്യന്‍ വിരുദ്ധ മനോഭാവവുമാണ്‌ ഇങ്ങനെ സംഭവിക്കാന്‍ ഉണ്ടായതെന്ന് അദ്ദേഹം ആരോപിക്കുന്നു. മിത്തലിന്റെ ഓഫറിനോട്‌ യോചിക്കാന്‍ പറ്റില്ലെങ്കിലും, തങ്ങളും മുമ്പ്‌ പറഞ്ഞ വിലയില്‍ വര്‍ധന വരുത്താന്‍ തയാറാണെന്ന് സെവര്‍സ്റ്റെല്‍ പ്രഖ്യാപിച്ചു. ആര്‍സെലറിന്റെ അമ്പത്‌ ശതമാനത്തില്‍ കൂടുതല്‍ ഓഹരി ഉടമകളെ കൂടെ നിര്‍ത്തി വോട്ടിങ്ങ്‌ തങ്ങള്‍ക്ക്‌ അനുകൂലമാക്കാന്‍ തനിക്ക്‌ കഴിയുമെന്നും മോര്‍ഡഷോവ്‌ അവകാശപ്പെടുന്നു. ബിസിനസ്സ്‌ ലോകം അല്ലേ, കാലിനടിയില്‍ നിന്ന് മണ്ണൊലിച്ച്‌ പോകുന്നത്‌ അറിയാന്‍ കുറച്ച്‌ സമയം എടുത്തു. ആരൊക്കെ എന്തൊക്കെ പറഞ്ഞാലും ലക്ഷ്മി മിത്തല്‍ ആണ്‌ ഇന്ന് ഉറച്ച മണ്ണില്‍ നില്‍ക്കുന്നത്‌. വരും നാളുകളില്‍ മിത്തല്‍ കുടുംബത്തിന്റെ പേര്‌ നമ്മുടെ മുന്നില്‍ മിന്നി മറയുമ്പോള്‍ ഈ കാര്യങ്ങളൊക്കെ ഓര്‍ക്കാം.

വിഭാഗം:ബിസിനസ്സ്‌

ഇന്റലിജന്റ്‌ ഷോപ്പിംഗ്‌ കാര്‍ട്ട്‌

2006-06-16T23:42:00.000-04:00

ഹോംലെസ്സ്‌, അധവാ തെരുവില്‍ ജീവിക്കുന്നവര്‍ ഇവിടെ തങ്ങളുടെ ഹമ്മറും, കാമ്രിയും, അക്കോര്‍ഡും ആയി ഉപയോഗിച്ച്‌ വരുന്നത്‌ ഹോംഡിപ്പോയുടെയും, ടാര്‍ഗറ്റിന്റെയും ഷോപ്പിംഗ്‌ കാര്‍ട്ടുകള്‍ ആണ്‌. അതിങ്ങനെ നല്ല മൊഞ്ചാക്കി അടിപൊളി സാധനങ്ങള്‍ ഒക്കെ കുത്തിനിറച്ച്‌ തള്ളി കൊണ്ട്‌ നടക്കുന്നത്‌ കാണുമ്പോള്‍ വിശാലന്റെ വിക്രം വരെ ഒരു നിമിഷം നാണിച്ചു പോകും. പക്ഷെ ഇതു കൊണ്ടൊന്നും എനിക്ക്‌ ഇവരോടുള്ള സഹതാപത്തിന്‌ ഇടിവൊന്നും സംഭവിച്ചിട്ടില്ല. അവരുടെ നിലയ്ക്കും വിലയ്ക്കും പറ്റുന്ന ഒരു കണ്‍വേര്‍ട്ടിബിള്‍ അവര്‍ മെയിന്റേന്‍ ചെയ്യുന്നു എന്നേ തോന്നിയിട്ടുള്ളു. ഈ സൌകര്യം ഒന്നും ഇല്ലാത്ത വേറെയും എത്രയോ പേരുണ്ട്‌ ഇവര്‍ക്ക്‌ ചുറ്റും. കണ്ടാല്‍ പേടിയാവുമെങ്കിലും ടെക്നിക്കലി ഇവരൊക്കെ ഡീസന്റ്‌ ആള്‍ക്കാരാണ്‌, നമ്മളായിട്ട്‌ ഒടക്കാന്‍ ചെല്ലാത്തടുത്തോളം. ഇങ്ങനെയുള്ളവരുടെ ഫോട്ടോ എടുക്കരുത്‌ എന്നൊരു അലിഖിത നിയമം ഉള്ളതു കൊണ്ട്‌, ഫോട്ടോ എടുത്തിട്ടില്ല. ചിലപ്പോള്‍ അന്നേരം ആയിരിക്കും ഇവരൊക്കെ ഇന്‍ഡീസന്റ്‌ ആവുക, വെറുതെ റിസ്ക്‌ എടുക്കേണ്ട. അതു പോട്ടെ, ഇപ്പൊള്‍ തന്നെ ഓഫ്‌ ടോപ്പിക്ക്‌ ആയി.

വാള്‍മാര്‍ട്ട്‌ സൂപ്പര്‍ മാര്‍ക്കറ്റ്‌ സാം വാള്‍ട്ടന്റെയോ, മുത്തു പട്ടരുടെയോ ആയിരിക്കും, പക്ഷെ അവിടെയുള്ള ഷോപ്പിംഗ്‌ കാര്‍ട്ടുകള്‍ തങ്ങളുടെ തറവാട്ട്‌ സ്വത്തണെന്നാണ്‌ ഹോംഫുള്‍ കാറ്റഗറിയില്‍പെടുന്ന പല മാന്യന്മാരുടെയും വിചാരം. ഷോപ്പിംഗ്‌ നടത്തി, അതുമായി വീടുകളിലേക്ക്‌ പോവുകയും, കാര്യം കഴിഞ്ഞ ശേഷം ഡിസ്കാര്‍ഡ്‌ അടിച്ച്‌ വഴിയില്‍ ഉപേക്ഷിക്കപ്പെടുകയും ചെയ്യപ്പെടുന്ന കാര്‍ട്ടുകള്‍ വാഹനങ്ങള്‍ക്കും, കാല്‍നടകാര്‍ക്കും, സൈക്കിള്‍ യാത്രക്കാര്‍ക്കും ഭീഷണി ആകുന്നു. ഫോര്‍ എക്സാമ്പിള്‍, ഇങ്ങനെ ഉപേക്ഷിക്കപ്പെടുന്ന കാര്‍ട്ടുകള്‍ തപ്പി ഇറങ്ങിയ വളന്റിയര്‍മാര്‍ ബെല്‍വ്യൂ-സിയാറ്റിലിലെ ഒരു അപ്പാര്‍ട്മന്റ്‌ കോമ്പ്ലക്സില്‍ നിന്ന് മാത്രം ഒരു ദിവസം 150-തില്‍പരം പെറുക്കി എടുത്തു എന്ന് പത്രവാര്‍ത്ത.

ഗ്രോസറി കാര്‍ട്ടുകള്‍ കടകളുടെ പാര്‍ക്കിംഗ്‌ സ്ഥലത്തിന്‌ വെളിയില്‍ കൊണ്ടുപോകുന്നത്‌ പല പട്ടണങ്ങളിലും കുറ്റകരമാണെന്ന്‌ സാധാരണക്കാരായ ജനങ്ങള്‍ അറിയുന്നില്ലെന്ന് തോന്നുന്നു. കസ്റ്റമേര്‍സിന്റെ സൌകര്യത്തില്‍ കൈ കടത്താതിരിക്കുകയും, അവരെ പിണക്കാതിരിക്കാന്‍ വേണ്ടിയുമുള്ള കടക്കാരുടെ ഒരു ഒളിച്ചു കളി. ഇങ്ങനെ നഷ്ടപ്പെടുന്ന കാര്‍ട്ടുകള്‍ ബിസിനസ്സിന്‌ ഉണ്ടാക്കുന്ന നഷ്ടം ഒരു വര്‍ഷം ഏകദേശം $800 മില്ല്യണ്‍ ആണെന്നാണ്‌ കണക്ക്‌.

ഇതു വരേ വായിച്ചോ, എന്നാല്‍ കാര്യം പറയാം. ഇതുവരേ പറഞ്ഞത്‌ അമേരിക്കയിലെ കാര്യം, ന്യൂയോര്‍ക്കില്‍ ഇങ്ങനെ ഒന്നും അല്ലെന്ന് ഞാന്‍ മനസ്സിലാക്കിയിരുന്നു. പല കടകളിലും ഈ വണ്ടികള്‍ ചെക്‌ക്‍ഔട്ടിന്‌ വെളിയില്‍ കൊണ്ടുപോകാന്‍ പറ്റില്ല. ഇങ്ങനെ ഒരു ബോര്‍ഡ്‌ കണ്ട്‌ സ്ഥലത്ത്‌ ഞാന്‍ തപ്പി ഇറങ്ങി. അങ്ങനെ കണ്ടു, കണ്ടറിഞ്ഞു.

ഇവിടത്തെ കാര്‍ട്ടിന്റെ ഒരു വീലില്‍ RF റിസീവറും അതിനെ ആജ്ഞകളെ അനുസരിക്കുന്ന ഒരു മെക്കാനിക്കല്‍ ഘടകവും ഉണ്ട്‌. ഈ കട തങ്ങളുടെ അതിര്‍ത്തി നിര്‍ണ്ണയിച്ചു കൊണ്ട്‌ ലക്ഷ്മണ രേഖ വരച്ചത്‌ RF ട്രാന്‍സ്മിറ്റ്‌ ചെയ്യുന്ന വയര്‍ ഉപയോഗിച്ചാണ്‌. കാര്‍ട്ടുകള്‍ ഈ വര കടന്നാല്‍, റിസീവര്‍ ഉള്ള വീലിന്‌ മസില്‍ വെട്ടി കയറും, സഡ്ഡന്‍ ബ്രേക്കിടും. സംഭവം ക്ലീന്‍, ഒരു സ്വാഭാവിക മരണം. കാര്‍ട്ടുകളുടെ സ്വഭാവം വച്ച്‌ നോക്കിയാല്‍ ഇത്രയും നേരമെങ്കിലും, മര്യാദക്കാരന്‍ ആയി കൂടെ നടന്നത്‌ തന്നെ ഭാഗ്യം എന്നു കസ്റ്റമറും വിചാരിക്കും. ഒരു കമ്പനി സൈറ്റില്‍ കണ്ടത്‌ ഇവിടെ.

നാട്ടിലെ വാഹന മോഷണം തടയാന്‍ ഇത്തരം ഒരു സാധനം കസ്റ്റമൈസ്‌ ചെയ്താല്‍ ഉപകാരം ആയിരിക്കും എന്നു തോന്നുന്നു. ട്രാന്‍സ്മിറ്റര്‍ രാത്രി മാത്രം ഓണ്‍ ചെയ്താല്‍ മതിയല്ലൊ? എപ്പടി?

A380 : കാത്തിരിപ്പ്‌ തുടരുന്നു

2006-06-13T20:40:00.000-04:00

വ്യാമയാന വ്യവസായം വലിയ കഷ്ടത്തിലാണ്‌. അന്തര്‍ദേശീയ മേഖലയില്‍ മാത്രമേ ചെറിയൊരു ഉണര്‍വുള്ളൂ. ഗ്ലോബലൈസേഷന്റെ ഭാഗമായി കൂടുതല്‍ ആളുകള്‍ ആഗോള തരത്തില്‍ യാത്ര ചെയ്യാന്‍ തുടങ്ങിയിരിക്കുന്നു. അതോടെ "Time is Money" സിദ്ധാന്ത പ്രകാരം ഏറ്റവും കൂടുതല്‍ പേരെ എത്രയും പെട്ടെന്ന് എത്തിക്കുക എന്നതായി പ്രധാനം. ഇന്ന്‌ ഈ കാര്യത്തില്‍ ഒരു പടി മുന്നില്‍ നില്‍ക്കുന്നത്‌ എയര്‍ബസ്സ്‌ കമ്പനി ആണ്‌. ഒരു മുഴം നീട്ടി എറിയാന്‍ പാകത്തില്‍ ഒരു കയറും ഈ വമ്പന്റെ കൈയ്യില്‍ ഉണ്ട്‌. പക്ഷെ പാരകള്‍ ഏറ്റുവാങ്ങി തളര്‍ന്ന് ഇരിക്കുകയാണ്‌ ഇവന്‍.

പറഞ്ഞ്‌ വരുന്നത്‌ A380-യെ കുറിച്ചാണ്‌. അടുത്ത ഇരുപത്‌ കൊല്ലത്തേക്കെങ്കിലും രാജാവായി ഇരിക്കേണ്ടവനാണിവന്‍. സാധാരണ നിലയില്‍ 550 പേരെയും, വേണ്ടി വന്നാല്‍ 850 പേരെ വരെയും കയറ്റി പറക്കാന്‍ തയാറായിരിക്കുന്ന ഈ ഭീമാകാരന്‍. ഇത്രയും വലിയൊരു വിമാനത്തിന്‌ വിപണന സാധ്യത ഇല്ല എന്നു പറഞ്ഞ്‌ മാറി നിന്ന ബോയിംഗ്‌ കമ്പനിയെ ഞെട്ടിച്ചത്‌, $300 Million എന്ന വില വക വയ്ക്കാതെ വിമാന കമ്പനികള്‍ കൊടുത്ത ഓര്‍ഡറുകളാണ്‌.

എന്നാല്‍ റിലീസിങ്ങ്‌ അടുക്കുമ്പോള്‍ പല പ്രശ്നങ്ങളും തല ഉയര്‍ത്തുകയും, വാര്‍ത്താ പ്രാധാന്യം നേടുകയും ചെയ്യുന്നു. ടേക്‌ക്‍ഓഫ്‌/ലാന്റിംഗ്‌ സമയത്ത്‌ ഈ വിമാനം ഉയര്‍ത്തുന്ന wake turbulance-നെ കുറിച്ചാണ്‌ ഈ ആഴച കൂടുതലായും കേള്‍ക്കുന്നത്‌. ഇന്ന് സര്‍വീസില്‍ ഉള്ള 747 Jumboയേക്കാളും കൂടുതല്‍ സമ്മര്‍ദ്ദം 100 Ton ഭാരക്കൂടുതലുള്ള A380 ഉണ്ടാക്കും എന്ന് FAA അധികൃതര്‍ ഭയക്കുന്നു. ഈ വിമാനത്തിന്‌ തൊട്ട്‌ പിന്നില്‍ യാത്ര ചെയ്യേണ്ടുന്നവയ്ക്ക്‌ ഇത്‌ ഭീഷണിയാണെന്നത്‌ വലിയൊരു പരിതി വരെ സത്യവുമാണ്‌. ഈ ടര്‍ബുലന്‍സ്‌ കാരണം അടിതെറ്റി വീണ്‌ അപകടങ്ങള്‍ ഉണ്ടായിട്ടുണ്ട്‌. (അമേരിക്കയില്‍ നവമ്പര്‍ 2001-ല്‍ JFK വിമാനത്താവളത്തിനടുത്ത്‌ 251 പേരുടെ മരണത്തിനിരയാക്കിയ അപകടത്തിനും ഒരു കണക്കിന്‌ ഇതിനെ കുറ്റപ്പെടുത്താം). ആ അവസ്തയില്‍ തീരെ ചെറിയ വിമാനങ്ങള്‍ക്ക്‌ ഇതിന്റെ ഏഴ്‌ അയലത്ത്‌ പോകുന്നതിനെ പറ്റി ആലോചിക്കാനേ പറ്റില്ല. ടേക്‌ക്‍ഓഫുകള്‍ക്കിടയില്‍ കൂടുതല്‍ സമയം അനുവദിച്ചാല്‍ ഈ പ്രശ്നം ഒഴിവാക്കാം. പക്ഷെ തിരക്കേറിയ വിമാനത്താവളങ്ങള്‍ ഈ പ്രതിവിധി അംഗീകരിക്കാന്‍ തയാറാകില്ല. ഈ വിഷയത്തെ പറ്റി എയര്‍ബസ്സ്‌ കമ്പനി നടത്തിയ പഠനത്തില്‍ A380 കാരണം ഇത്തരം ഭയാനകമായ പ്രശ്നങ്ങള്‍ ഉയര്‍ത്തുന്നില്ലെന്നാണ്‌ കണ്ടെത്തിയത്‌. ഇത്‌ FAA നയിക്കുന്ന അമേരിക്കന്‍ ലോബിക്ക്‌ വിഴുങ്ങാന്‍ കഴിഞ്ഞിട്ടില്ല. ഇതേ കുറിച്ച്‌ തിങ്കളാഴ്ചയും ചര്‍ച്ച നടന്നിരുന്നു.

ഒരുപാട്‌ പ്രശ്നങ്ങള്‍ അതിജീവിച്ചാണ്‌ ഇവിടെ വരെ കൊണ്ടെത്തിച്ചത്‌. തൊമ്മന്‍ അയയുമ്പോള്‍ ചാണ്ടി മുറുകും എന്ന പോലെ എന്നും പ്രശ്നങ്ങള്‍ ഇവന്റെ കൂടെ ഉണ്ട്‌. സിങ്കപ്പൂര്‍ എയര്‍ലൈന്‍സ്‌ പോലെ കാശുള്ള അണ്ണന്മാര്‍ ഇതും കാത്തിരിക്കാന്‍ തുടങ്ങിയിട്ട്‌ കാലം കുറച്ചായി. അഞ്ച്‌ വിമാനം ഉണ്ടാക്കി പരീക്ഷണ പറക്കലും, ജാഡ കാണിക്കലും ഒക്കെ കഴിഞ്ഞു, ഇനി സാധനം റോഡില്‍ ഇറങ്ങിയാല്‍ മതി എന്ന സ്ഥിതിയില്‍ നില്‍ക്കുമ്പോള്‍ ആണ്‌ മുകളില്‍ പറഞ്ഞ ചര്‍ച്ചകള്‍ നടക്കുന്നത്‌. ഈ വര്‍ഷാവസാനം ഡെലിവറി തുടങ്ങും എന്നും പറഞ്ഞ്‌ ഇരുന്നവര്‍ ഇന്ന്‌ പ്രഖ്യാപിച്ചു, "നമ്മുടെ പ്രൊഡക്ഷന്‍ ലൈനില്‍ ട്രാഫിക്‌ ജാം. ഇന്നത്തെ സ്ഥിതി വച്ച്‌ നോക്കിയാല്‍ മുമ്പ്‌ പറഞ്ഞതില്‍ നിന്ന് ഒരു 6-7 മാസം വൈകും സാധനം പുറത്തിറങ്ങാന്‍". ഒപ്പം തന്നെ മുമ്പ്‌ പറഞ്ഞതില്‍ നിന്ന് വ്യത്യസ്ഥമായി ആദ്യ വര്‍ഷം 7 എണ്ണവും, അടുത്ത വര്‍ഷം 5-8ഉം പ്രതീക്ഷിക്കാം എന്നും പ്രസ്താവന സൂചിപ്പിക്കുന്നു. ഇതൊരു project management-ന്റെ പരാജയം ആയി അംഗീകരിക്കാന്‍ ഒരു പ്രയാസം, പ്രത്യേകിച്ചും അടച്ചിട്ട മുറികളില്‍ കഴുത്ത്‌ ഞെരിക്കാനുള്ള ചര്‍ച്ചകള്‍ കൊടുമ്പിരി കൊള്ളുമ്പോള്‍. വൈകി ആണെങ്കിലും ഇവന്‍ വെളിച്ചം കാണുകയും നമ്മുടെ ആകാശത്തെ വാഴുകയും ചെയ്യും എന്ന് പ്രതീക്ഷിക്കുന്നു.

[Update : 14 ജൂണ്‍ 2006]
എയര്‍ബസ്സ്‌ ഇന്ന് കൂടുതല്‍ സങ്കീര്‍ണ്ണമായ പ്രശ്നങ്ങളില്‍ ചെന്ന് വീണു. ഡെലിവറി വൈകുന്നത്‌ ഓര്‍ഡര്‍ നല്‍കി കാത്തിരിക്കുന്ന കമ്പനികള്‍ അംഗീകരിക്കാന്‍ തയാറല്ലെന്ന ധ്വനി ആണ്‌ നല്‍കുന്നത്‌. സിങ്കപ്പൂര്‍ എയര്‍ലൈന്‍സ്‌ 20 ബോയിംഗ്‌ 787 വാങ്ങാന്‍ തീരുമാനിച്ചു. ക്വാണ്‍ടസ്‌ എയര്‍ലൈന്‍സും മറ്റു വഴികള്‍ തേടുകയാണെന്ന് പ്രഖ്യാപിച്ചു. ഇത്തരം ഒരു പ്രത്യാഘാതം പ്രതീക്ഷിക്കാത്തത്‌ പോലെയാണ്‌ സ്റ്റോക്ക്‌ മാര്‍ക്കറ്റ്‌ ഈ വാര്‍ത്തകള്‍ക്കെതിരെ പ്രതികരിച്ചത്‌, 26% ശതമാനം ഇടിവാണ്‌ ഈ കമ്പനിയുടെ സ്റ്റോക്ക്‌ വിലയിടിഞ്ഞത്‌. നല്ലൊരു സ്ഥിതിയില്‍ അല്ല എയര്‍ബസ്സ്‌ കമ്പനി ഉള്ളതെന്ന് ചുരുക്കും. ആരുടെയൊക്കെ തലകള്‍ ഉരുളും എന്ന് വരും ദിവസങ്ങളില്‍ കണ്ടറിയാം.

ക്രൂഡ്‌ ചിന്തകള്‍

2006-06-11T01:06:00.000-04:00

[വില വര്‍ദ്ധനവിനെ ന്യായീകരിക്കല്‍ അല്ല ഈ പോസ്റ്റിന്റെ ഉദ്ദേശം. അങ്ങനെ ഒരു ധ്വനി ഉയരുകയാണെങ്കില്‍ എന്റെ ഭാഷയുടെ പ്രശ്നമായിരിക്കാം.]

ഇന്ത്യയില്‍ പിന്നെയും പെട്രോള്‍ വിലകൂടി. പെട്രോള്‍ വില വര്‍ദ്ധന എപ്പോഴും രാഷ്ട്രീയക്കാര്‍ക്ക്‌ അഭിപ്രായം പറയാനും അഴിഞ്ഞാടാനും കിട്ടുന്ന സുവര്‍ണ്ണാവസരം ആണ്‌. പ്രതിപക്ഷത്തിരിക്കുന്നവര്‍ കാലാകാലം അത്‌ അവരുടെ കഴിവ്‌ അനുസരിച്ച്‌ നിര്‍വഹിച്ച്‌ പോരുന്നു. ഒരോ രാജ്യത്തെയും പെട്രോള്‍ വില അതത്‌ രാജ്യത്തെ സര്‍ക്കരുകള്‍ അവരുടെ താല്‍പര്യങ്ങള്‍ക്ക്‌ അനുസരിച്ച്‌ തീരുമാനിക്കുന്നു എന്ന് വിചാരിക്കാന്‍ ഞാന്‍ നിര്‍ബന്ധിതന്‍ ആകുന്നു. കരുണാനിധി രണ്ട്‌ രൂപക്ക്‌ അരി കൊടുക്കുന്നു എന്ന് കരുതി നാളെ മുതല്‍ മെക്സിക്കന്‍ പ്രധാനമന്ത്രി അവരുടെ നാട്ടില്‍ അരി വില കുറക്കണം എന്നില്ലല്ലോ?

പെട്രോള്‍ വില വര്‍ദ്ധന എത്രത്തോളം offtrack ആണെന്ന് നമ്മുക്കൊന്ന് പരിശോധിക്കാം. ഞാന്‍ ഒരു economy expert അല്ലാത്തതിനാല്‍ ശരികളേക്കാള്‍ കൂടുതല്‍ തെറ്റുകള്‍ ആവാന്‍ ആണ്‌ സാധ്യത. വെറുതെ ബുക്കും പെന്‍സിലും വച്ച്‌ കൂട്ടിയപ്പോള്‍ കിട്ടിയ ചില നമ്പറുകളും, ചിന്തകളും ചുവടെ.

ഒരു ബാരല്‍ ക്രൂഡ്‌ ഓയില്‍ എന്നാല്‍ ഏകദേശം 160 ലിറ്റര്‍ (42 ഗാലണ്‍) ആണ്‌. അന്തര്‍ദേശീയ മാര്‍ക്കറ്റില്‍ ഇതിന്റെ വില 3220 രൂപയായി (70$) വരും. ഇത്രയും ക്രൂഡ്‌ ശുദ്ധീകരിച്ചാല്‍ ഉദ്ദേശം 75 ലിറ്റര്‍ പെട്രോള്‍ ലഭ്യമാകും എന്നാണ്‌ അമേരിക്കയിലെ കണക്ക്‌. ശുദ്ധീകരണ പ്രക്രിയയില്‍ ലഭിക്കുന്ന അടുത്ത മുഖ്യ വസ്തു ഇവിടെ ഉപയോഗിക്കുന്ന ഫ്യൂയല്‍ ഓയില്‍ ആണ്‌, ഏകദേശം 37 ലിറ്റര്‍. ഇതല്ലാതെ തവിടും, പിണ്ണാക്കും എന്ന് പറയുന്ന പോലെ മെഴുകും, മണ്ണെണ്ണയും ഉള്‍പ്പടെ അല്ലറ ചില്ലറ മറ്റ്‌ വസ്തുക്കളും. ഇങ്ങനെ ഒരു കണക്ക്‌ വച്ച്‌ നോക്കിയാല്‍ 3220 രൂപ മുതല്‍ ഇറക്കിയാല്‍, ഇന്നത്തെ ലിറ്ററിന്‌ 50 രൂപാ നിരക്കില്‍ 3750ന്റെ പെട്രോള്‍ ലഭിക്കുന്നു. പക്ഷെ സര്‍ക്കാരിന്റെയും കമ്പനികളുടെയും മുന്നില്‍ ചിലവുകള്‍ വേറേയും ഉണ്ട്‌. ശുദ്ധീകരണ ചിലവ്‌, കടത്ത്‌ കൂലി, തുറമുഖ കയറ്റിറക്ക്‌ കൂലി, ശുദ്ധീകരണ ശാലകളില്‍ നിന്ന് വിതരണ പമ്പിലേക്ക്‌ എത്തിക്കല്‍, കേന്ദ്ര/സംസ്ഥാന നികുതികള്‍, പല നിലയിലുള്ള ഇടനിലക്കാരുടെ കമ്മീഷനുകള്‍. ഇങ്ങനെ എന്തെല്ലാം. ചെറിയൊരു ലാഭം പ്രതീക്ഷിച്ച്‌ കൊണ്ടാണ്‌ വില ഉയര്‍ത്തിയത്‌ എന്ന് സര്‍ക്കാരും സമ്മതിക്കുന്നു. ഈ ലാഭം, കേന്ദ്ര സര്‍ക്കാരിന്‌ കഴിഞ്ഞ കുറെ കാലങ്ങള്‍ക്കുള്ളില്‍ നഷ്ടം സഹിച്ച്‌ കഴുത്തറ്റം കടത്തില്‍ മുങ്ങി നില്‍ക്കുന്ന പെട്രോളിയം കമ്പനികള്‍ക്ക്‌ ഒരാശ്വാസം ആകാന്‍ വേണ്ടിയാണ്‌.

പക്ഷെ വിലക്കയറ്റം എങ്ങനെ തടയും എന്ന കാര്യം ആലോചിക്കാന്‍ സര്‍ക്കാരും മറന്നു. കോലം കത്തിക്കുകയും, ബന്ദ്‌ ആഹ്വാനം ചെയ്യുകയും, സ്വത്ത്‌ നശിപ്പിക്കുകയും ചെയ്യുന്ന പ്രതിപക്ഷം എങ്കിലും ഇത്‌ ആലോചിക്കുന്നുണ്ടാവുമോ?

ടവര്‍ ലൈറ്റിംഗ്‌

2006-06-03T15:37:00.000-04:00

ബ്ലോഗ്‌ ഡിസൈന്‍ ഒന്നു പുതുക്കാനുള്ള ആലോചനയില്‍ ഇരിക്കുകയായിരുന്നു കുറച്ച്‌ ദിവസം ആയി. ആശയങ്ങള്‍ക്ക്‌ വേണ്ടി തിരഞ്ഞ്‌ നടന്ന ഞാന്‍ ചെന്നെത്തിയത്‌ എമ്പയര്‍ സ്റ്റേറ്റ്‌ ബില്‍ഡിങ്ങില്‍. ന്യൂയോര്‍ക്കിലെ ഏറ്റവും ഉയരം കൂടിയ കെട്ടിടം എന്ന സ്ഥാനം തിരിച്ച്‌ കിട്ടിയ സന്തോഷത്തില്‍ ആണ്‌ ഇ.എസ്‌.ബി. ന്യൂയോര്‍ക്ക്‌ നഗരത്തില്‍ തലയുയര്‍ത്തി നില്‍ക്കുന്ന എമ്പയറിന്‌ എന്നും പുതിയ മുഖം നല്‍കുന്നത്‌ അതിന്റെ മുകളിലെ ടവര്‍ ലൈറ്റിംഗ്‌ ആണ്‌. സാധാരണയായി രണ്ടോ മൂന്നോ നിറങ്ങളാണ്‌ ഇതിനെ അലങ്കരിക്കുന്നത്‌. ഈ നിറങ്ങള്‍ ഓരോ ദിവസത്തിന്റെ പ്രത്യേകതയെ സൂചിപ്പിക്കുന്നു. ഭാരതത്തിന്റെ സ്വാതന്ത്ര്യ ദിനം അനുസ്മരിക്കപ്പെടുന്നത്‌ ദേശീയ പതാകയിലെ മൂന്ന് നിറങ്ങള്‍ കൊണ്ടാണ്‌. പ്രത്യേക ലൈറ്റിംഗ്‌ ഇല്ലാത്ത ദിവസങ്ങളില്‍ വെള്ള നിറം മാത്രം.

ഈ ലൈറ്റിംഗ്‌ തീം അനുകരിക്കാന്‍ ആണ്‌ ചിന്ത. ഓരോ ദിവസവും അലങ്കരിക്കുന്ന നിറങ്ങള്‍ എതൊക്കെ എന്ന് ഇവിടെ നിന്നറിയാം. ഈ നിറങ്ങള്‍ ഉപയോഗിച്ച്‌ സൈഡ്‌ബാറിലെ മൂന്ന് കളങ്ങളിലെ നിറം മാറ്റാനാണ്‌ ശ്രമം. എത്രനാള്‍ തുടര്‍ന്നു പോകാന്‍ പറ്റും എന്നുറപ്പില്ല. അതു പോലെ തന്നെ പേജിന്റെ ഡിസൈനുമായി ഒത്തുപോകുന്ന നിറങ്ങള്‍ ആയിരിക്കുമോ എന്നും അറിയില്ല. ചില ദിവസങ്ങളില്‍ കണ്ണില്‍ തറയ്കുന്ന നിറങ്ങള്‍ സഹിക്കേണ്ടി വന്നേക്കാം. എന്തായാലും ഇന്ന് തുടങ്ങിയേക്കാം. ഇന്നത്തെ നിറം എന്തിനെ സൂചിപ്പിക്കുന്നു?

എമ്പയര്‍ സ്റ്റേറ്റ്‌ ബില്‍ഡിങ്ങിലെ ലൈറ്റിങ്ങിനെ പറ്റി കൂടുതല്‍ അറിയാന്‍ താല്‍പര്യമുള്ളവര്‍ ഇവിടെ പോവുക.

മന്‍ഹാറ്റന്‍ഹെഞ്ച്‌

2006-05-29T10:24:00.000-04:00

സിറ്റികളില്‍ സിറ്റിയായ ന്യൂയോര്‍ക്ക്‌ സിറ്റി. ഇതിന്റെ മര്‍മ്മം ആയ മന്‍ഹാറ്റന്‍. ഒരു ദ്വീപ്‌ ആയ മന്‍ഹാറ്റന്‍ പക്ഷെ മാപ്പുകളില്‍ സാധാരണയായി അവതരിപ്പുക്കുന്നത്‌ പോലെയല്ല ഭൂമിശാസ്ത്രപരമായി കിടക്കുന്നത്‌. മാപ്പ്‌ ശ്രദ്ധിച്ചാല്‍ മനസ്സിലാകും, വടക്ക്‌ ലക്ഷ്യമാക്കുന്ന സൂചി മുപ്പത്‌ ഡിഗ്രി ചരിഞ്ഞാണ്‌ വരച്ചിരിക്കുന്നതെന്ന കാര്യം. എന്നുവച്ചാല്‍ ഈ ദ്വീപ്‌ വടക്ക്‌-കിഴക്കായിട്ടാണ്‌ നില്‍പ്പ്‌ എന്നര്‍ത്ഥം. മറ്റ്‌ പല അമേരിക്കന്‍ നഗരങ്ങളെയും പോലെ ഒരു പ്ലാന്‍ വരച്ച്‌ നിര്‍മ്മിച്ച സ്ഥലം തന്നെ ഇതും. ഒരു ഏകദേശ ചിത്രം തരാന്‍ വേണ്ടി ഇങ്ങനെ പറയാം. മുകളില്‍ നിന്ന് താഴെ വരെ നേര്‍ രേഖയില്‍ പതിനൊന്ന് റോഡുകള്‍ നിര്‍മ്മിച്ചു. (ഇവയെ ഒന്നു മുതല്‍ പതിനൊന്ന് അവന്യു-കള്‍ എന്നു വിളിക്കുന്നു). അവയ്ക്ക്‌ perpendicular ആയി ഒന്നു മുതല്‍ നൂറ്ററുപത്‌ വരെ നമ്പര്‍ ചെയ്ത റോഡുകള്‍ കിഴക്ക്‌-പടിഞ്ഞാറ്‌ ദിശയില്‍ ഓടുന്നു. ഇതിനെ സ്ട്രീറ്റ്‌സ്‌ എന്നും വിളിക്കുന്നു. മന്‍ഹാറ്റനിലെ എല്ലാ കെട്ടിടങ്ങളും, ഈ അവന്യൂകളെയും സ്ട്രീറ്റുകളെയും അഭിമുഖീകരിച്ച്‌ നിര്‍മ്മിക്കുന്നു. ഈ രീതിയില്‍ നിര്‍മ്മിക്കപ്പെട്ടത്‌ കൊണ്ട്‌, ദ്വീപിന്റെ കിഴക്കേ അറ്റത്ത്‌ ഏതെങ്കിലും സ്ട്രീറ്റില്‍ നില്‍ക്കുന്ന ഒരാള്‍ക്ക്‌ ഈ കെട്ടിടങ്ങളുടെ ഇടയിലൂടെ ദ്വീപിന്റെ പടിഞ്ഞാറെ അറ്റത്ത്‌ നില്‍ക്കുന്ന ഒരാളെ കാണാന്‍ പറ്റും എന്ന് സങ്കല്‍പിക്കാം, ഇടയിലുള്ള ഉയര്‍ന്ന പ്രദേശങ്ങള്‍ ശരിക്കും അങ്ങനേ ചെയ്യാന്‍ അനുവദിക്കില്ലെങ്കിലും.

മന്‍ഹാറ്റനിലെ അംബരചുമ്പികളായ കെട്ടിടങ്ങള്‍ ആണ്‌ ലോകത്തിന്റെ മുമ്പില്‍ ന്യൂയോര്‍ക്കിന്റെ മുഖമുദ്ര. ഒന്നോ രണ്ടോ നിലയുള്ള കെട്ടിടങ്ങള്‍ ഈ നഗരത്തില്‍ ഇല്ലെന്ന് പറഞ്ഞാല്‍ അതിയശോക്തിയാവില്ല. ഈ കെട്ടിടങ്ങളുടെ ഉയരവും, മുപ്പത്‌ ഡിഗ്രി കിഴക്കോട്ട്‌ നോക്കിയുള്ള ഭൂമിയുടെ കിടപ്പും കൊണ്ട്‌ മന്‍ഹാറ്റനിലെ റോഡുകളില്‍ എന്നും ഈ കെട്ടിടങ്ങളുടെ നിഴല്‍ വീണ്‌ കിടക്കും. ഈ കെട്ടിടങ്ങള്‍ തീര്‍ത്ത വേലി കെട്ടുകള്‍ക്കുള്ളില്‍ നിന്നു അസ്തമയ സൂര്യനെ കാണാന്‍ ഭാഗ്യം നേടിയവര്‍ പടിഞ്ഞാറേ തീരത്ത്‌ താമസിക്കുന്നു. പക്ഷെ ഭൂമദ്ധ്യരേഖ മുറിച്ച്‌ കടന്ന് തെക്ക്‌ നിന്ന് വടക്കോട്ടുള്ള യാത്രയില്‍ ഒരു ദിവസം ഈ സ്ട്രീറ്റുകളുടെ നേര്‍ രേഖയില്‍ സൂര്യന്‍ അസ്തമിക്കും. അങ്ങനെ ഒരു ദിവസം ആയിരുന്നു ഇന്നലെ, മെയ്‌ 28. അതു പോലെ തന്നെ സൂര്യന്‍ തിരിച്ച്‌ വടക്ക്‌ നിന്ന് തെക്ക്‌ ദിശയിലേക്ക്‌ പോകുന്ന വേളയിലും ഇങ്ങനെ ഉണ്ടാകും. ഈ ദിവസങ്ങളില്‍ സൂര്യന്‍ പടിഞ്ഞാറെ ചക്രവാളത്തില്‍ അസ്തമിക്കുന്നത്‌ മന്‍ഹാറ്റന്റെ കിഴക്കേ അറ്റത്തു നിന്ന് കാണുന്നത്‌ ഒരു കുളിരുണര്‍ത്തുന്ന കാഴ്ച്ചയാണ്‌. കൂറ്റന്‍ കെട്ടിടങ്ങള്‍ തീര്‍ത്ത ഒരു ഗുഹയ്ക്കുള്ളിലേക്ക്‌ താഴ്ന്നിറങ്ങി പോകുന്ന കാഴ്ച ചെറുപ്പ കാലത്ത്‌ വരയ്ക്കുന്ന ഫാന്റസി സൂര്യോദയത്തില്‍ (രണ്ട്‌ മലകള്‍ക്കുള്ളില്‍ നിന്ന് ഉദിച്ചുണര്‍ന്ന് വരുന്ന) നിന്നും ഒട്ടു വ്യത്യസ്തം അല്ല. എന്ത്‌ ചെറിയ കാര്യവും ഊതിവീര്‍പ്പിക്കാന്‍ ശീലിച്ച അമേരിക്കക്കാര്‍ ഇതിനെ വെറുതെ വിടും എന്ന് തോന്നുന്നുണ്ടോ? അവര്‍ ഈ കാര്യത്തിന്‌ ഒരു പേരും കൊടുത്തു, Manhattanhenge. മഴ മേഘങ്ങള്‍ക്ക്‌ കൂടി ഒഴിവ്‌ ദിവസം ആയിരുന്നത്‌ കൊണ്ട്‌ എന്റെ ക്യാമറക്കും ഈ രംഗം പകര്‍ത്താന്‍ പറ്റി. അത്‌ ഇവിടെ.

ജിമ്മിയെ ഓര്‍ക്കുമ്പോള്‍

2006-05-25T23:21:00.000-04:00

സ്പോര്‍ട്ട്സ്‌ എന്നോര്‍ക്കുമ്പോള്‍ ക്രിക്കറ്റ്‌ മാത്രം എന്നൊരു സ്ഥിതി വിശേഷം വന്നു കഴിഞ്ഞിട്ട്‌ കുറച്ച്‌ കാലം ആയി. ഇന്ന് പണത്തിലേക്കും പ്രശസ്തിയിലേക്കും ഒരു വാതിലായി ക്രിക്കറ്റ്‌ മാറി കഴിഞ്ഞു. നമ്മുടെ കൊച്ചു കേരളം ആധുനിക ക്രിക്കറ്റിന്‌ വലിയ സംഭാവനയൊന്നും നല്‍കിയിരുന്നില്ല, അടുത്ത കാലം വരേ. എന്നാല്‍ മറ്റ്‌ കായിക ഇനങ്ങളില്‍ കേരളത്തിന്റെ സാന്നിദ്ധ്യം ഏറ്റവും മുന്നിലായിരുന്നു. അവിടെ നമ്മുടെ യശസ്സുര്‍ത്തിയവരില്‍ ഏറ്റവും മുന്നിലായിരുന്നു കേരളത്തിന്റെ ഏറ്റവും മികച്ച വോളീബോള്‍ താരം, ശ്രീ.ജിമ്മി ജോര്‍ജ്ജ്‌. പബ്ലിസിറ്റിയും സ്പോണ്‍സര്‍ഷിപ്പും ഇല്ലാത്ത കാലത്ത്‌ സ്വന്തം പ്രയത്നത്തിലൂടെ മുന്‍നിരയിലേക്ക്‌ അടിവച്ച്‌ കയറിയ ജിമ്മി മൂന്ന് തവണ ഭാരതത്തിന്‌ വേണ്ടി കോര്‍ട്ടില്‍ ഇറങ്ങി.

17-ാ‍ം വയസ്സില്‍ കേരളത്തിന്‌ വേണ്ടി കളിച്ചു തുടങ്ങിയ ജിമ്മി 19-ാ‍ം വയസ്സില്‍ ഭാരതത്തിന്റെ ജെഴ്‌സി അണിഞ്ഞു. 21-ാ‍ം വയസ്സില്‍ ആര്‍ജ്ജുന അവാര്‍ഡ്‌ ഏറ്റുവാങ്ങുമ്പോള്‍ ഈ അവാര്‍ഡ്‌ നേടുന്ന ഏറ്റവും പ്രായം കുറഞ്ഞ വോളീബോള്‍ കളിക്കാരന്‍ ആയിരുന്നു. കേരള പോലീസ്‌ ടീം അംഗം ആയിരുന്നുപ്പോള്‍ വിദേശ ക്ലബ്ബിന്‌ വേണ്ടി കളിക്കാന്‍ അനുവാദം നേടുകയും 1982-ല്‍ ഇറ്റലിയിലേക്ക്‌ പോവുകയും ചെയ്തു. ഒരു ഇറ്റാലിയന്‍ ക്ലബ്ബിന്‌ വേണ്ടി കളിക്കുന്ന ആദ്യത്തെ ഇന്ത്യക്കാരന്‍ ആയിരുന്നു ജിമ്മി. രണ്ട്‌ വര്‍ഷത്തിന്‌ ശേഷം തിരിച്ച്‌ വന്ന് പോലീസ്‌ ടീമിന്‌ വേണ്ടി കളി തുടര്‍ന്നു. 1985-ല്‍ വീണ്ടും ക്ലബ്ബിലേക്ക്‌ തിരിച്ച്‌ പോയ ജിമ്മി രണ്ട്‌ വര്‍ഷത്തിന്‌ ശേഷം ഇറ്റലിയില്‍ ഉണ്ടായ കാറപകടത്തില്‍ മരിച്ചപ്പോള്‍ കേരളത്തിന്‌ നഷ്ടപ്പെട്ടത്‌ ഒരു കളിക്കാരനെ മാത്രമായിരുന്നില്ല, വോളീബോള്‍ എന്ന കളിയുടെ ഭാവി തന്നെയായിരുന്നു. ജിമ്മിയുടെ ബന്ധുക്കളും ആരാധകരും ചേര്‍ന്നുണ്ടാക്കിയ ട്രസ്റ്റ്‌ ഇന്ന് മല്‍സരങ്ങള്‍ നടത്തുകയും മികച്ച കളിക്കാര്‍ക്ക്‌ അവാര്‍ഡുകള്‍ ഏര്‍പ്പെടുത്തിയിട്ടുമുണ്ട്‌.

ഇതില്‍ നിന്നെല്ലാം അകന്ന് അമേരിക്കയില്‍, വോളീബോള്‍ കളിയും ജിമ്മിയുടെ സംഭാവനകളും മനസ്സില്‍ കൊണ്ട്‌ നടക്കുന്ന കുറച്ച്‌ മലയാളികള്‍ ചേര്‍ന്ന് ‘ജിമ്മി ജോര്‍ജ്ജ്‌ മെമ്മോറിയല്‍ ടൂര്‍ണമന്റ്’ നടത്തുന്നുണ്ട്‌. അമേരിക്കയില്‍ വിവിധ സ്ഥലങ്ങളില്‍ നിന്നുള്ള പന്ത്രണ്ട്‌ ടീമുകള്‍ ഇതില്‍ പങ്കെടുക്കുന്നു. എല്ലാ വര്‍ഷവും, ഇവിടെ 'മെമ്മോറിയല്‍ ഡേ' ആഘോഷിക്കുന്ന വാരാന്ത്യത്തില്‍ ഈ ടീമുകള്‍ ടോഫിക്കായി ഏറ്റുമുട്ടുന്നു. ഓരോ വര്‍ഷവും ഓരോ ടീമിന്റെയും ഹോം ഗ്രൌണ്ടില്‍ ആണ്‌ ടൂര്‍ണമന്റ്‌ സംഘടിപ്പിക്കുന്നത്‌. ഈ വര്‍ഷം നറുക്ക്‌ വീണിരിക്കുന്നത്‌ കൊളറാഡോയിലെ ഡെന്‍വര്‍ നഗരത്തിനാണ്‌. ഇവിടെ മെയ്‌ 27-28 തീയ്യതികളില്‍ മല്‍സരങ്ങള്‍ നടക്കും. അടുത്ത വര്‍ഷം ന്യൂയോര്‍ക്ക്‌ ആണ്‌ വേദിയാകുന്നത്‌. കേരളത്തിന്റെ സ്വന്തം താരത്തെ ഈ അവസരത്തില്‍ നമുക്കും ഓര്‍ക്കാം.

കൂടുതല്‍ ഇവിടെ.

സര്‍ഗ്ഗവേദനാസംഹാരി

2006-05-15T22:48:00.000-04:00

ശനിയന്‍മാഷ്‌ സൂചിപ്പിച്ച സര്‍ഗ്ഗവേദനയില്‍ നിന്ന് തോന്നിയ ആശയം. മലയാള സിനിമയിലേക്ക്‌ ഒരു എത്തിനോട്ടം.

സര്‍ഗ്ഗവേദനയില്‍ പുളഞ്ഞ്‌ നീറി എത്ര കഷ്ടപ്പെട്ടാണ്‌ ആശയ രൂപത്തില്‍ ഉള്ള കഥയെ എഴുത്തുകാരന്‍ തിരക്കഥയാക്കി മാറ്റുന്നത്‌. ഈ അവസരത്തില്‍ പലരും 'ഇഞ്ച' പോലെയുള്ള ചിത്രങ്ങള്‍ കണ്ട്‌ പല വിധത്തില്‍ പ്രതികരിച്ചിട്ടുമുണ്ടാവാം. മലയാളത്തിലെ തിരകഥാകൃത്തുകള്‍ക്ക്‌ സര്‍ഗവേദനാ സംഹാരികളായി ഉപകരിച്ച ചില ചിത്രങ്ങള്‍. കഥാഘടനയിലും, സീനുകളിലും സാധാരണയില്‍ കവിഞ്ഞ സാമ്യത തോന്നിയ ചില ചിത്രങ്ങള്‍ ആണ്‌ താഴെ. ഇതൊരു സമ്പൂര്‍ണ്ണ ലിസ്റ്റാണെന്ന് തോന്നുന്നില്ല, എന്നാല്‍ അങ്ങനെ ഒന്നു ഉണ്ടാക്കാന്‍ പറ്റിയാല്‍ നല്ലത്‌.

വന്ദനം - Stakeout
വെട്ടം - French Kiss
വ്യൂഹം - Lethal Weapon
നിര്‍ണ്ണയം - The Fugitive
രാജാവിന്റെ മകന്‍ - Rage of Angels
ആഗസ്റ്റ്‌ 1 - The Day of the Jackal
കാക്കകുയില്‍ - A Fish Called Wanda
കുഞ്ഞാറ്റക്കിളികള്‍ - The Sound of Music
പടയോട്ടം - Count Of Monte Cristo (?)
മുകുന്ദേട്ടാ സുമിത്ര വിളിക്കുന്നു - Katha (Hindi)
താളവട്ടം - One Flew Over The Cuckoo's Nest

സാമുവല്‍ ബിക്ക്‌

2006-05-10T19:39:00.000-04:00

വിമാനം ഒരു വാഹനം മാത്രമല്ല ഒരു ആയുധം കൂടിയാണെന്ന് തിരിച്ചറിഞ്ഞത്‌ ന്യൂയോര്‍ക്കിലെ ലോക വ്യാപാര സമുച്ചയം ഭീകരര്‍ തകര്‍ത്തപ്പോഴായിരുന്നു. ഇത്‌ ലോകം അറിഞ്ഞ കാര്യം.

എന്നാല്‍ വര്‍ഷങ്ങള്‍ക്ക്‌ മുമ്പ്‌, 1974-ല്‍ ഇതേ മാര്‍ഗ്ഗത്തില്‍ റാഞ്ചിയ വിമാനം ഉപയോഗിച്ച്‌ അന്നത്തെ അമേരിക്കന്‍ പ്രസിഡന്റ്‌ നിക്സണ്‍നെ വധിക്കാന്‍ പരിപാടിയിട്ട വ്യക്തി ആയിരുന്നു സാമുവല്‍ ബിക്ക്‌. വിമാനം സ്വന്തമായി പറത്താന്‍ അറിയാത്ത സാമുവല്‍, റാഞ്ചിയ വിമാനത്തിലെ പൈലറ്റുമാരെ ഭീഷണിപ്പെടുത്തി വൈറ്റ്‌ ഹൌസില്‍ ഇടിച്ചിറക്കാന്‍ ആയിരുന്നു ഉദ്ദേശിച്ചത്‌. പദ്ധതി ഒട്ടൊക്കെ വിജയിക്കുകയും ഇയാള്‍ നിറച്ച തോക്കും സ്ഫോടക വസ്തുക്കളുമായി വിമാനത്തിനകത്ത്‌ കയറി പറ്റുകയും ചെയ്തു. പാളിച്ച മുന്നില്‍ കണ്ട പരിഭ്രാന്തിയില്‍ സഹ പൈലറ്റിനെയും ചില യാത്രക്കാരെയും വധിക്കുകയും ചെയ്തു. കൂടുതല്‍ അപകടങ്ങള്‍ വരുത്തി വയ്ക്കും മുമ്പെ സെക്യൂരിറ്റി ഉദ്യോഗസ്ഥരുടെ വെടിയേറ്റു വീണ ശേഷം കീഴടങ്ങാതിരിക്കാന്‍ സ്വയം വെടിവെച്ച്‌ ആസന്നമായ മരണം പൂര്‍ത്തിയാക്കിയത്‌ കാരണം ലോകം പല കാര്യങ്ങളും അന്ന് അറിഞ്ഞില്ല. തന്റെ പദ്ധതിയെ കുറിച്ച്‌ വിശദമായി ചിലരെ അറിയിച്ചതില്‍ നിന്നാണ്‌ സംഭവത്തിന്റെ തീവ്രത അന്വേഷണ ഉദ്യോഗസ്ഥര്‍ മനസ്സിലാക്കിയത്‌. എന്നാല്‍ മറ്റുള്ളവര്‍ അനുകരിക്കാതിരിക്കാന്‍ ഈ റാഞ്ചല്‍ ശ്രമം എന്തിനായിരുന്നു എന്ന കഥ അധികൃതര്‍ പുറത്തറിയിച്ചിരുന്നില്ല, 9/11 കമ്മീഷന്‍ റിപ്പോര്‍ട്ട്‌ വരുന്നതുവരെ. കൂടുതല്‍ വിവരങ്ങള്‍ വിക്കിയില്‍.

ക്ലാസ്സിഫൈഡ്‌ എന്ന ഓമനപ്പേരില്‍ ഇങ്ങനെ എന്തൊക്കെ ഉണ്ടാവാം.

വ്യത്യസ്ഥമീ അപൂര്‍ണ്ണത

2006-05-05T14:35:00.000-04:00

വ്യത്യസ്ഥത എന്നാല്‍ എന്തൊക്കെ ആവാം എന്ന ചിന്ത എനിക്ക്‌ തുടങ്ങിയത്‌ നോണ്‍-കമേര്‍ഷ്യല്‍ സിനിമകളോട്‌ കമ്പം തലയില്‍ അടിച്ച്‌ കയറിയിട്ടുണ്ട്‌ എന്ന് തിരിച്ചറിഞ്ഞ ശേഷം ആയിരുന്നു. പക്ഷേ ഇത്തരം ചിത്രങ്ങളിലേക്ക്‌ ഒരു ഇന്‍സ്റ്റന്റ്‌ അട്റാക്ഷന്‍ ആയിരുന്നില്ല, മെല്ലെ ഒരു കീഴടങ്ങല്‍ ആയിരുന്നു. വീട്ടുകാര്‍ക്കു ഇതും തമാശ. നീ മനുഷ്യന്‌ പിടിക്കാത്ത, തലയും വാലും ഇല്ലാത്ത സാധനം ഒക്കെ കണ്ട്‌ വഷളായി പോകരുത്‌ എന്ന ഉപദേശവും റെഗുലറ്‍ ഇന്ററ്‍വലില്‍ വന്നുകൊണ്ടിരിക്കുന്നു. അവരെയും കുറ്റം പറഞ്ഞിട്ട്‌ കാര്യം ഇല്ല, ഒരോ സിനിമയും കണ്ട്‌ ആസ്വദിച്ച രോമാഞ്ചത്തില്‍, ഞാന്‍ അടിക്കുന്ന ഡയലോഗ്‌ ആ സൈസില്‍ ഉള്ളതും ആണ്‌. ഭീഷണി എന്നും ചെന്നെത്തുന്നത്‌, ഒരു നാള്‍ ഞാനും.... ഡോക്യുമെന്ററി എടുത്തീടും എന്നാണ്‌. ഹേയ്‌, ഇതൊക്കെ ഡയലോഗ്‌ മാത്രം, അതിന്‌ ആരെയും പേടിക്കേണ്ടല്ലോ?

ഇത്തരം ചിത്രങ്ങള്‍ കാണുന്നത്‌ കൊണ്ട്‌ പലതുണ്ട്‌ കാര്യം. സമയ ലാഭം, പതിനഞ്ച്‌ മുതല്‍ അറുപത്‌ മിനിറ്റ്‌ കൊണ്ട്‌ പരിപാടി തീരും. കണ്ടാല്‍ ചൊറിയുന്ന ആട്ടവും പാട്ടും ഒഴിവാക്കാം, സഭയില്‍ ഇരുന്നു വളിപ്പ്‌ സിനിമകള്‍ ചര്‍ച്ച ചെയ്യുന്നവനെ ഒതുക്കാന്‍ ഇങ്ങനെ ഒരെണ്ണം മതി. പുവര്‍ ബോയ്സ്‌, ഇവന്‍ ഒക്കെ പിഴച്ചു പോയല്ലോ എന്ന് മനസ്സില്‍ പറഞ്ഞാണെങ്കിലും നിര്‍ത്തിക്കോളും. പക്ഷേ ഇതൊക്കെ സെക്കന്‍ഡറി, പ്രൈമറി ആസ്വാദനം തന്നെ. 'വായനാനുഭവം' എന്നു പറയുന്ന പോലെ കാഴ്ച്ചാനുഭവം എന്നോ മറ്റോ ഉണ്ടോ ആവോ?

ഇങ്ങനെ ദിവസങ്ങള്‍ കഴിഞ്ഞു പോകുന്നു. പപ്പടവും പഴവും കുഴച്ച്‌ വിശാലന്‌ കൊടുത്ത ശേഷം ബ്ളോഗില്‍ തിരിഞ്ഞു നോക്കിയിട്ടില്ല, വക്കാരിയുടെ കുലയിലെ ബാക്കി പഴം എക്സ്പയറും ആയി. പകുതി വേവിച്ച ഒന്നു രണ്ട്‌ ബ്ളോഗുകള്‍ പബ്ളിഷ്‌ ചെയാതെ കിടക്കുന്നു. പലതും ഒരു കുറ്റിയില്‍ കൊണ്ടു പോയി കെട്ടാന്‍ പറ്റിയിട്ടില്ല ഇനിയും. ക്ളൈമാക്സ്‌ ഇല്ലാതെ എങ്ങനെ എന്നൊക്കെ ആലോചിച്ച്‌ ഇങ്ങനേ ഇരിക്കുമ്പോള്‍ ആണ്‌ ഫിലിം മൂവ്മെന്റിന്റെ ഒരു ഡി.വി.ഡി കാണാതെ കിടപ്പുണ്ട്‌ എന്ന കാര്യം ഓര്‍ത്തത്‌. കുറച്ച്‌ ഷോര്‍ട്ട്‌ ഫിലിംസ്‌ ആണ്‌, ഒന്നു രണ്ട്‌ ഫിലിം ഒക്കെ കണ്ട്‌ രോമാഞ്ചം കൊണ്ടാല്‍ ഏതെങ്കിലും ഒരു ഐഡിയ ബള്‍ബ്‌ കത്താതിരിക്കില്ല എന്നു തോന്നി. കുറേ ചിത്രങ്ങളുടെ കലക്ഷന്‍ ആയതിനാല്‍ പലതും മനുഷ്യന്‌ മനസ്സിലാകാത്ത ഭാഷയിലെ ആയിരിക്കും, പക്ഷേ ഈ കാര്യത്തില്‍ ഭാഷ ഒരു അന്താരാഷ്ട്ര പ്രശ്നം ആകാറില്ല. അങ്ങനെ ഞാന്‍ ആദ്യ പ്രദര്‍ശനത്തിനായി ഇരുന്നു; ചിത്രം: ഇഞ്ച; കേവലം 17 മിനിറ്റ്‌ മാത്രം.

ദക്ഷിണാഫ്രിക്കയിലെ ഒരു ഗ്രാമം. കഥാപാത്രങ്ങള്‍ ആയി ഒരു ദുഷ്ടനായ മുതലാളി, കറുത്ത വര്‍ഗ്ഗക്കാരനായ അടിമ പയ്യന്‍, പിന്നെ ഒരു പട്ടിക്കുട്ടിയും. അനുസരണക്കേട്‌ കാണിച്ച പട്ടിക്കുട്ടിയെ ഒരു ചാക്കില്‍ ബന്ധിച്ച്‌ ബൂട്ട്സ്‌ അണിഞ്ഞ കാലു കൊണ്ട്‌ ചവുട്ടുന്നത്‌ വരെ എത്തി മുതലാളിയുടെ ക്രൂരത. പയ്യന്‌ പട്ടിയോടുള്ള സ്നേഹവും സഹതാപവും പ്രകടിപ്പിക്കുന്ന ചില രംഗങ്ങള്‍. കാലം കടന്ന് പോയി, പയ്യനും പട്ടിയും വളര്‍ന്നു. ഒരു സാധാരണ ദിവസം കൃഷി സ്ഥലത്ത്‌ ജോലി ചെയ്യുമ്പോള്‍ മുതലാളി നെഞ്ച്‌ വേദന മൂലം കുഴഞ്ഞ്‌ നിലത്തിരിക്കുന്നു. അസ്വസ്ഥത മനസ്സിലാക്കിയ പയ്യന്‍ ഓടി ചെന്ന് വണ്ടിയില്‍ നിന്ന് മരുന്ന് എടുക്കുന്നു. ഒന്നിച്ച്‌ തന്നെ ഉണ്ടായിരുന്ന പട്ടിയും ഉഷാര്‍ ആവുന്നു. എന്നാല്‍ അത്‌ മുതലാളിക്ക്‌ നല്ലതിനായിരുന്നില്ല. അതു വരേ ഉണ്ടായിരുന്ന സൌഹൃദം എല്ലാം മാറ്റി നിര്‍ത്തി കൊണ്ട്‌, മരുന്നുമായി തിരിച്ച്‌ വരുന്ന പയ്യനെ തടഞ്ഞ്‌ കൊണ്ട്‌ കുരച്ച്‌ ചാടുന്നു. അവശനായി എല്ലാം കണ്ട്‌ കൊണ്ട്‌ നിലത്ത്‌ കിടക്കുന്നതിനിടയില്‍ മുതലാളി അടുത്ത്‌ വണ്ടിയില്‍ ചാരി വച്ചിരിക്കുന്ന നിറച്ച തോക്കെടുത്ത്‌ ഉപയോഗിക്കാന്‍ ആംഗ്യം കാണിക്കുന്നു. മുതലാളിയുടെയും പട്ടിയുടെയും കണ്ണിലേക്ക്‌ മാറി മാറി നോക്കുന്ന പയ്യന്റെ മുഖം. പിന്നെ പട്ടിയുടെ മുഖം, മുതലാളിയുടെ മുഖം, പിന്നെയും പയ്യന്റെ മുഖം....

ഡിം! തീര്‍ന്നു എന്നറിയിച്ച്‌ കൊണ്ട്‌ അരങ്ങിലും അണിയറയിലും ഉള്ളവരുടെ പേരു വിവരങ്ങള്‍ സ്ക്രീനില്‍ പ്രത്യക്ഷപ്പെടാന്‍ തുടങ്ങി. ഒരു ക്ളൈമാക്സ്‌ കിട്ടാന്‍ വേണ്ടി ഇരുന്ന ഞാന്‍ ഇനി ഇതിന്റെ കൂടി ക്ളൈമാക്സ്‌ ചെയ്യേണ്ടി വരുമോ എന്ന ചിന്തയിലായി. അതില്‍ നിന്ന് എന്നെ ഉണര്‍ത്തിയത്‌ ശ്രീമതിയുടെ ക്രൂരത കലര്‍ന്ന നോട്ടം ആയിരുന്നു.

പപ്പടവും പഴവും - Ver 2.0

2006-04-12T21:29:00.000-04:00

Summary:
തലശ്ശേരിയില്‍ സിമ്പ്ലിഫൈഡ്‌ മലയാളത്തില്‍, 'പപ്പടവും പഴവും' എന്നു അറിയപ്പെടുന്നു. ആര്‍ക്കും ഏതു നേരത്തും കഴിക്കാം എന്നത്‌ ഞങ്ങളെ ഈ വിഭവത്തിലേക്ക്‌ കൂടുതല്‍ അടുപ്പിച്ചു.

Requirements:
[റെഗുലര്‍ എഡിഷന്‍ വസ്തുക്കള്‍]
പപ്പടം എണ്ണയില്‍ വാട്ടിയത്‌/പൊള്ളിച്ചത്‌ : 3 എണ്ണം
മൈസൂര്‍ പഴം [ഇവിടെ കിട്ടും] : 3 എണ്ണം
പഞ്ചസാര : 2 ടീ സ്പൂണ്‍
നെയ്യ്‌ : 2 ടീ സ്പൂണ്‍

[ഫാറ്റ്‌-ഫ്രീ എഡിഷന്‍ വസ്തുക്കള്‍]
** മൈക്രോവേവില്‍ പൊള്ളിച്ച പപ്പടം: 3 എണ്ണം
മൈസൂര്‍ പഴം : 3 എണ്ണം
പഞ്ചസാര : 1 ടീ സ്പൂണ്‍
നെയ്യ്‌ : 0.125 ടീ സ്പൂണ്‍

** ടേണ്‍ ടേബിള്‍ മൈക്രോവേവില്‍ ഒരു ടിഷ്യൂ പേപ്പറിന്‌ മീതെ (നീരാവി തടയാന്‍) 30 സെക്കന്റ്‌ വച്ചാല്‍ നല്ല മൊരിഞ്ഞ പപ്പടം കിട്ടും. കുറച്ച്‌ കൂടി ടേസ്റ്റുള്ള പപ്പടം ഉണ്ടാക്കാന്‍ ഒന്നോ രണ്ടോ തുള്ളി വെളിച്ചെണ്ണ പപ്പടത്തിന്റെ ഇരു വശവും തടവിയ ശേഷം മൈക്രോവേവില്‍ വച്ചാല്‍ മതി. ഇതിലും ഗ്ലാമര്‍ വേണ്ടുന്നവര്‍ പപ്പടത്തില്‍ വെണ്ണ പുരട്ടൂ.
[കഴിഞ്ഞ വിഷുവിന്‌ വാങ്ങി, അലൂമിനിയം ഷീറ്റ്‌ പോലെ ഇരിക്കുന്ന പപ്പടം ആണെങ്കില്‍ ഈ സാഹസത്തിന്‌ ഇറങ്ങരുത്‌. സുന്ദരനും കോമളനും ആയ പപ്പടം ആണെങ്കിലേ പരിപാടി നടക്കൂ...]

How To:
1. കഴുകി ആറ്റി തുടച്ച നാക്കില ഉണ്ടെങ്കില്‍ എടുത്തു നിവര്‍ത്തി വയ്ക്കുക.

2. ഇലയുടെ വടക്കു കിഴക്കെ മൂലയില്‍ മൂന്നു പപ്പടവും, ഒന്നിനു മീതെ ഒന്നായി അടുക്കി വെക്കുക.

3. നനവ്‌ ഇല്ല എന്ന് ഉറപ്പു വരുത്തിയ ശേഷം കൈ ഉപയോഗിച്ച്‌ പപ്പടം പൊടിക്കുക. തീരെ ചെറുതായി പൊടിച്ചു, ഭസ്മം പോലെ ആക്കി കളയരുത്‌. ഒരു നുള്ളു വാരി വായില്‍ ഇട്ടു ചവച്ചാല്‍ 'കറു മുറു' എന്നു ശബ്ദം ഉണ്ടാവണം. ഇല്ലെങ്കില്‍ തിരിച്ചു പോട്ടെ വണ്ടി #2-ലേക്ക്‌.

4. കയ്യിലുള്ള പൊടിയൊക്കെ ഇലയിലേക്കു കുടഞ്ഞിട്ട ശേഷം, അടിച്ച്‌ കൂട്ടി ഒരു കൂന ആക്കി വയ്ക്കാവുന്നതാണ്‌. ഇനി കൈ നക്കി വൃത്തിയാക്കാം, ചാന്‍സ്‌ 1.

5. തൊലി പൊളിച്ച്‌ പഴം ഒന്നൊന്നായി എടുത്ത്‌ കൈകള്‍ക്കുള്ളില്‍ ഭദ്രമായി പിടിച്ചു കുഴക്കുക. പഴത്തിലുള്ള ഗ്രിപ്‌ പോകാതിരിക്കാന്‍ പ്രത്യേകം ശ്രദ്ധിക്കണം. അല്ലെങ്ങില്‍ ഊരി തെറിച്ച പഴം പപ്പടകൂനയും തകര്‍ത്ത് കൊണ്ടു അടുത്തിരിക്കുന്നവരുടെ പോക്കറ്റില്‍ ലാന്റ്‌ ചെയ്യും.

6. കുഴച്ച പഴത്തിലേക്ക്‌ നെയ്യും പഞ്ചസാരയും ചേര്‍ത്ത്‌ ഒന്നും കൂടി ചെറുതായി കുഴയ്ക്കുക. ആവശ്യത്തിന്‌ മധുരം പോരെങ്കില്‍ കൂടുതല്‍ ചേര്‍ക്കാനുള്ള സുവര്‍ണ്ണാവസരം ആണ്‌ ഇത്‌. കുഴച്ച്‌ പേസ്റ്റ്‌/പശ പരുവം ആക്കി കളയരുത്‌ (“ബ്ലും“ “ബ്ലും“ “പ്ലിക്ക്“ “പ്ലിക്ക്” എന്ന് അവരുത്, കടപ്പാട് : വക്കാരി). കുറച്ച്‌ കഷ്ണങ്ങള്‍ ഉണ്ടാകുന്നതാണ്‌ ഉത്തമം.

7. ഈ കുഴച്ചു വച്ച പഴം ഒരു മുക്കാല്‍ ഇഞ്ച്‌ കട്ടിയില്‍ പരത്തി വയ്ക്കുക. ചാന്‍സ്‌ 2 ഇവിടെ.

8. ഇതിനു മീതെ പൊടിച്ച പപ്പടം ലാവിഷായി വാരി വിതറുക. എതു ഭാഗത്ത്‌ നിന്നും നോക്കിയാലും പപ്പടം മാത്രമേ കാണൂ എന്നു ഉറപ്പു വരുത്തുക. നിങ്ങള്‍ കാത്തിരിക്കുന്ന വിഭവം കഴിക്കാന്‍ തയ്യാര്‍ ആയി. ഇനി ഇതു വാരി കഴിക്കാവുന്നതാണ്‌. കഴിച്ച ശേഷം തുടച്ച്‌ വടിച്ച ഇലയില്‍ ഇനി ചോറ്‌ വിളമ്പാം. ഇതിനിടയില്‍ ചാന്‍സ്‌ 3 കളയല്ലേ.

Important Notice:
പൊടിച്ച പപ്പടം വിതറി കഴിഞ്ഞ ശേഷം കൂട്ടി കുഴയ്ക്കരുത്‌, വാരി കഴിക്കാന്‍ മാത്രമേ പാടുള്ളൂ. അല്ലെങ്കില്‍ പപ്പടത്തിന്റെ ഒരു ഇത്‌ [ഏത്‌? crispness] നഷ്ടപ്പെടും.
അതു പോലെ തന്നെ, പഴം പേസ്റ്റ്‌ പോലെ കുഴഞ്ഞാലും ഇത്‌ [ഏത്‌? something else] നഷ്ടപ്പെടും. ഒപ്പം തന്നെ പപ്പടം പെട്ടെന്ന് കുതിര്‍ന്നു പോവുകയും മുകളില്‍ പറഞ്ഞ അത്‌ കൈവിട്ടു പോകുകയും ചെയ്യും.

Known Issues:
ഈ വിഭവത്തെ പറ്റി പറയുമ്പോള്‍ മിക്കവരും തന്നെ 'അയ്യേ' എന്ന് തുടങ്ങുകയും, 'അടിപൊളി' എന്നു അവസാനിപ്പിക്കുകയും ആണ്‌ ചെയ്യാറ്‌.
മൈസൂര്‍ പഴത്തിന്‌ പകരം മൈസൂര്‍ പഴം മാത്രം എന്ന തോന്നല്‍ എന്റെ മാത്രം. താല്‍പര്യമുള്ളവര്‍ നേന്ദ്രപ്പഴം ഒഴിച്ച്‌ മറ്റു പഴങ്ങള്‍ പരീക്ഷിക്കാം (applies to കാണുക).

Applies To:
1. മൈസൂര്‍ പഴം - മലബാര്‍ എഡിഷന്‍
2. കുന്നന്‍ പഴം - പെരിങ്ങോട്‌ എഡിഷന്‍ (കടപ്പാട്‌ : പെരിങ്ങോടന്‍)
3. പപ്പടം - ഗുരുവായൂര്‍ സ്പെഷ്യല്‍ എഡിഷന്‍
4. പപ്പടം - ഗണേശ ചെട്ടീസ്‌, തലശ്ശേരി എഡിഷന്‍
5. നെയ്യ്‌ - ഉരുക്കിയ എഡിഷന്‍
6. പഞ്ചസാര - റേഷന്‍ ഷാപ്പ്‌ നമ്പര്‍:17 എഡിഷന്‍

'നാരായണി'യില്‍ നിന്ന് 'ഫോണ്‍ബൂത്ത്‌ ' വരെ

2006-03-19T18:36:00.000-05:00

സിനിമ ഒരു വിനോദം എന്ന നിലയില്‍ നിന്നും ഒരു സമൂഹത്തെ തന്നെ സ്വാധീനിക്കുന്ന കാഴ്ച വിസ്മയകരം തന്നെ. രാജമാണിക്യം എന്ന ചിത്രം മലയാളികളുടെ മനസ്സിലേക്ക്‌ ഇറങ്ങി ചെന്നിട്ടുണ്ട്‌ എന്നത്‌ ഇന്നു കേരളത്തില്‍ ആര്‍ക്കും മനസ്സിലാകും. ഒരു കഥാകാരന്റെ മനസ്സില്‍ ഉള്ള ആശയം ഒരു കഥാപാത്രമായി പരിണമിക്കുന്ന അവസ്ഥ ശരിക്കും അതിശയിപ്പിക്കുന്നതാണ്‌. ആ വര്‍ച്വല്‍ അവസ്ഥയില്‍ ഉള്ള കഥപാത്രത്തെ ഒരു നടന്‍/നടി അഭിനയിച്ച്‌ അവതരിപ്പിക്കുമ്പോള്‍ പൂര്‍ണാവസ്ഥ കൈവരിക്കുന്നു.

ഈ കഥാപാത്രത്തെ പ്രേക്ഷകന്‍ ഉള്‍ക്കൊള്ളുന്നതോടെ കഥാകാരന്റെ മനസ്സില്‍ ജനിച്ച ആ സൃഷ്ടി പിന്നെ പ്രേക്ഷകന്റേതാകുന്നു. ചില കഥാപാത്രങ്ങള്‍ മനസ്സില്‍ പതിയുന്നവയും, നമ്മള്‍ ഉള്ളിലേറ്റിനടക്കുന്നവയും ആയി മാറുന്നു. ആ കഥാപത്രതിന്‌, അഭിനയിച്ച നായകന്റെ രൂപവും, ശബ്ദവും, മാനറിസങ്ങളും കൈവരുന്നു. അതിന്റെ ഒടുവിലത്തെ ഉദാഹരണം ആണ്‌ 'രമേശന്‍ നായര്‍'. ഒരു മറവി രോഗമുള്ള ഒരാളെ കുറിച്ച്‌ അലോചിക്കുമ്പോള്‍ അറിയാതെയെങ്കിലും ബ്ലെസ്സിയുടെ ഈ കഥാപാത്രം കയറി വന്നേക്കാം.

കേട്ട്‌ ശീലിച്ച ശബ്ദം നമുക്ക്‌ വേറൊരാളുടെ രൂപവുമായി ചേര്‍ത്ത്‌ വായിക്കാന്‍ ആദ്യം കുറച്ച്‌ വിഷമം ഉണ്ടാകും. ആനിമേറ്റഡ്‌ ചിത്രങ്ങളിലെ നായകന്മാരെ ഇതിന്‌ ഉദാഹരണമായി എടുക്കാം. ഇതു പല പ്രേക്ഷകരും അനുഭവിക്കുന്നത്‌ വ്യത്യസ്ഥമായിട്ടായിരിക്കും. ഇവിടെയും പ്രേക്ഷകന്‍ ഒരു ശബ്ദവും രൂപവും ഒക്കെ കണ്ട്‌ അനുഭവിക്കുകയാണ്‌. ഒരു കഥാപാത്രം ആവാന്‍ ശബ്ദം മാത്രം മതി എന്ന് നമ്മുടെ മുന്നില്‍ തെളിയിച്ചത്‌ 'മതിലുകളിലെ' നാരായണിയാണ്‌. ബഷീറിന്റെ ഈ വര്‍ച്വല്‍ നായികയെ എത്രത്തോളം കാഴ്ചക്കാരില്‍ എത്തിക്കാന്‍ കഴിയും എന്നുറപ്പില്ലാത്തതു കൊണ്ടാണോ എന്തോ അടൂരും നമുക്ക്‌ അങ്ങനേ ഒരവസരം തന്നില്ല. kpac-യുടെ സുപരിചിതമായ ശബ്ദം ആയതോടെ നമ്മുടെ മുന്നില്‍ നാരായണിയെ അവതരിപ്പിച്ചത്‌ ലളിത ആയി മാറി. ആ കഥാപാത്രത്തിനെ കുറിച്ച്‌ കൂടുതല്‍ ചിന്തിക്കാന്‍ ഉള്ള അവസരം അവിടെ പരിസമാപ്തി ആയി. കഥാപാത്രങ്ങള്‍ ചിന്തകള്‍ ഉണര്‍ത്തുന്നതിനെ പറ്റി ഒരു മുഴുനീള ചര്‍ച്ച ഇവിടെ വായിക്കുക.

പേരില്‍ നിന്ന് ആളിന്റെ സ്ഥലം ഗ്രഹിച്ചെടുക്കാന്‍ ശ്രമിക്കുന്ന മന്‍ജിത്തിനെ പോലെ, ബ്ലോഗ്‌ വായനയ്ക്കിടയില്‍ ഞാന്‍ പലര്‍ക്കും ഒരു മുഖം കൊടുത്തു (എന്റെ ഭാവനയെ ചോദ്യം ചെയ്യല്ലേ, പ്ലീസ്), അവരുടെ എഴുത്തുകളും രീതികളും ഉള്‍ക്കൊണ്ട്‌ കൊണ്ട്‌. അപ്പോഴും ഒരു ശബ്ദം മാത്രം അറിയുന്ന കഥാപാത്രം എന്റെ മുന്നില്‍ പ്രത്യക്ഷപ്പെട്ടില്ല, നാരായണിക്ക്‌ ശേഷം. ചാറ്റിലൂടെ പരിചയപ്പെടുകയും, ഫോണിലൂടെ പ്രേമിക്കുകയും ചെയ്യുന്ന പുതിയ തലമുറ പോലും ആദ്യം ചെയ്യുന്നത്‌ ഒരു ഫോട്ടോ കരസ്ഥമാക്കല്‍ ആണ്‌. ഇതും ശബ്ദത്തിന്‌ രൂപം കൊടുക്കാന്‍ ഉള്ള ശ്രമം കൊണ്ടായിരിക്കാം ചിലപ്പോഴെങ്കിലും :).

ഇത്തരത്തില്‍ ഒരു തോന്നല്‍ നിങ്ങള്‍ക്ക്‌ എപ്പോഴെങ്കിലും ഉണ്ടായെങ്കില്‍ കാണേണ്ട ഒരു ചിത്രം ആണ്‌, Phonebooth. ഒരു നല്ല ചിത്രം എന്ന് പറയാന്‍ ഞാന്‍ ആളല്ല, കാരണം എന്റെ ആസ്വാദന രീതി നിങ്ങളില്‍ നിന്ന് വ്യത്യസ്തമായിരിക്കും. ന്യൂയോര്‍ക്ക്‌ സിറ്റിയില്‍, ചിത്രത്തിലെ പോലെ ഫോണ്‍ബൂത്തുകള്‍ ഇല്ല എന്നൊക്കെ ചിന്തിക്കുന്നത്‌ ചിത്രത്തിന്റെ നിലനില്‍പ്പിനെ ചോദ്യം ചെയ്യലാവും. കാണുമ്പോള്‍ ചിത്രത്തിലേ നായകനൊപ്പം നിങ്ങളും ന്യൂയോര്‍ക്ക്‌ ടൈംസ്‌ സ്‌ക്വയറില്‍ ഒരു മണിക്കൂറിലധികം കുടുങ്ങി കിടക്കും, തീര്‍ച്ച. കൂടെ നിങ്ങളില്‍ ഉയരാവുന്ന ചിന്തയായിരിക്കും ഈ വില്ലന്‍ എങ്ങിനെയിരിക്കും എന്നത്‌.

ശാന്തം! ഭീകരം.

2006-03-14T22:13:00.000-05:00

ഓര്‍മ്മകളിലേക്ക്‌ ഒന്ന് റീവൈന്റ്‌ ചെയ്ത്‌ നോക്കി, എവിടെയാണ്‌ ഞാന്‍ ആദ്യമായി ബോംബ്‌ എന്ന് കേട്ടത്‌ എന്നറിയാന്‍. ചെന്നെത്തിയത്‌ ഓര്‍മ്മ വച്ച നാള്‍ മുതല്‍ എന്നാണ്‌. അതു കൊണ്ട്‌ തന്നെ ഇതു തലശ്ശേരിയിലെ ഇന്നത്തെ തലമുറയുടെ ജീവിതത്തിന്റെ ഭാഗം ആയി മാറിയിരിക്കുന്നു. ഇതിന്റെ ദൂഷ്യവശങ്ങള്‍ പലരുടേയങ്കിലും കുടുംബങ്ങളില്‍ തീരാനഷ്ടങ്ങള്‍ ഉണ്ടാക്കിയിട്ടുണ്ട്‌. ഇതൊക്കെ നമ്മള്‍ അംഗീകരിച്ചു. രാഷ്ട്രീയ കൊലപാതകങ്ങള്‍ക്ക്‌ വന്‍ വാര്‍ത്താ പ്രാധാന്യം കിട്ടി തുടങ്ങിയത്‌ പത്രങ്ങള്‍ കണ്ണൂര്‍ എഡിഷന്‍ തുടങ്ങിയതോടെ ആണെന്ന് തോന്നുന്നു. ചൂട്‌ വാര്‍ത്ത എന്ന വിധത്തില്‍ എരിവും പുളിയും ചേര്‍ത്ത്‌ വിളമ്പി. ഇന്ന് പക്ഷേ ഇത്‌ വാര്‍ത്തയല്ലാതായി മാറി.

ഇവിടേ ബോംബെറിയുന്നത്‌ ഒരു രാഷ്ട്രീയ പ്രതിയോഗിയെ കൊല്ലാന്‍ വേണ്ടിയായിരുന്നില്ല, ഭീകരാന്തരീക്ഷം സൃഷ്ടിക്കാന്‍ മാത്രമായിരുന്നു. അതല്ലെങ്കില്‍ ഏറ്റെടുത്ത ജോലി തടസ്സപ്പെടുത്താന്‍ ആക്രോശിച്ച്‌ വരുന്ന പോലീസുകാരെ അകറ്റി നിര്‍ത്താന്‍. ഒരാളെ കൊല്ലാന്‍ കപ്പാസിറ്റിയുള്ള സാധനങ്ങള്‍ ഇന്നും തലശ്ശേരിക്കാരുടെ ആവനാഴിയില്‍ ഉണ്ടെന്ന് തോന്നുന്നില്ല. ചുരുക്കി പറഞ്ഞാല്‍ ഈ സാധനത്തിന്‌ നാട്ടില്‍ ബഹുമാനം ഇല്ലാതായി. കുട്ടികള്‍ ബോംബ്‌ ഉരുട്ടി കളിക്കുമ്പോള്‍ പോലും വീട്ടുകാര്‍ക്ക്‌ ഒരു പേടിയും ഇല്ലാതായി. ഈെ കാലത്ത്‌ ഒരു ബോംബ്‌ പൊട്ടി എന്നൊക്കെ പറയുന്നത്‌, കറന്റ്‌ പോയി എന്നു പറയുന്ന ലാഘവത്തോടെയാണ്‌. കഴിഞ്ഞ കുറച്ച്‌ വര്‍ഷങ്ങള്‍ക്കിടയില്‍ എല്ലാ പാര്‍ട്ടിക്കാരും നിര്‍മ്മാണത്തില്‍ സ്വയം പര്യാപ്തത കൈവരിച്ചിട്ടുണ്ട്‌. പൊട്ടുന്നതായാലും ചീറ്റുന്നതായാലും വ്യത്യസ്തത വേണം എന്ന കാര്യത്തില്‍ ഓരോ പാര്‍ട്ടിയുടേയും R&D department-ന്‌ വാശിയാണ്‌. ഒടുവില്‍ ഉണ്ടായ സ്റ്റീല്‍ ബോംബ്‌ വരെ ഒന്നിനൊന്ന്‌ മെച്ചം ആയിരുന്നു എന്നാണ്‌ പോലീസിന്റെ പോലും അഭിപ്രായം. മനോജ്‌ അബ്രഹാം സൂപ്രന്‍ഡ്‌ ആയി വന്നതോടെ ഈ മേഖലയില്‍ കഷ്ടകാലം തുടങ്ങി. മുഖ്യ അസംസ്കൃത വസ്തുവായ സ്റ്റീല്‍ പാത്രം ജില്ലയില്‍ നിരോധിച്ചു. അതോടെ ജില്ലയിലേക്ക്‌ കള്ളകടത്തായി കൊണ്ടുവരുന്ന ഒരു അമൂല്യ വസ്തുവായി ഈ പാത്രം. കാലം ഇങ്ങനെയൊക്കെ കടന്നുപോയി. ബോംബ്‌ പൊട്ടാത്ത ദിവസങ്ങളില്‍ ജനങ്ങള്‍ സീരിയലുകള്‍ കണ്ട്‌ നിര്‍വൃതി കൊണ്ടു.

പക്ഷേ ഒരു ദിവസം ഭീകരമായ ശബ്ദത്തോടെ ബേപ്പൂരില്‍ ഒരു ബോംബ്‌ പൊട്ടി. അതിന്റെ മാറ്റൊലി പലയിടത്തും മുഴങ്ങി. അതു പലര്‍ക്കും രസിച്ചില്ല. കാരണം ആ പൊട്ടിയ ബോംബിനു രാഷ്ട്രീയത്തിന്റേതല്ലാത ഒരു ഗന്ധം ഉണ്ടായിരുന്നു. ചിലര്‍ അടക്കം പറഞ്ഞു, മറ്റു ചിലര്‍ പ്രതികരിച്ചു, ചിലര്‍ പ്രതിഷേധിച്ചു. ബോംബ്‌ പൊട്ടിക്കാനുള്ള അവകാശം നിങ്ങള്‍ക്കു മാത്രമോ എന്നു അന്യ ദേശക്കാര്‍ തലശ്ശേരിക്കാരെ പരിഹസിച്ചു. ദിവസങ്ങളും മാസങ്ങളും കൊഴിഞ്ഞു വീണു. എല്ലാം അടങ്ങി എന്ന് കരുതിയ നിമിഷത്തില്‍ വീണ്ടും. ഇത്തവണ കോളിളക്കം ഉണ്ടാകും എന്നു കരുതിയവര്‍ വീണ്ടും വിഡ്ഡികള്‍ ആയിക്കൊണ്ടിരിക്കുന്നു, ഒപ്പം കേരളത്തിലേ സാധാരണ ജനങ്ങളും. പതിവില്‍ നിന്ന് വിപരീതമായി ആരൊക്കെയൊ പറയുന്ന കേള്‍ക്കുന്നു, ഇതിനു പിന്നില്‍ തീവ്രവാദ ബന്ധം ഉണ്ടെന്ന്. നാട്‌ നശിക്കുന്നു, ജനങ്ങള്‍ ഉറക്കം നടിക്കുന്നു... ശാന്തം ഭീകരം.

ഇത്രയും പറഞ്ഞു ഇവിടെ ബോറടിപ്പിക്കാന്‍ മാത്രം എന്താണുണ്ടായതു എന്നു ആരെങ്കിലും ചോദിക്കുകയാണെങ്കില്‍ ഈ ദീപിക വാര്‍ത്ത ആണ്‌ ആധാരം. വായിച്ചപ്പോള്‍ ഒരു 'ജയിംസ്‌ ബോണ്ട്‌' പടം ആയിരിക്കും എന്നാണ്‌ കരുതിയത്‌. ചോദിക്കാനും പറയാനും ആരെങ്കിലും ഉണ്ടായിരുന്നെങ്കില്‍....

പോസ്റ്റ്‌ വാലന്റൈന്‍ ഡേ സിന്‍ഡ്രോം

2006-02-20T02:44:00.000-05:00

ഈ പൂക്കള്‍ ഇത്ര പെട്ടെന്നു വാടിപോയോ? Feb-14ഉം കഴിഞ്ഞിട്ട് ഇന്നേക്ക് 5 ദിവസം അല്ലേ ആയുള്ളൂ. ആശിച്ച് മോഹിച്ചു കിട്ടിയ കുറച്ചു പൂക്കള്‍ ആയിരുന്നു. ഈ പൂക്കള്‍ ഒക്കെ തന്നെ ഇത്ര വേഗം വാടി പോകുന്നതു എന്തുകൊണ്ടായിരിക്കും? എല്ലാം പറഞ്ഞതുപോലെ ഞാന്‍ ചെയ്തിരുന്നല്ലോ. മൂന്നാം ദിവസം വീണ്ടും വെള്ളം ഒഴിച്ചു കൊടുത്തു, പായ്ക്കറ്റില്‍ ഉണ്ടായിരുന്ന മരുന്നും ഇട്ടു. എന്നിട്ടും ഒക്കെ തന്നെ വാടി തുടങ്ങി. കളഞ്ഞിട്ടു വരാം, കൂടുതല്‍ ദിവസം ഇവിടേ വച്ചാല്‍ അതു പിന്നെ വിത്തും പൊടിയും ഒക്കെ വീണു വൃത്തികേടാകും. പക്ഷേ ഇതു കളഞ്ഞു എന്നു അറിഞ്ഞാല്‍ പുള്ളിക്കാരന്‍ വല്ലതും ചോദിക്കുമോ? മുമ്പു എപ്പോഴോ എന്തോ പറഞ്ഞിരുന്നില്ലേ? ഇനി ഇതിന്റെയും വിലയും ഡോളറില്‍ നിന്നു രൂപയിലേക്കു കൂട്ടി അവിടെ നിന്നും ജയേട്ടന്റെ കടയിലെ പുട്ടിന്റെ വിലയിലേക്കു മാറ്റുമോ? അങനെ വന്നാല്‍ തന്റെ രണ്ടു കൊല്ലത്തെ പുട്ടാണ് നീ യാതൊരു ആലോചനയും ഇല്ലാതെ കൊണ്ടുപോയി കളഞ്ഞത് എന്നും പറഞ്ഞേക്കാം. വന്ന ദിവസം ഉണ്ടായിരുന്ന ഭംഗി കാരണം ഞാന്‍ അതു മുന്നില്‍ തന്നെ വയ്ക്കുകയും ചെയ്തു. അതിപ്പോള്‍ പാരയായി. ഇനി എന്തു ചെയ്യും; തത്കാലം ഇതിവിടെ തന്നെ നില്‍ക്കട്ടെ. നാളെ ഓഫീസില്‍ പോയി കഴിഞ്ഞാല്‍ മാറ്റി വയ്ക്കം. തിരക്കും കഴിഞ്ഞു വന്നാല്‍ ഇതൊന്നും ആലോചിക്കാന് സമയം കാണില്ല എന്ന് വിചാരിക്കാം. അടുത്ത പ്രാവശ്യം പ്ലാസ്റ്റിക്ക് പൂക്കള്‍ കിട്ടിയാല്‍ മതി, അഥവാ കിട്ടിയില്ലെങ്കിലും കുഴപ്പമില്ല. ഒരു വാലന്റൈന്‍‌സ് ഡേ കൊണ്ടു ഇത്രയും വിഷമം ഉണ്ടാകും എന്നു വിചാരിച്ചില്ല.

മഞ്ഞുരുകും മുമ്പേ...

2006-02-15T23:54:00.000-05:00

വീണ്ടും വാലന്റൈന്‍സ്‌ ഡേ. പ്രിയതമ ഈ ഒരു ദിവസത്തിനായി കാത്തിരിക്കുന്നുണ്ടെങ്കിലും, തിരക്കു പിടിച്ച ജീവിത യാത്രയില്‍ ഇതും മറ്റൊരു ദിനം എന്ന പോലെയായിരുന്നു ഞാന്‍. പക്ഷേ ദിവസം പിറന്നപ്പോള്‍ അതിനു ഒരു പ്രത്യേക മാസ്മരികത തോന്നുന്നു. മഞ്ഞിന്‍ പുതപ്പണിഞ്ഞ ന്യൂയോര്‍ക്ക്‌ സിറ്റി ഒന്നു കൂടി സുന്ദരി ആയിരിക്കുന്നു. പ്രണയിതാക്കള്‍ക്ക്‌ ഇതിലും നല്ലൊരു അന്തരീക്ഷം എവിടെ ഉണ്ട്‌. ഓഫീസ്‌ യാത്രക്കായി ഞാന്‍ കൃത്യ സമയത്ത്‌ തന്നെ ഇറങ്ങി. സബ്‌വേ സ്റ്റേഷനിലേക്കുള്ള നടത്തം പതിവിലും വ്യത്യസ്തമായി എനിക്കു തോന്നി, നിറയേ റോസാ പൂക്കളും ചൈനീസ്‌ നിര്‍മ്മിത ഗിഫ്റ്റുകളും ആയി വഴിയോര കച്ചവടക്കാര്‍.

ഞായറാഴ്ചത്തെ മഞ്ഞുവീഴ്ച്ച കാരണം ട്രെയിന്‍ സര്‍വീസുകള്‍ ഇനിയും പൂര്‍ണമായി പുനസ്ഥാപിച്ചിട്ടില്ല, അതു കൊണ്ട്‌ തന്നെ സാധാരണയില്‍ കവിഞ്ഞ തിരക്കുണ്ട്‌. എങ്കിലും ദിവസത്തിന്റെ പ്രത്യേകത വിളിച്ചറിയിക്കുന്ന വിധത്തില്‍ ഇന്ന് യാത്രക്കാരില്‍ ഒരു ഊര്‍ജ്ജവും പ്രസരിപ്പും ഉണ്ട്‌. കൈയ്യില്‍ പൂക്കളും മനസ്സില്‍ സ്നേഹവും പ്രണയിനികളേ കാണാന്‍ തുടിക്കുന്ന ഹൃദയവുമായി കുറേ പേരും. പരസ്പരം കെട്ടിപ്പിടിച്ചു നില്‍ക്കുന്ന ഇണക്കുരുവികളും കുറവല്ല. ആദ്യം പുറപ്പെടുന്ന ട്രെയിനില്‍ ഞാനും കയറി. വര്‍ണ കടലാസില്‍ പൊതിഞ്ഞു ഒരുക്കി വച്ച പൂക്കള്‍ ഉടഞ്ഞു പോവാതെ സൂക്ഷിക്കാന്‍ എല്ലാവരും ശ്രദ്ധിക്കുന്നു. എങ്ങും മൂടി കിടക്കുന്ന മഞ്ഞില്‍ തിളങ്ങുന്ന സൂര്യപ്രകാശം ട്രെയിന്‍ ടണലില്‍ നിന്ന് പുറത്തു വരാന്‍ കാത്തിരിക്കുകയായിരുന്നെന്ന പോലെ ഇരച്ചു കയറി.

കട കട ശബ്ദം ഉണ്ടാക്കി നീങ്ങുന്ന ട്രെയിനിന്റെ താളം തെറ്റിക്കാന്‍ വേണ്ടി എന്ന പോലെ ആരുടെയോ ഫോണ്‍ മണി അടിച്ചു. പലര്‍ക്കും അതുണ്ടാക്കിയ ശബ്ദം ഇഷ്ടപ്പെട്ടില്ലെന്നു തോന്നുന്നു. ഫോണ്‍ എടുത്ത സുന്ദരിയുടെ കിളിമൊഴി കേട്ടപ്പോള്‍ ഞാനും അവളെ ഒന്നു ശ്രദ്ധിച്ചു. പക്ഷേ ആ സന്തോഷം അടയുന്നതു പോലെ ഒരു തോന്നല്‍ അവളുടെ മുഖത്തു നിഴലിക്കാന്‍ തുടങ്ങിയതു പെട്ടെന്നായിരുന്നു. വിതുമ്പാന്‍ തുടങ്ങുന്ന മുഖവുമായി താമസിയാതെ അവള്‍ ഫോണ്‍ ഓഫ്‌ ചെയ്തു. പിന്നെ എല്ലാം കൈവിട്ടുപോയെന്ന മട്ടില്‍ ഒരു പൊട്ടി കരച്ചിലായിരുന്നു. ഡയമണ്ടുകളുടെയും, മഞ്ഞുപുതപ്പിന്റെയും, വിടരാന്‍ തുടങ്ങുന്ന റോസാ പുഷ്പ്പങ്ങളുടെയും ലോകത്ത്‌ നിന്ന് കറുത്ത യാഥാര്‍ത്യങ്ങളിലേക്ക്‌ ഒരു ഫ്രീഫോള്‍. പിന്നെ ആ മുഖത്ത്‌ നോക്കാന്‍ എന്റെ മനസ്സനുവദിച്ചില്ല. അവളുടെ സങ്കടം ഉള്‍ക്കൊണ്ടെന്നവിധം മറ്റുള്ളവര്‍ തങ്ങളുടെ കൈയിലുള്ള പൂക്കള്‍ ഒളിച്ചു വയ്ക്കാന്‍ ശ്രമിക്കുന്നതു പോലെ എനിക്കു തോന്നി.

തേങ്ങി കൊണ്ടിരുന്ന സുന്ദരിയില്‍ നിന്നു ട്രെയിന്‍ ഇറങ്ങി നടന്നകലുമ്പോള്‍ എന്റെ മനസ്സും ചഞ്ചലമായിരുന്നു. സന്തോഷവും സങ്കടവും ഇരു വശങ്ങളില്‍ പതിച്ച ഒരു നാണയത്തിന്റെ ആരും കാണാന്‍ ആഗ്രഹിക്കാത്ത വശം കണ്ടു എന്നൊരു തോന്നല്‍ ആയിരുന്നു അപ്പോള്‍.

നിങ്ങള്‍ എന്നെ കടക്കാരനാക്കി

2006-02-13T21:36:00.000-05:00

നാളികേരത്തിന്റെ നാട്ടിലെനിക്കൊരു
പതിമൂവായിരത്തിന്റെ ലോണുണ്ട്‌...
[ചിത്രം : തുറന്ന (?) വാതില്‍] [പാടിയത്‌ : ഒരു മലയാളി]

എങ്ങനെ പാടാതിരിക്കും, നമ്മളെ പണയംവച്ചു ജോളി അടിക്കുകയല്ലേ പഹയന്മാര്‍. ഒരോ ബജറ്റും നമ്മുടെ പുറത്ത്‌ ആണല്ലോ? ഏറ്റവും പുതിയ കണക്കു അനുസരിച്ച്‌ കേരളത്തിന്റെ പൊതുകടം 44,350 കോടി രൂപയാണ്‌, എന്നു വച്ചാല്‍ നമ്മള്‍ 3.18 കോടി ജനങ്ങളും ഒരു 13,500 രൂപ കൊടുത്താല്‍ അടച്ചു തീര്‍ക്കാവുന്നതെ ഉള്ളു എന്ന് അര്‍ത്ഥം. അതല്ലാതെ ആളോഹരി കടം കുറയ്ക്കണമെങ്കില്‍ നമ്മുടെ സുഹൃത്ത്‌ ബൈജു പറഞ്ഞ പോലെ ജനസംഖ്യ കൂട്ടിയാലും മതി, അതല്ലേ ഇപ്പോള്‍ നമ്മളേ കൊണ്ട്‌ പറ്റൂ?

ഉത്സവം

2006-02-12T22:49:00.000-05:00

കുംഭം 1-ന്ന് : മലബാറില്‍ ഉത്സവകാലത്തിന്‌ തിരി കൊളുത്തി കൊണ്ട്‌ അണ്ടലൂര്‍ കാവില്‍ തിറ ആരംഭം. ഓര്‍മ്മകളില്‍ നിറയുന്നു
കാവും കുളവും
അരയാലും തറയും
ദൈവത്താറും തിരുമുടിയും
പീഠവും വിളക്കും
തോറ്റവും ആട്ടവും...

2006-02-07T21:15:00.000-05:00

പുരാവസ്തു
വല്യമ്മയ്ക്കു അസ്വസ്ഥത മാറുന്നില്ല. പഠിപ്പും വിവരവും ഉള്ള സായിപ്പു ഇതെല്ലാം ഇങ്ങനെ നാട്ടുക്കാരോടു പറഞ്ഞു നടക്കേണ്ട കാര്യം ഉണ്ടോ? സംഭവം ഇത്രയേ ഉള്ളു, England-ല്‍ ഏതോ ആപ്പീസില്‍ കാഴ്ച്ചക്കു വച്ച രണ്ടു കാലി ഭരണി ഉടഞ്ഞു. ആള്‍ക്കാരു കയറി ഇറങ്ങുന്ന ആപ്പീസില്‍ ഇമ്മാതിരി സാധനം കൊണ്ടു വച്ചതും പോര... അല്ലെങ്കിലും പുതിയ ഭരണി ഒന്നും അല്ല, പഴയ പന്നാസു സാധനം. പണ്ടു ഇതു പോലെ കുറെ എണ്ണം നമ്മുടെ ചായ്പ്പിലും ഉണ്ടായിരുന്നു. മേസ്തിരി ഓട്‌ ശരിയാക്കാന്‍ കയറിയപ്പോല്‍ ഓടു വീണിട്ടാണു അന്നു മൂന്നു ഭരണി പൊളിഞ്ഞതു. വല്യച്ചന്‍ കാച്ചി വെച്ച എണ്ണ പോയതിന്റെ സങ്കടം നമ്മള്‍ ആരോടെങ്കിലും പറഞ്ഞോ? അതോ നമ്മള്‍ മേസ്തിരിയെ വഴക്കു പറഞ്ഞോ? ഇവിടെ ഒരു മനുഷ്യന്‍ തലയടിച്ചു വീണതിനെ പറ്റി ആര്‍ക്കും വിഷമം ഇല്ല, സഹതാപം മുഴുവന്‍ ഭരണിക്കാണു. ആല്ലെങ്കിലും പഴയ സാധനങ്ങള്‍ കണ്ടാല്‍ ഇവര്‍ പണ്ടേ എടുത്തു കൊണ്ടു പോകും. കേളുവേട്ടന്‍ മുറുക്കാന്‍ തുപ്പിയിരുന്ന കോളാമ്പി വരെ സായിപ്പല്ലേ വലിയ കാശും കൊടുത്തു മേടിച്ചു കൊണ്ടു പോയതു.

വല്യമ്മയുടെ കണ്ണില്‍ സംഭവം നിസ്സാരം ആണെങ്കിലും Fitzwilliam Museum-കാരുടെ മുന്നില്‍ പ്രശ്നം ഗുരുതരമാണു. കാരണം, ഉടഞ്ഞു പോയ സാധനം ലക്ഷങ്ങള്‍ വില വരുന്ന 300 വര്‍ഷം പഴക്കമുള്ള അമൂല്യ (പാല്‍പ്പൊടി അല്ല) വസ്തു ആണെന്നതു തന്നെ കാരണം. മ്യൂസിയങ്ങളില്‍ ഒക്കെ പൊട്ടിയതും, തുരുമ്പു പിടിച്ചതും, കൈ ഒടിഞ്ഞതും, തല ഇല്ലാത്തതും ഒക്കെ ആയതു കൊണ്ടു, ഇതും ആ കൂട്ടത്തില്‍ കയറിക്കോളും എന്നു വിചാരിച്ചു ആദ്യം സമാധാനിച്ചു. പക്ഷെ വന്നു നോക്കിയപ്പോല്‍ അല്ലേ അറിഞ്ഞതു, ഇതു ആകെ തവിടുപൊടി ആയി പോയി എന്ന കാര്യം. എന്തായാലും ദുഃഖാചരണം കഴിഞ്ഞിട്ടില്ല (as of Feb 7th, 2006). പൊടി വാരി കഴിയാത്തതു കൊണ്ടാണോ, അതോ ''ഒറിജിനല്‍ ഡ്യൂപ്ലിക്കേറ്റ്‌' തായ്‌വാനില്‍ നിന്നു ഇറക്കാന്‍ ആണോ എന്നറിയില്ല, മ്യൂസിയം ഇപ്പോള്‍ അടച്ചിട്ടിരിക്കുകയാണു. തകര്‍ത്തവന്‍ കേടുപാടൊന്നും കൂടാതെ പുറത്തു വിലസുന്നുണ്ടു. ഇനി ഈ പരിസരത്തു കണ്ടു പോകരുതെന്നും പറഞ്ഞു കൊണ്ടു മ്യൂസിയം അധികൃതര്‍ ഇദ്ദേഹത്തിനു കത്തയക്കാന്‍ സമയം കണ്ടെത്തി.

2006-02-05T02:28:00.000-05:00

ജീവിതം, സ്വാതന്ത്ര്യം, ചൈന
ഒടുവില്‍ ഗൂഗിളും ചൈന എന്ന അതികായന്റെ മുന്നില്‍ കീഴടങ്ങി. മാധ്യമങ്ങള്‍ ഒന്നൊഴിയാതെ എഴുതി, എന്തോ വലിയ സംഭവം നടന്നു എന്ന മട്ടില്‍. നട്ടെല്ലു കുറച്ചു വളച്ചു നിന്നാലും കീശ നിറയുമല്ലോ; അവര്‍ക്കും അത്രയേ ആഗ്രഹം ഉണ്ടായുള്ളു? ദീപസ്തംഭം മഹാശ്ചര്യം, ബാക്കി എല്ലാം നിങ്ങളു പറയുന്ന പോലേ. "You too, Brutus?", ഞാനും പറഞ്ഞു. പ്രതികരണ ശേഷി നഷ്ടപ്പെട്ടിട്ടില്ല എന്നു തെളിയിച്ചില്ലെങ്കില്‍ പിന്നെ വയറു വേദനിക്കും. പക്ഷേ ഒരു കാര്യത്തില്‍ ഞാന്‍ സന്തോഷിക്കുകയായിരുന്നു. സ്വന്തം രാജ്യത്തെ വലിയൊരു ശതമാനത്തെ മുഴുവന്‍ വിഡ്ഡികളാക്കി നാടു ഭരിക്കുന്ന കുത്തുക മുതലാളിമാര്‍ മറ്റൊരു രാജ്യത്തു ചെന്നു ഓച്ചാനിച്ചു നില്‍ക്കുന്നു. എല്ലാം നല്ലതു തന്നേ, കാരണം നാളെ ഇവരൊക്കെ തന്നെ നമ്മുടെ വീട്ടുമുറ്റത്തും എത്തും. പക്ഷേ സങ്കടം ഒന്നാലോചിക്കുമ്പോള്‍ മാത്രം. Shi-Tao-യെ പോലുള്ളവരുടെ ജീവിതം ഹോമിച്ചിട്ടു വേണമായിരുന്നോ ഇവര്‍ക്കൊക്കെ സ്വപ്നങ്ങള്‍ കെട്ടി ഉയര്‍ത്താന്‍. Yahoo ചൈനയിലേക്കു തേരോട്ടം നടത്തിയപ്പോള്‍ ചതഞ്ഞു പോയ Shi-Tao-ക്കു വേണ്ടി വാദിക്കാന്‍ 'Amnesty International' പോലുള്ള സംഘടനകള്‍ ഉണര്‍ന്നു പ്രവര്‍ത്തിക്കുന്നതു ശ്ലാഘനീയം തന്നെ. പക്ഷേ അറിയപ്പെടാതെ എരിഞ്ഞടങ്ങുന്ന ജീവിതങ്ങള്‍ എത്ര. ജനാധിപത്യം കയറ്റി അയക്കാന്‍ രാജ്യം അന്വേഷിച്ചു നടക്കുന്ന ലോക പോലീസ്‌ ഇതൊന്നും അറിയുന്നില്ലേന്നാണോ?

2006-02-01T23:42:00.000-05:00

കുറച്ചു അസംബ്ലി വിശേഷങ്ങള്‍
പതിവു പോലെ 9:50നു ഇന്റര്‍വല്‍ ബെല്ല് അടിച്ചു. എല്ലാവരും ക്ലാസ്സില്‍ നിന്നു ചാടിയിറങ്ങി. ആവിടവിടെ കൂട്ടം കൂടി നില്‍ക്കുന്ന കുട്ടികള്‍. ടെക്സ്റ്റ്‌ ബുക്ക്‌ കടം വാങ്ങാന്‍ മറ്റു ഡിവിഷനുകളില്‍ കയറി ഇറങ്ങുന്ന ചിലര്‍. ക്ലാസ്സ്‌ തുടങ്ങുന്നതിനു തൊട്ടു മുമ്പു മാത്രം കയറി വരുന്ന സൈക്കിള്‍ സവാരിക്കാര്‍ മറ്റൊരു വശത്ത്‌. ഇന്ന് സമരം ഇല്ലെന്ന പരാതിയും ആയി വേറെ കുറച്ചുപേരും. ഇതിനിടയില്‍ രാവിലെ അസംബ്ലി ഉണ്ടെന്ന വാര്‍ത്ത കേട്ടു. ഹോംവര്‍ക്ക്‌ ചെയ്യാത്ത ചിലര്‍ക്കെങ്കിലും സന്തോഷം, വെയിലത്തു നില്‍ക്കണമെന്നുള്ള സങ്കടം ഉണ്ടെങ്കിലും. 9:55നു പ്യൂണ്‍ കണ്ണേട്ടന്‍ വന്നു ബെല്ലടിച്ചപ്പോള്‍ എല്ലാവരും ക്ലാസ്സില്‍ കയറി. സ്പീക്കറിലൂടെ പ്രാര്‍ത്ഥനാ ഗാനം ഉയര്‍ന്നു. കൃഷ്ണന്‍ മാസ്റ്റര്‍ ഹാജരു വിളിച്ചു കഴിഞ്ഞ ശേഷം എല്ലാവരെയും വരിയായി അസ്സംബ്ലി ഗ്രൌണ്ടിലേക്കു നയിച്ചു. വെയിലിനു ഇപ്പോള്‍ തന്നെ നല്ല ചൂടുണ്ട്‌. 10(A)-കാര്‌ ഒന്നാമത്തെ വരിയില്‍ നിന്നു കഴിഞ്ഞു. most disciplined class എന്നു എല്ലാ അദ്യാപകരും ഇവരെ കുറിച്ചു വാഴ്ത്തി നടക്കുന്നതു കൊണ്ടു ചിലര്‍ക്കു ബാഹുമാനവും മറ്റു ചിലര്‍ക്കു അസൂയയും ഉണ്ടു ഇവരോടു. ആസൂയയ്ക്കു മറ്റൊരു കാരണവും കൂടി ഉണ്ട്‌, അവരുടെ ലൈന്‍ എന്നും തണല്‍ നല്‍കുന്ന ഞാവല്‍ മരത്തിന്റെ ചുവട്ടില്‍ ആണ്‌. പക്ഷെ അവര്‍ക്കും ഒരു പ്രശ്നം ഉണ്ടു, കാക്കകള്‍. കണ്ണു തെറ്റിയാല്‍ കാക്ക ചതിക്കും. 10(എ)-കാരുടെ വെള്ള ഷര്‍ട്ടിനോദു ഒരു പ്രത്യേക ഇഷ്ടം ആണു ലോക്കല്‍ കാക്കകള്‍ക്ക്‌. മാത്രമല്ല ലക്ഷ്മണന്‍ മാസ്റ്റ്രരുടെ പ്രസംഗം കേള്‍ക്കാനാണോ, ജോണ്‍സണ്‍ മാഷിന്റെ സ്പോര്‍ട്‌സ്‌ ബഡായി കേള്‍ക്കാനാണോ എന്നറിയില്ല അസംബ്ലി ദിവസം മറ്റു വിദ്യാഭ്യാസ ജില്ലകളില്‍ നിന്നു പോലും കാക്കകള്‍ വരാറുണ്ട്‌ എന്നാണു 10(A)-കാരുടെ കണക്കുകള്‍ പറയുന്നതു. ആരും ഇതൊന്നും എതിര്‍ക്കാറില്ല, കാരണം അവരെക്കാള്‍ കാക്കകളെ കുറിച്ചു അറിയുന്നവര്‍ തലശ്ശേരിയില്‍ ഇല്ല എന്നു ആരും സമ്മതിക്കും.

ഈ അടുത്ത കാലത്തായി കാക്കകള്‍ക്കു ഷൈന്‍ ചെയ്യാന്‍ അവസരം കിട്ടിയിട്ടില്ല. ആതുകൊണ്ടു തന്നേ കാക്കകളും ഇതൊരു 'challenge' ആയി എടുത്തിരിക്കുകയാണ്‌. ഹെഡ്‌മാസ്റ്റര്‍ വന്നു കൊടി ഉയര്‍ത്തി, എല്ലാവരും സല്യൂട്ട്‌ അടിച്ചു, സ്കൂള്‍ ലീഡര്‍ അശോക്‌ കുമാര്‍ പ്രതിജ്ഞ വായിച്ചു. കുറച്ചു പേരെങ്കിലും "ഇന്ത്യ എന്റെ രാജ്യമാണ്‌, എല്ലാ ഇന്ത്യക്കാരും എന്റെ സഹോദരീ സഹോദരന്മാരാണ്‌..." എന്നു ഏറ്റു പറയുന്നുണ്ടെങ്കിലും ചിലരുടെയെങ്കിലും ശ്രദ്ധ മരത്തിന്റെ മേലെ കാക്ക ഉണ്ടോ എന്നു നോക്കുന്നതിലായിരുന്നു. സമയം കടന്നു പോയി, 10:25 ആയി. ഇന്നത്തെ അജണ്ടയില്‍ ഉള്ള കാര്യങ്ങള്‍ കഴിഞ്ഞതായി ഹെഡ്‌മാസ്റ്റര്‍ പ്രക്യാപിക്കുന്നതിന്റെ ഇടയില്‍ ജോണ്‍സണ്‍ മാഷ്‌ ഓടി വന്നു, രണ്ടു സ്പോര്‍ട്‌സ്‌ കാര്യങ്ങള്‍ പറയാന്‍ ഉണ്ടെന്നു ഓര്‍മ്മിപ്പിച്ചു കൊണ്ടു മൈക്ക്‌ ഏറ്റു വാങ്ങി. --ഡിം--, കറന്റ്‌ പോയി, മാഷ്‌ നിരാശനായി. ചാക്കോ മാഷ്‌ ആംബ്ലിഫയറിനടുത്തു നിന്നു ഒന്നും സംഭവിക്കാത്തതു പോലെ അകന്നു പോകുമ്പോള്‍ കുട്ടികള്‍ പലരും ചിരി അടക്കിപിടിക്കാന്‍ പാടു പെടുകയായിരുന്നു. ഒരു നിമിഷം, "പ്ലിക്ക്‌" ഒപ്പം ഷാജിമോന്റെ വിലാപവും, "അയ്യോ! കാക്ക തൂറി!". 10(A)-ക്കാരുടെ മുഴുവന്‍ നോട്ടവും മരത്തിനെ മേലേയ്ക്കു, അപ്പോഴെയ്ക്കും ആ വിരുതന്‍ man-of-the-match അവാര്‍ഡും ആയി ചിറകടിച്ചു ഉയര്‍ന്നിരുന്നു.

2005-12-30T12:24:00.000-05:00

My Seven Dreams
Its been a while I thought about the Seven, looks like it is starting to fade off from me. What Seven? It can be quite distinct thing distinct people. No, it isnt the appealing multi star thriller Se7en, Channel 7, the wonders of the world or the seven other things I can recall. Then? A piece of art, the ultimate riding machine, the M3 on two wheels (powered by gatorade?), a craft or something like that. Here too, my interests go downhill looking at the pricing catalog. Jump not yet to view the numericals.

How did this all start now. Well, I stumbled over Bill V'tech's name on the NYCC message board, a friend from the club and the person I should envy as a Seven owner. And Deepa had few questions which tickled my fading interests. Recalling memories with NYCC, because of which I have been to places where I would not have gone otherwise, good bikes play great role here. Every serious bike rider want to own the best bike in the market and like many other machines new and modified bikes too hit the market every year. But in most cases this will be to push the possible buyer with fancy paint finishes and minor changes. After all a bike also is another riding machine which is made up of a compilation of parts. The basic minimum item here is the frame. Who will not fall for a precision cut Ti and cabon fiber induced frame weighing a meagre 2.9lb, 40% less than my already light Thinkpad. Here I safely try to ignore the weight comparison to an all Ca models as they are beyond comparison on ride quality and bike life. With the frame in place the rest of the items are in choice are our own, Mavic for wheels, Shimano for gears, Selle for saddle and all the other high quality accessories. Doing all this where do we end up? Well... that is the marking question. Take a look at the numbers I am talking about - http://www.sevencycles.com/bikes/priceroad.html

To some people's amazement these numbers may top above the MSRP of few popular stock cars. But this session is not for comparing Apples & Oranges. Here each piece is distinct and its the best for you. There is no car made specifically for you and your mind and body, so why compare. But there can be a Seven just for you and only you. Get the very your's at http://www.sevencycles.com/order/CustomKitFormRoad.html.
Good luck, and thread aerobically.

2005-11-14T23:48:00.000-05:00

Is a Hybrid Worth It?
A good detailed analysis of the 'how much you save' or 'is it the environment who saves'. Looks like its more of a green car than a financial benefit.

2005-11-13T18:34:00.000-05:00

Reading on a haoarding
Wal*Mart is not just the saving place; try Jesus.

2005-10-30T15:51:00.000-05:00

Exxon Valdez Oil Spill-Some Facts
The Exxon Valdez oil spill was one of the most publicized and studied environmental tragedies in history. A view into the almost forgotten (or supressed) tragedy.

2005-10-30T11:58:00.000-05:00

The Amul Hits
The ever growing collection of Amul Baby's role in the local interesting topics.

2005-10-21T11:53:00.000-04:00

Digital Capturing - Tips-n-Tricks
Some helpful hints for avoiding mistakes usually occured when taking pictures. Whether you're a novice or a pro with your Digital or Film Camera, there's bound to be some helpful information here regarding your product that can lead to an easier user-experience…and one that produces better results, too.

2005-09-12T11:39:00.000-04:00

iPod Nano - A Detail
The real inside view of IPod Nano. A review worth reading, details in and out from a users point.

2005-09-06T22:30:00.000-04:00

Crimson Room 1994
An interesting Treasure Hunt game. Try finding all the 13 items before the door opens.
Helpful Hint: Look every nook and corner.

2005-09-06T09:08:00.000-04:00

Chernobyl: The True Scale of the Accident
A peep into world's worst nuclear accident which rocked fear 20 years ago. Will the mystery about what happened really come out some day?

2005-09-03T22:05:00.000-04:00

DNA project to trace human steps
Spencer Wells follows to root of Homo sapiens originated from Africa and all the way they reached America.

2005-09-02T14:13:00.000-04:00

Neanderthals vs. Homo sapiens
Looks like Homo sapiens is not a version upgrade of Neanderthals. Modern research [release 09.02.2005] says they did share the earth together, but there is no evidence they met each other.
Modern humans, Neanderthals shared earth for 1,000 years.

2005-08-01T19:52:00.000-04:00

Successful Strategies for Commenting Code

A good and informative article detailing the recommended ways of commenting your code. Informative and scripted well even for the novice.

2005-07-26T15:43:00.000-04:00

The Delegate SuperStore:

Part I
Implementing Callback Notifications Using Delegates.

Part II
Implementing Callbacks with a Multicast Delegate.

Part III
Asynchronous Method Execution Using Delegates.

Part IV
Updating the UI from a Secondary Thread.

2005-07-25T22:44:00.000-04:00

Marco Polo and His Travels

Get to know the details of the travels of Marco Polo (1254-1324), probably the most famous Westerner traveled on the Silk Road.

2005-07-20T10:58:00.000-04:00

"Queens Clean Air Project Advances Clean Air and Energy Innovation"

Flushing Gets its first 'Big Belly'
A new green covered can sat beside the Metro Newspaper box closely resembling it in color. Though I ignored it first, it felt something fishy and I went back to check it out. Named 'Big Belly', a solar powered trash compactor trying to play a role in keeping Flushing clean.

2005-07-11T22:25:00.000-04:00

Choosing the right Steak
Gives a detailed picture of what means what, in the Steak market.
IBIC - Choosing A Steak

2005-06-21T22:42:00.000-04:00

44 DAYS THAT CHANGED MISSISSIPPI:

Now that the talks of crusifying the people involved in Mississippy Burning is happening, these documents make quite some sense to read and understand.
Article from ClarionLedger.com.

2005-06-17T23:17:00.000-04:00

Spot and track your favorite Satellites on their path.
J-Track 3D from who else, but NASA.

2005-06-16T15:56:00.000-04:00

To have a bite of the popularity, and eventually bury it:
After the enviable popularity of FireFox, the monster 'copy'cat steps in to scrach the floor and make their mark. Eventually people will know only about IE's tabbed browsing. But there will be few who recalls there existed a company who made the browser FireFox which was downloaded atleast by 50M users.
Microsoft version of tabbing web pages on IE Browser.

2005-06-09T13:46:00.000-04:00

A peep into Sound Engineer's role:
Its Rhythm & Blues time again at the Metrotech. "The Funky Meters" performed today, but I my quest for the role of Sound Engineering ended up here. Read through:
A BASIC INTRODUCTION TO CONCERT SOUND ENGINEERING

2005-05-30T18:14:00.000-04:00

MSN Encarta - Dictionary - bourgeois
Boor.zh.waa : A word we hated to hear during college; and something we never understood during school. According to the SFI, its the stamp for anybody who has a wider thinking and have a positive outlook.

2005-05-16T22:02:00.000-04:00

A historical event unfolded in front of our eyes, but we never had the senses to look beyond what we see. My mind bites and iches on this incident. More links to follow this soon (hopefully my interest on this subject wont die before that :)).

The Rediff On The NeT Special: Prem Panicker reflects on the ISRO 'spy scandal'
The Rediff On The NeT Special: Prem Panicker's "Spies in the Sky"
The Rediff On The NeT Special: Prem Panicker's "A question of morale"

2005-05-16T19:26:00.000-04:00

The Emperor grabs the spotlight in �Sith� - Star Wars - MSNBC.com

2005-05-13T12:23:00.000-04:00

Interesting article about how a mail envelope gets marked for reaching a destination.
http://www.wonderquest.com/envelope-lichen-caribou.htm

2004-04-24T15:48:00.000-04:00

Filemon for Windows 9x/ME/NT/2K/XP
Copyright (C) 1996-2001 Mark Russinovich and Bryce Cogswell
Sysinternals - www.sysinternals.com